മലയാളികള്‍ക്ക് ഏറെ സുപരിചിതനായ പോലീസ് ഓഫീസറാണ് എ.പി. ഷൗക്കത്തലി. കേന്ദ്ര ആഭ്യന്തര മന്ത്രാലയത്തിന്റെ അന്വേഷണ മികവിനുള്ള പുരസ്‌കാരത്തിന് അര്‍ഹനായ എന്‍ഐഎ അഡീഷണല്‍ എസ്പി കൂടിയായ ഷൗക്കത്തലി കേരളത്തിലേക്ക് മടങ്ങിയെത്തുകയാണ്.

ടി.പി. ചന്ദ്രശേഖരന്‍ വധക്കേസ് അന്വേഷണസംഘത്തിലെ പ്രധാനിയായിരുന്ന എസ്.പി. എ.പി. ഷൗക്കത്തലി വീണ്ടും കേരളാ പോലീസിന്റെ ഭാഗമായി. ദേശീയ അന്വേഷണ ഏജന്‍സിയിലെ പ്രവര്‍ത്തനത്തിനു ശേഷം തിരിച്ചുവന്ന അദ്ദേഹത്തിന് തൃശൂരില്‍ തീവ്രവാദ വിരുദ്ധ സ്‌ക്വാഡിലാണു നിയമനം.

സ്വര്‍ണക്കടത്ത് കേസ് അന്വേഷിക്കുന്ന എന്‍ഐഎ സംഘത്തിലെ പ്രധാന ഉദ്യോഗസ്ഥനാണ് ഷൗക്കത്തലി. അധികാര കേന്ദ്രങ്ങളെ ഭയക്കാതെ കൃത്യമായ തെളിവുകളുടെയും വസ്തുതകളുടെയും അടിസ്ഥാനത്തില്‍ യഥാര്‍ത്ഥ പ്രതികളെ അഴിക്കുള്ളിലാക്കുക എന്നതാണ് അദ്ദേഹത്തിന്റെ ശൈലി. അന്വേഷണത്തിനിടെ പ്രലോഭനങ്ങളും ഭീഷണികളും ഉണ്ടായിട്ടുണ്ടെങ്കിലും അതൊന്നും അദ്ദേഹത്തെ സ്വീധീനിച്ചിട്ടില്ല.

1995 ല്‍ ഒന്നാം റാങ്കോടെ കേരളാ പൊലീസില്‍ എസ് ഐയായ ഷൗക്കത്തലി 2014 ലാണ് എന്‍ഐഎയിലെത്തിയത്. കനകമല കേസ്, തമിഴ്‌നാട്ടിലെ ഭീകരവാദ കേസുകള്‍, പാരീസ് ഭീകരാക്രമണ കേസില്‍ ഫ്രഞ്ച് ഏജന്‍സികളുമായി ചേര്‍ന്നുള്ള അന്വേഷണം എന്നിവയിലെല്ലാം ഷൗക്കത്തലി ഉണ്ടായിരുന്നു.

ആര്‍എംപി നേതാവ് ടി പി ചന്ദ്രശേഖര്‍ വധക്കേസില്‍ ഷൗക്കത്തലിയുടെ ധീരത കേരള ജനത കണ്ടതാണ്. സി പി എമ്മിനെയും പാര്‍ട്ടി ഗ്രാമങ്ങളെയും ഇളക്കി മറിച്ച കേസില്‍ നേരത്തേ തലശേരി ഡിവൈ.എസ്.പിയായിരിക്കെ ഷൗക്കത്തലിയുടെ നേതൃത്വത്തിലുള്ള പ്രത്യേക അന്വേഷണ സംഘമാണ് പികെ കുഞ്ഞനന്തനും പി മോഹനനും ഉള്‍പ്പെടെയുള്ള നേതാക്കളെ അറസ്റ്റു ചെയ്തത്.

ടി.പി. ചന്ദ്രശേഖരന്‍ കൊലക്കേസില്‍ പ്രതികളായ കൊടി സുനി, ഷാഫി, കിര്‍മാണി മനോജ് എന്നിവരെ പിടികൂടാന്‍ നേതൃത്വം നല്‍കി. ശക്തമായ രാഷ്ട്രീയ എതിര്‍പ്പ് വകവയ്ക്കാതെ മുടക്കോഴി മലയില്‍ ഒളിച്ചിരുന്ന കൊടിസുനി അടക്കമുള്ള കൊടുംക്രിമിനലുകളെ അര്‍ദ്ധരാത്രിയില്‍ വേഷപ്രച്ഛന്നരായി നടന്നെത്തി സാഹസികമായ ഏറ്റുമുട്ടലിലൂടെയാണ് ഷൗക്കത്തലിയും സംഘവും പിടികൂടിയത്. ഷൗക്കത്തലി പിന്നീട് ഡെപ്യുട്ടേഷന്‍ നിയമനം വഴിയാണ് എന്‍ഐഎയിലെത്തിയത്.

പൊലീസ് സ്‌റ്റേഷന്‍ ആക്രമിച്ച കേസില്‍ സിപിഎമ്മിന്റെ ഏരിയാകമ്മറ്റി ഓഫീസില്‍ പരിശോധന നടത്തിയ ചരിത്രവും ഷൗക്കത്തലിക്കുണ്ട്. നിങ്ങള്‍ക്ക് പൊലീസ് സ്‌റ്റേഷന്‍ ആക്രമിക്കാമെങ്കില്‍ ഞങ്ങള്‍ക്ക് പാര്‍ട്ടി ഓഫീസിലും കയറാമെന്ന് അന്ന് ഷൗക്കത്ത് അലി പറയുന്നതിന്റെ ദ്യശ്യങ്ങള്‍ വൈറലായിരുന്നു.

സുപ്രധാനമായ പല കേസുകളിലും ഷൗക്കത്തലിയുടെ സാന്നിധ്യം ഉണ്ടായിട്ടുണ്ട്. ദേശീയ അന്വേഷണ ഏജന്‍സിയുടെ തീവ്രവാദ വിരുദ്ധ ഓപ്പറേഷന്‍ സ്‌പെഷലിസ്റ്റായാണ് ഷൗക്കത്തലി അറിയപ്പെടുന്നത്. സ്വര്‍ണ്ണക്കടത്ത് കേസിലും അദ്ദേഹത്തിന്റെ അന്വേഷണ മികവിന് രാജ്യം സാക്ഷിയായതാണ്. ചുമതലയേറ്റെടുത്ത് 24 മണിക്കൂറിനുള്ളില്‍ മുഖ്യപ്രതികളായ സ്വപ്‌നാ സുരേഷിന്റേയും സന്ദീപിന്റേയും ഒളിത്താവളം കണ്ടെത്തി കുടുക്കാന്‍ അദ്ദേഹത്തിന് കഴിഞ്ഞു.

അന്വേഷണ മികവിനു കേന്ദ്ര ആഭ്യന്തര മന്ത്രാലയത്തിന്റെ പുരസ്‌കാരം അടുത്തിടെ നേടിയിരുന്നു. ഐ.പി.എസ്. ലഭിക്കാനുള്ളവരുടെ റാങ്ക് പട്ടികയില്‍ ഒന്നാം സ്ഥാനവും സ്വന്തമാക്കി.

എന്‍.ഐ.എയുടെ തീവ്രവാദ വിരുദ്ധ ഓപ്പറേഷന്‍ സ്‌പെഷലിസ്റ്റായി പേരുകേട്ട ഷൗക്കത്തലി സ്വര്‍ണക്കടത്ത് കേസില്‍ അന്വേഷണച്ചുമതല ഏറ്റെടുത്തയുടനാണു സ്വപ്‌ന സുരേഷിനെയും സന്ദീപിനെയും അറസ്റ്റ് ചെയ്തത്. പ്രിന്‍സിപ്പല്‍ സെക്രട്ടറി ശിവശങ്കരന്റെ ഫാളാറ്റ് റെയ്ഡ് നടത്തിയതും ഷൗക്കത്തലിയുടെ നേതൃത്വത്തിലായിരുന്നു.