തളിപ്പറമ്പിനടുത്ത് ആന്തൂര്‍ വ്യവസായ മേഖലയില്‍ ഇന്നലെ ഉച്ചകഴിഞ്ഞ് രണ്ടുമണിയോടടുത്ത് ഉണ്ടായ വന്‍ അഗ്നിബാധയില്‍ പ്ലാസ്റ്റിക് ഫാക്ടറി പൂര്‍ണമായും നശിച്ചു. രണ്ടുകോടിയിലേറെ രൂപയുടെ നഷ്ടം കണക്കാക്കുന്നു. സ്വാതി പ്ലാസ്റ്റിക് ആന്‍ഡ് പാക്കറ്റ്സ് എന്ന സ്ഥാപനത്തിനാണു തീപിടിച്ചത്. ലക്ഷങ്ങള്‍ വിലവരുന്ന പ്ലാസ്റ്റിക് ഉത്പന്നങ്ങളും യന്ത്രസാമഗ്രികളും ഫാക്ടറിക്കെട്ടിടവും പൂര്‍ണമായും അഗ്നിക്കിരയായി.

ഉത്പന്ന നിര്‍മാണത്തിന് ഉപയോഗിക്കുന്ന ഈതേല്‍ അസറ്റേറ്റ് നിരവധി ബാരലുകളിലായി ഫാക്ടറിയില്‍ സൂക്ഷിച്ചിരുന്നു. പെട്രോളിയം ഉത്പന്നമായ ഇത് പൊട്ടിത്തെറിക്കാന്‍ തുടങ്ങിയതോടെ തീയണയ്ക്കാനുള്ള ശ്രമങ്ങള്‍ വിഫലമായി. വിവരമറിഞ്ഞ് തളിപ്പറമ്പ് അഗ്നിശമനനിലയത്തില്‍ നിന്നു സ്റ്റേഷന്‍ ഓഫീസര്‍ കെ.പി. ബാലകൃഷ്ണന്റെ നേതൃത്വത്തില്‍ രണ്ട് യൂണിറ്റും കണ്ണൂരില്‍നിന്ന് ജില്ലാ ഫയര്‍ ഓഫീസര്‍ രാമകുമാരന്റെ നേതൃത്വത്തില്‍ ഒരു യൂണിറ്റും എത്തിയപ്പോഴേക്കും തീ പടര്‍ന്നുപിടിച്ചിരുന്നു. എങ്കിലും അഗ്നിശമന സേനയുടെ സമയോചിത ഇടപെടല്‍മൂലം പ്രദേശത്തെ മറ്റു ഫാക്ടറികളിലേക്കു തീ പടര്‍ന്നില്ല.

20 വര്‍ഷമായി പ്രവര്‍ത്തിച്ചു വരുന്ന ഫാക്ടറി തമിഴ്നാട് സ്വദേശി സുന്ദരരാജന്റെ ഉടമസ്ഥതയിലുള്ളതാണ്. ഇവിടെനിന്ന് ഉത്തരേന്ത്യയിലെ നിരവധി ഭക്ഷ്യോല്‍പ്പന്ന ഫാക്ടറികളിലേക്ക് ഉള്‍പ്പെടെ പായ്ക്കറ്റുകള്‍ കയറ്റി അയയ്ക്കുന്നുണ്ട്. തീപിടിത്തത്തില്‍ രണ്ടു കോടിരൂപയിലേറെ നാശനഷ്ടം സംഭവിച്ചതായാണ് പ്രാഥമികവിലയിരുത്തല്‍. ഷോര്‍ട്ട് സര്‍ക്യൂട്ടാണ് തീപിടിത്തത്തിന് കാരണമെന്നു കരുതുന്നു. തളിപ്പറമ്പ് പോലീസ് കേസെടുത്തു.