കോൺ​ഗ്രസ് സഹയാത്രിക എംഎ ഷഹനാസിനെതിരെ കേസ്. പാലക്കാട് എംഎൽഎ രാഹുൽ മാങ്കൂട്ടത്തിൽ ആണ് തനിക്കെതിരെ ഷഹനാസ് അടിസ്ഥാന രഹിത ആരോപണങ്ങൾ വിളിച്ച് പറയുന്നു എന്ന് ചൂണ്ടിക്കാട്ടി ഡിജിപിയ്ക്ക് പരാതി നൽകിയത്. തന്നെ അപകീർത്തിപെടുത്താൻ ​ഗൂഢാലോചന നടക്കുന്നു എന്നും അത് അന്വേഷണവിധേയമാക്കണമെന്നും ചൂണ്ടിക്കാണിച്ചാണ് പരാതി നൽകിയിരിക്കുന്നത്.

ഇനി നിയപരമായി പല നടപടികളും ഉണ്ടാകുമെന്ന സൂചന കൂടെ നൽകികൊണ്ടാണ് ഈ വിഷയം രാഹുൽ മാങ്കൂട്ടത്തിലിന്റെ അഭിഭാഷകൻ മാധ്യമങ്ങൾക്ക് മുമ്പിൽ വെളിപ്പെടുത്തിയത്. അതേ സമയം കഴിഞ്ഞ ദിവസം ട്വിന്റിഫോർ ചാനലിൽ അഭിമുഖം നൽകിയ രാഹുലിന്റെ പ്രതികരണങ്ങൾ വിമർശിച്ച് കൊണ്ട് കോൺ​ഗ്രസ് പ്രവർത്തക എംഎ ഷഹനാസ് രം​ഗത്ത് എത്തിയിരുന്നു. തന്നോടും രാഹുൽ മാങ്കൂട്ടത്തിൽ മോശമായി പെരുമാറിയിട്ടുണ്ട് എന്ന് ചൂണ്ടിക്കാണിച്ചായിരുന്നു ആ പ്രതികരണം. താനുമായി ഷഹനാസ് സൗഹൃദത്തിലായിരുന്നുവെന്നും താന്‍ യൂത്ത് കോണ്‍ഗ്രസ് പ്രസിഡണ്ട് ആകുന്നതിനെ പിന്തുണച്ചിരുന്നുവെന്നും തന്നെ ലിറ്ററേച്ചര്‍ ഫെസ്റ്റിന് ക്ഷണിച്ചിരുന്നുവെന്നുമടക്കം രാഹുല്‍ മാങ്കൂട്ടത്തില്‍ ആരോപിച്ചിരുന്നു.

എന്നാല്‍ തന്നെ കാണണം എന്ന് പറഞ്ഞ് ലിറ്ററേച്ചര്‍ ഫെസ്റ്റ് നടത്താന്‍ നിരന്തരം ഇങ്ങോട്ട് ആവശ്യപ്പെട്ടത് രാഹുല്‍ മാങ്കൂട്ടത്തില്‍ ആയിരുന്നുവെന്ന് ഷഹനാസ് കോഴിക്കോട് വിളിച്ച് ചേര്‍ത്ത വാര്‍ത്താ സമ്മേളനത്തില്‍ ആരോപിച്ചു. രാഹുല്‍ കോഴിയാണെന്ന് നേരത്തെ തന്നെ അറിയാമായിരുന്നുവെന്നും തന്റെ സാരി ഫോട്ടോയ്ക്ക് രാഹുല്‍ മോശം മെസ്സേജ് അയച്ചിട്ടുണ്ട് എന്നും ഷഹനാസ് ആരോപിച്ചു.  തനിക്കെതിരെയുളള ചാറ്റുകളുടേയും ഫോണ്‍ കോളുകളുടേയും പൂര്‍ണരൂപം പുറത്ത് വിടാന്‍ രാഹുല്‍ മാങ്കൂട്ടത്തില്‍ കഴിഞ്ഞ ദിവസം വെല്ലുവിളിച്ചിരുന്നു. എന്നാല്‍ തന്റെ ഫോണ്‍ ഏത് പരിശോധനയ്ക്കും നല്‍കാന്‍ തയ്യാറാണെന്നും അതിന് രാഹുല്‍ തയ്യാറാണോ എന്ന് ഷഹനാസ് ചോദിച്ചു. തന്നോട് രാഹുല്‍ കോഴിത്തരം കാണിച്ചിട്ടുണ്ടെന്നും ധൈര്യം ഉണ്ടെങ്കില്‍ അതിന്റെ സ്‌ക്രീന്‍ ഷോട്ടുകള്‍ പുറത്ത് വിടട്ടെ എന്നും ഷഹനാസ് തുറന്നടിച്ചു.

രാഹുല്‍ മാങ്കൂട്ടത്തിലിന് ലൈംഗിക വൈകൃതം ആണെന്നും അഭിമുഖം എടുക്കുന്നതിന് പകരം വല്ല ആശുപത്രിയിലും കൊണ്ട് പോവുകയാണ് വേണ്ടത് എന്നും ഷഹനാസ് പറഞ്ഞു. ഗര്‍ഭിണിയായ പെണ്‍കുട്ടിയോട് നീ ഡ്രാമ കളിക്കുകയാണോ എന്ന് ചോദിക്കുന്നവനാണ് സ്ത്രീകളോട് ബഹുമാനമുണ്ട് എന്ന് പറയുന്നത്. രാഹുല്‍ മാങ്കൂട്ടത്തില്‍ എവിടെ മത്സരിച്ചാലും അവിടെ പോയി അവനെതിരെ സംസാരിക്കുമെന്നും സൈബര്‍ കൊങ്ങികളുടെ ആക്രമണത്തെ ഭയക്കുന്നില്ലെന്നും ഷഹനാസ് വ്യക്തമാക്കുന്നു. ഇതിന് പിന്നാലെയാണ് ഇപ്പോൾ ഷഹനാസിനെതിരെ രാഹുൽ മാങ്കൂട്ടത്തിൽ പരാതിയുമായി എത്തിയിരിക്കുന്നത്.