ഇന്നലെ രാത്രി കൂടി പട്ടിക പുതുക്കിയതോടെ സംസ്ഥാനത്ത് കോവിഡ് രോഗികളുടെ കണക്കനുസരിച്ചു തദ്ദേശഭരണ പ്രദേശങ്ങളെ ഹോട്‌സ്‌പോട്ടുകളായി നിര്‍ണയിച്ചതിലുള്ള ആശയക്കുഴപ്പത്തിനു പരിഹാരമായില്ല. ഇതിനകം മൂന്നു തവണ ഹോട്‌സ്‌പോട്ടുകളില്‍ തിരുത്തു വരുത്തേണ്ടിവന്നു.

ഈ മാസം 16-ലെ കണക്കനുസരിച്ചു രോഗികള്‍, പ്രൈമറി കോണ്ടാക്ട്, സെക്കന്‍ഡറി കോണ്ടാക്ട് എന്നീ വിഭാഗങ്ങളിലുള്ളവരുടെ എണ്ണം അടിസ്ഥാനമാക്കി ആരോഗ്യ, ദുരന്ത ലഘൂകരണ വകുപ്പുകള്‍ യോജിച്ചാണ് ഹോട്‌സ്‌പോട്ടുകള്‍ നിശ്ചയിച്ചത്. കോവിഡ് ബാധിച്ചവരുടെയും സാധ്യതയുള്ളവരുടെയും പേരും സ്ഥലപ്പേരും മാത്രം അനുസരിച്ചു ഹോട്‌സ്‌പോട്ട് നിര്‍ണയിച്ചതാണ് പിഴവിനു കാരണം. പലര്‍ക്കും അവരുടെ പ്രദേശത്തുവച്ചല്ല കോവിഡ് ബാധിച്ചത്.

പ്രൈമറി കോണ്ടാക്ടിലുള്ള പലര്‍ക്കും 28 ദിവസം നിരീക്ഷണം കഴിഞ്ഞിട്ടും രോഗം കണ്ടെത്താനായില്ല. എങ്കിലും ഇവരുടെ സെക്കന്‍ഡറി കോണ്ടാക്ടിനെ കോവിഡ് സാധ്യതാ പട്ടികയില്‍ പരിഗണിച്ചു. ഇതോടെ കോവിഡ് മുക്ത മേഖലകളും ഹോട്‌സ്‌പോട്ടായി. പ്രതിഷേധം ഉയര്‍ന്നതോടെ ജില്ലാ കലക്ടര്‍മാരുടെ നിര്‍ദേശപ്രകാരം ഇന്നലെ പട്ടികയില്‍ മാറ്റം വരുത്തി. കോര്‍പറേഷന്‍ പരിധിയില്‍ രോഗികള്‍ ഉള്ള പ്രദേശം മാത്രം ഹോട്‌സ്‌പോട്ടായി ചുരുക്കുന്നതും പരിഗണനയിലുണ്ട്. ഹോട്‌സ്‌പോട്ട് പട്ടിക നാളെ പുനര്‍നിര്‍ണയിക്കും.

അപകടം ഒഴിഞ്ഞുപോയി എന്ന ധാരണയിലല്ല ലോക്ഡൗണ്‍ നിയന്ത്രണങ്ങളില്‍ ഇളവുകള്‍ നല്‍കിയതെന്ന് മുഖ്യമന്ത്രി പിണറായി വിജയന്‍. ഇളവുകള്‍ ദുരുപയോഗിക്കരുത്. ജാഗ്രത പുലര്‍ത്തിയില്ലെങ്കില്‍ പഴയ അവസ്ഥയിലേക്കു തിരിച്ചുപോകേണ്ടിവരും. വിവിധ മേഖലകളാക്കി തിരിച്ചതു സംബന്ധിച്ച് ആദ്യദിവസങ്ങളില്‍ ആശയക്കുഴപ്പമുണ്ടാകും. അതു പരിഹരിക്കും - മുഖ്യമന്ത്രി പറഞ്ഞു.

ഹോട്‌സ്‌പോട്ട് പ്രദേശങ്ങളിലെ റേഷന്‍ കാര്‍ഡ് ഉടമകള്‍ക്ക് സര്‍ക്കാരിന്റെ സൗജന്യ പലവ്യഞ്ജന കിറ്റുകള്‍ വീടുകളില്‍ എത്തിച്ചു നല്‍കാന്‍ സന്നദ്ധപ്രവര്‍ത്തകരുടെ സഹായം തേടാമെന്നു സര്‍ക്കാര്‍.

പിങ്ക് കാര്‍ഡ് ഉടമകള്‍ക്ക് 27 മുതല്‍ കിറ്റ് നല്‍കും. കാര്‍ഡിന്റെ അവസാന അക്കം അനുസരിച്ച് 27ന് 0-1, 28ന് 2-3, 29ന് 4-5, 30ന് 6-7, മേയ് 2ന് 8-9 എന്ന ക്രമത്തിലാകും വിതരണമെന്നു മുഖ്യമന്ത്രി പിണറായി വിജയന്‍ അറിയിച്ചു. എഎവൈ (മഞ്ഞ കാര്‍ഡ്) വിഭാഗത്തിലെ 5,74,768 കുടുംബങ്ങള്‍ക്കു കിറ്റ് നല്‍കി. സ്വന്തം പേരുള്ള റേഷന്‍ കടകളില്‍ നിന്നു ലോക്ഡൗണ്‍ മൂലം കിറ്റുകള്‍ വാങ്ങാന്‍ കഴിയാത്തവര്‍ക്കു തദ്ദേശ സ്ഥാപന ജനപ്രതിനിധിയുടെ സാക്ഷ്യപത്രത്തിന്റെ അടിസ്ഥാനത്തില്‍ ഇപ്പോള്‍ താമസിക്കുന്നതിനു സമീപത്തെ കടയില്‍ നിന്നു വാങ്ങാം.

പിങ്ക് കാര്‍ഡ് ഉടമകള്‍ക്കുള്ള കേന്ദ്ര റേഷന്‍ വിതരണം ഇന്നു മുതല്‍ 26 വരെ നടക്കും. ഇതു റേഷന്‍ കാര്‍ഡിന്റെ അവസാന അക്കം അനുസരിച്ച് ഇന്ന് 1-2, നാളെ 3-4, 24ന് 5-6, 25ന് 7-8, 26ന് 9-0 എന്ന ക്രമത്തിലാകും.

സംസ്ഥാന സര്‍ക്കാരിന്റെ സൗജന്യ റേഷന്‍ 87.29 ലക്ഷം റേഷന്‍ കാര്‍ഡ് ഉടമകളില്‍ 84.45 ലക്ഷം പേര്‍ക്ക് (96.66%) വിതരണം ചെയ്തു. മേയ് മാസത്തേക്കുള്ള അരിയും ഗോതമ്പും റേഷന്‍ കടകളിലേക്കു വിതരണത്തിനു തയാറായി.