യാത്രക്കാര്‍ വലയുന്നു..... വടക്കാഞ്ചേരിയില്‍ സ്വകാര്യ ബസുകള്‍ നടത്തുന്ന പണിമുടക്ക് 22-ാം ദിവസത്തിലേക്ക്..... ഒരു പ്രാവശ്യം ടോള്‍ കടക്കാന്‍ 315 രൂപ, ടോള്‍ നിരക്ക് താങ്ങാനാവാതെ ബസുടമകള്‍ .

തൃശൂര്‍-പാലക്കാട്, തൃശൂര്‍-ഗോവിന്ദാപുരം റൂട്ടില്‍ ഓടുന്ന സ്വകാര്യബസുകള്‍ നടത്തുന്ന പണിമുടക്ക് 22-ാം ദിവസത്തിലേക്കു കടന്നു. പന്നിയങ്കരയില്‍ സ്വകാര്യബസുകള്‍ക്കുള്ള അമിത ടോള്‍ നിരക്ക് കുറയ്ക്കണമെന്ന് ആവശ്യപ്പെട്ടാണ് ബസുകള്‍ പണിമുടക്കുന്നത്.

ബസ്സില്ലാത്തതിനാല്‍ യാത്രക്കാരുടെ ദുരിതവും ഏറെയായി. കെഎസ്ആര്‍ടിസി പതിവു ട്രിപ്പുകള്‍ മാത്രമാണു നടത്തുന്നത്. സാധാരണക്കാരായ യാത്രക്കാരാണ് ഏറെ വലയുന്നത്. തൊഴിലാളികള്‍ക്കു ജോലിസ്ഥലത്തു സമയത്ത് എത്താന്‍ പോലും കഴിയുന്നില്ല.


മാത്രവുമല്ല ഇതിനിടെ ബസ് ജീവനക്കാരുടെ കുടുംബങ്ങളും പട്ടിണിയിലായി. കോവിഡ് മൂലം നിര്‍ത്തിവച്ച സര്‍വീസുകള്‍ തുടങ്ങിയപ്പോഴാണു ടോള്‍ നിരക്കിന്റെ പേരില്‍ സമരം ആരംഭിച്ചത്.

തൃശൂര്‍-പാലക്കാട്, ഗോവിന്ദാപുരം, മീനാക്ഷിപുരം, കൊഴിഞ്ഞാമ്പാറ റൂട്ടില്‍ ഓടുന്ന നൂറ്റന്‍പതോളം ബസുകള്‍ പണിമുടക്കുന്നതായി സംയുക്ത സമരസമിതി ഭാരവാഹികള്‍ അറിയിച്ചു.

അതേസമയം വടക്കഞ്ചേരി എംഎല്‍എ ഓഫിസില്‍ ഇന്നു പി.പി. സുമോദ് എംഎല്‍എയുടെ നേതൃത്വത്തില്‍ ചര്‍ച്ച നടക്കും. നാളെ തൃശൂര്‍, പാലക്കാട് ജില്ലകളില്‍ സ്വകാര്യ ബസുകള്‍ സമരം പ്രഖ്യാപിച്ചിരിക്കെയാണ് ഇന്നു ചര്‍ച്ച നടത്തുന്നത്. ചര്‍ച്ചയില്‍ തീരുമാനം ഉണ്ടായില്ലെങ്കില്‍ സംസ്ഥാന തലത്തില്‍ ശക്തമായ പ്രതിഷേധം നടത്തുമെന്നു തൃശൂര്‍-പാലക്കാട് സ്വകാര്യ ബസുടമ- തൊഴിലാളി സംയുക്ത സമിതി ഭാരവാഹികള്‍ പറഞ്ഞു.

പന്നിയങ്കരയില്‍ മാര്‍ച്ച് 9 മുതലാണു ടോള്‍ പിരിവ് ആരംഭിച്ചത്. ഏപ്രില്‍ ഒന്നു മുതലാണ് നിരക്കു കൂട്ടിയത്. സ്വകാര്യ ബസുകള്‍ക്കു പ്രതിമാസം 50 ട്രിപ്പിന് 10540 രൂപ ടോള്‍ നല്‍കണം.

അതായത് ഒരു പ്രാവശ്യം ടോള്‍ കടക്കണമെങ്കില്‍ 315 രൂപയും ഇരുഭാഗത്തേക്കുമായി 475 രൂപയാണു പുതിയ നിരക്ക്. നിരക്ക് പാലിയേക്കര, വാളയാര്‍ ടോള്‍ പ്ലാസയിലേതുപോലെ കുറയ്ക്കണമെന്ന് സമരക്കാര്‍ ആവശ്യമുന്നയിക്കുന്നു.