ഊരാളുങ്കല്‍ പോലുള്ള അക്രിഡിറ്റഡ് ഏജന്‍സിക്ക് ടെന്‍ഡറില്ലാതെ കരാര്‍ നല്‍കാമെന്ന് ഹൈക്കോടതി
ഊരാളുങ്കല്‍ ലേബര്‍ സൊസൈറ്റി പോലുള്ള അക്രിഡിറ്റഡ് ഏജന്‍സികള്‍ക്ക് ടെന്‍ഡറില്ലാതെ കരാര്‍ നല്‍കാമെന്ന് ഹൈക്കോടതി. ഇത്തരം ഏജന്‍സികള്‍ക്ക് ടെന്‍ഡര്‍ ഇല്ലാതെ കരാര്‍ നല്‍കുന്നതിനെതിരെ കോണ്‍ട്രാക്ടേഴ്‌സ് അസോസിയേഷന്‍ നല്‍കിയ ഹര്‍ജിയിലായിരുന്നു ഹൈക്കോടതിയുടെ ഉത്തരവ്. ജസ്റ്റിസ് എന്‍ നാഗരേഷ് അധ്യക്ഷനായ ബെഞ്ചാണ് ഹര്‍ജി പരിഗണിച്ചത്.
ഊരാളുങ്കല്‍, തൃശൂര്‍ എന്നീ ലേബര്‍ കോണ്‍ട്രാക്ട് സൊസൈറ്റികളെ അക്രിഡിറ്റഡ് ഏജന്‍സികളില്‍ ഉള്‍പ്പെടുത്തിയതിനും ഇത്തരം സൊസൈറ്റികള്‍ക്ക് ടെന്‍ഡര്‍ ഇല്ലാതെ കരാര്‍ നല്‍കുന്നത് ചോദ്യം ചെയ്തുകൊണ്ടുമാണ് കോണ്‍ട്രാക്ടേഴ്‌സ് അസോസിയേഷനും ചില സ്വകാര്യ എ പ്ലസ് കോണ്‍ട്രാക്ടേഴ്‌സും ഹൈക്കോടതിയില്‍ ഹര്‍ജി സമര്‍പ്പിച്ചത്.
എന്നാല്‍ ഹര്‍ജി പരിഗണിക്കവെ ഊരാളുങ്കലിനെ അക്രിഡിറ്റഡ് ലിസ്റ്റില്‍ ഉള്‍പ്പെടുത്തിയത് ശരിവെച്ച കോടതി ഇത്തരം ഏജന്‍സികള്‍ക്ക് ടെന്‍ഡര്‍ ഇല്ലാതെ കരാര്‍ നല്‍കുന്നത് ഭരണഘടന വിരുദ്ധമല്ലെന്ന മുന്‍ നിലപാട് വീണ്ടും ആവര്‍ത്തിച്ചു. ഇത് ചൂണ്ടിക്കാട്ടിയായിരുന്നു കോടതിയുടെ ഉത്തരവ്.
തൊഴിലാളികള്‍തന്നെ ഉടമകളായ ഊരാളുങ്കല്‍ സൊസൈറ്റി സാങ്കേതികവിദഗ്ദ്ധരടക്കം 13,000-ത്തില്‍പ്പരം തൊഴിലാളികള്‍ക്കും ആയിരത്തോളം എന്‍ജിനീയര്‍മാരുമാണ് പ്രവര്‍ത്തിക്കുന്നത്.
സഹകരണ പ്രസ്ഥാനത്തിന്റെ ആഗോള സംഘടനയായ അന്തര്‍ദേശീയ സഹകരണ സംഘം പുറത്തിറക്കിയ 2020ലെ വേള്‍ഡ് കോഓപ്പറേറ്റീവ് മോണിറ്റര്‍ റിപ്പോര്‍ട്ട് പ്രകാരം വ്യവസായ ഉപഭോക്തൃസേവന വിഭാഗത്തില്‍ ടേണ്‍ ഓവര്‍/ ജിഡിപി പെര്‍ ക്യാപ്പിറ്റ റാങ്കിങ്ങില്‍ ആഗോളാടിസ്ഥാനത്തില്‍ രണ്ടാം സ്ഥാനത്തായിരുന്നു യുഎല്‍സിസിഎസ്.
ഇന്റര്‍നാഷണല്‍ കോപ്പറേറ്റീവ് അലയന്‍സും യൂറോപ്യന്‍ റിസര്‍ച്ച് ഇന്‍സ്റ്റിറ്റ്യൂട്ട് ഓണ്‍ കോപ്പറേറ്റീവ്സ് ആന്‍ഡ് സോഷ്യല്‍ എന്റര്‍പ്രൈസസും ചേര്‍ന്നു വര്‍ഷം തോറും പ്രസിദ്ധീകരിക്കുന്ന റിപ്പോര്‍ട്ടാണ് വേള്‍ഡ് കോപ്പറേറ്റീവ് മോണിറ്റര്‍.
https://www.facebook.com/Malayalivartha
