പ്രധാനമന്ത്രിയുടെ വിഡിയോ കോണ്ഫറന്സില് പിണറായി; കൂടുതല് നഗരങ്ങളില് നിന്ന് കേരളത്തിലേക്ക് ട്രെയിന് വേണം
പ്രധാനമന്ത്രിയുടെ വിഡിയോ കോണ്ഫറന്സില് മുംബൈ, അഹമ്മദാബാദ്, കൊല്ക്കത്ത, ചെന്നൈ, ഹൈദരാബാദ്, ബെംഗളൂരു എന്നിവിടങ്ങളില്നിന്നു കേരളത്തിലേക്കു പ്രത്യേക ട്രെയിനുകള് അനുവദിക്കണമെന്ന് മുഖ്യമന്ത്രി പിണറായി വിജയന് ആവശ്യപ്പെട്ടു.
സംസ്ഥാന സര്ക്കാര് നടത്തിയ റജിസ്ട്രേഷന് പ്രകാരം മറ്റു സംസ്ഥാനങ്ങളില് കുടുങ്ങിയവര്ക്കു തിരിച്ചുവരാനും, അതിഥിത്തൊഴിലാളികള്ക്കായി ട്രെയിന് അനുവദിച്ചതു പോലെ ട്രെയിന് ഏര്പ്പെടുത്തണം എന്നാണ് ആവശ്യം. കേരളത്തിലേ സ്റ്റോപ് പാടുള്ളു.
സംസ്ഥാനത്തിന്റെ റജിസ്ട്രേഷന് പ്രകാരം ഈ ട്രെയിനുകളില് ടിക്കറ്റ് അനുവദിക്കുകയാണു വേണ്ടതെങ്കിലും അതു പരിഗണിക്കാതെ റെയില്വേ ഓണ്ലൈന് ബുക്കിങ് ആരംഭിച്ചിരിക്കുന്നു. സംസ്ഥാനത്തിന്റെ റജിസ്ട്രേഷന് പരിഗണിക്കാതെ ഓണ്ലൈന് ബുക്കിങ് നടത്തി ട്രെയിന് യാത്ര അനുവദിച്ചാല് രോഗ നിയന്ത്രണ സംവിധാനം ഫലപ്രദമാകില്ല.
എത്തിച്ചേരേണ്ട ജില്ലയിലെ പെര്മിറ്റ് ആദ്യം ലഭിച്ചാല് മാത്രമേ സംസ്ഥാനാന്തര റോഡ് യാത്ര സാധ്യമാകൂ. അതിന്റെ അടിസ്ഥാനത്തില് പുറപ്പെടുന്ന ജില്ലയില് നിന്നുള്ള പെര്മിറ്റ് നല്കണം. ഇടയ്ക്കു തങ്ങുന്നില്ലെങ്കില് കടന്നുപോകുന്ന സംസ്ഥാനങ്ങളുടെ പ്രത്യേക പാസ് വേണമെന്ന നിബന്ധന പാടില്ല. ഇക്കാര്യത്തില് നിലനില്ക്കുന്ന അവ്യക്തത ഒഴിവാക്കണം.
വ്യവസായ വാണിജ്യ സംരംഭങ്ങള്ക്ക് ഇളവു നല്കാന് സംസ്ഥാനങ്ങള്ക്കു കഴിയണം. അതുകൊണ്ട് സംസ്ഥാനങ്ങളുടെ വായ്പ പരിധിയും കൂട്ടേണ്ടതുണ്ടെന്നു കേന്ദ്രം 12 ലക്ഷം കോടി രൂപ കടമെടുക്കാന് പോകുന്നതു ചൂണ്ടിക്കാട്ടിയ മുഖ്യമന്ത്രി വാദിച്ചു.
സൂക്ഷ്മ-ചെറുകിട-ഇടത്തരം വ്യവസായ മേഖലയ്ക്കും അസംഘടിത മേഖലയിലെ തൊഴിലാളികള്ക്കും സഹായ പദ്ധതികള് പ്രഖ്യാപിക്കണം. ഭക്ഷ്യഉല്പാദനം വര്ധിപ്പിക്കുന്നതിനു തരിശുഭൂമിയിലടക്കം കൃഷി ചെയ്യാന് സഹായകമാകും വിധം തൊഴിലുറപ്പു പദ്ധതി ക്രമീകരിക്കണം. സംസ്ഥാനങ്ങള്ക്കു മതിയായ ടെസ്റ്റ് കിറ്റുകള് അനുവദിക്കണമെന്നും ആവശ്യപ്പെട്ടു.
https://www.facebook.com/Malayalivartha