വീണ്ടും ഓണ്‍ലൈനിലേക്ക്.... ഒന്നു മുതല്‍ ഒന്‍പത് വരെ സ്‌കൂള്‍ ക്‌ളാസുകള്‍ ഈ മാസം 21 മുതല്‍ രണ്ടാഴ്ചത്തേക്ക് വീണ്ടും ഓണ്‍ലൈനാക്കാനും സര്‍ക്കാര്‍ ഓഫീസുകളില്‍ ഗര്‍ഭിണികളായ ജീവനക്കാര്‍ക്ക് വര്‍ക്ക് ഫ്രം ഹോം അനുവദിക്കാനും തീരുമാനം..... 10,11,12ക്ലാസുകളിലെ കുട്ടികള്‍ക്ക് സ്‌കൂളില്‍ തന്നെ വാക്‌സിന്‍ നല്‍കും.... വിശദവിവരങ്ങളിങ്ങനെ......

കോവിഡ് പ്രതിദിന വ്യാപന നിരക്ക് വീണ്ടും 20ന് മുകളിലെത്തിയതിനാല്‍ ഒന്നു മുതല്‍ ഒന്‍പത് വരെ സ്‌കൂള്‍ ക്‌ളാസുകള്‍ ഈ മാസം 21 മുതല്‍ രണ്ടാഴ്ചത്തേക്ക് വീണ്ടും ഓണ്‍ലൈനാക്കാനും സര്‍ക്കാര്‍ ഓഫീസുകളില്‍ ഗര്‍ഭിണികളായ ജീവനക്കാര്‍ക്ക് വര്‍ക്ക് ഫ്രം ഹോം അനുവദിക്കാനും തീരുമാനമായി. ഓണ്‍ലൈനിലേക്ക് മാറുന്നതിനുള്ള തയ്യാറെടുപ്പുകള്‍ക്കു വേണ്ടിയാണ് 21 വരെ നീട്ടിയത് .

അതേസമയം 10,11,12 ക്‌ളാസുകാര്‍ക്ക് സ്‌കൂളിലെ പഠനം തുടരും ഇവര്‍ക്ക് വാക്‌സിന്‍ സ്‌കൂളിലെത്തിച്ച് നല്‍കാനും ഇന്നലെ മുഖ്യമന്ത്രി പിണറായി വിജയന്റെ അദ്ധ്യക്ഷതയില്‍ ചേര്‍ന്ന കൊവിഡ് സംസ്ഥാനതല അവലോകന യോഗം തീരുമാനിച്ചു.



കോളേജ് ക്‌ളാസ് തുടരും. ഒന്നു മുതല്‍ ഒന്‍പത് വരെയുള്ളവരെ വീണ്ടും സ്‌കൂളിലെത്തിക്കുന്നത് ഫെബ്രുവരി രണ്ടാം വാരത്തെ സ്ഥിതി നോക്കി തീരുമാനിക്കും. ഇതിന് ആരോഗ്യ,വിദ്യാഭ്യാസ ഉദ്യോഗസ്ഥരെ ചുമതലപ്പെടുത്തി. രോഗവ്യാപനം കൂടി ക്‌ളസ്റ്ററായി മാറുന്ന സ്‌കൂളും കോളേജും രണ്ടാഴ്ചത്തേക്ക് അടച്ചിടും. ഇക്കാര്യത്തില്‍ ഹെഡ്മാസ്റ്റര്‍ക്കോ പ്രിന്‍സിപ്പലിനോ തീരുമാനമെടുക്കാം.



സാമൂഹ്യഅകലം പാലിക്കുന്നെന്ന് ഉറപ്പാക്കാന്‍ ജില്ലാകളക്ടര്‍മാരെ ചുമതലപ്പെടുത്തി. മാളുകളിലാകട്ടെ 25 ചതുരശ്ര അടിയില്‍ ഒരാള്‍ എന്ന നിലയ്ക്കായിരിക്കണം പ്രവേശനം. ഇത് കര്‍ശനമായി പാലിക്കണം.രോഗവ്യാപനം കൂടുന്നത് എറണാകുളം,തിരുവനന്തപുരം ജില്ലകളിലാണ്. സ്‌കൂളുകളിലേക്ക് വിദ്യാര്‍ത്ഥികളെ വിടുന്നതില്‍ രക്ഷിതാക്കള്‍ക്ക് ആശങ്കയുണ്ടെന്ന് മന്ത്രി വി.ശിവന്‍കുട്ടി യോഗത്തില്‍ പറഞ്ഞു. ഇത് കണക്കിലെടുത്താണ് ഓണ്‍ലൈന്‍ ആക്കാനുള്ള തീരുമാനം.


എന്നാല്‍, 17 മുതല്‍ 20 വരെ സ്‌കൂള്‍ ക്‌ളാസ് തുടരുന്നതിന് വിശദീകരണമില്ല. ഓണ്‍ലൈന്‍ സംവിധാനത്തിന്റെ മാര്‍ഗ്ഗനിര്‍ദ്ദേശങ്ങള്‍ തിങ്കളാഴ്ച തീരുമാനിക്കും. സ്‌കൂളുകളിലെ രോഗവ്യാപനത്തിന്റെ കണക്ക് കൃത്യമായി ലഭ്യമല്ല. ഇത് തദ്ദേശസ്ഥാപനങ്ങളുടെ സഹകരണത്തോടെ ലഭ്യമാക്കും.

ഒന്നര വര്‍ഷം അടച്ചിട്ടശേഷം കഴിഞ്ഞ നവംബര്‍ ഒന്നു മുതലാണ് സ്‌കൂളുകള്‍ വീണ്ടും തുറന്നത്.സര്‍ക്കാര്‍ പരിപാടി ഓണ്‍ലൈനില്‍ സര്‍ക്കാര്‍,അര്‍ദ്ധസര്‍ക്കാര്‍,പൊതുമേഖലാ,സഹകരണ സ്ഥാപനങ്ങള്‍ എന്നിവിടങ്ങളിലെ പരിപാടികള്‍ ഓണ്‍ലൈനായി നടത്തണം.
ടി.പി.ആര്‍ 20ല്‍ കൂടുതലുള്ള ജില്ലകളില്‍ പൊതുപരിപാടി, വിവാഹം, മരണാനന്തര ചടങ്ങുകളില്‍ 50 പേര്‍ മാത്രം
പ്രത്യേക സാഹചര്യത്തില്‍ ചടങ്ങുകളില്‍ 50ലധികം പേര്‍ വേണമെങ്കില്‍ മുന്‍കൂര്‍ അനുമതി നേടണം.

ടി.പി.ആര്‍ 30ല്‍ കൂടുതല്‍ വന്നാല്‍ അവിടങ്ങളില്‍ പൊതുപരിപാടികള്‍ക്ക് വിലക്ക് , വ്യാപാര സ്ഥാപനങ്ങള്‍ ഓണ്‍ലൈന്‍ വില്‍പ്പനയിലേക്ക് മാറാന്‍ ശ്രമിക്കണം.