മലയാളികള്‍ക്ക് സുപരിചിതരായ രണ്ടുപേരാണ് സഹോദരങ്ങളായ അമൃത സുരേഷും അഭിരാമി സുരേഷും. സോഷ്യല്‍മീഡിയയില്‍ സജീവമായ ഇവര്‍ അമൃതം ഗമയ എന്ന മ്യൂസിക്ക് ബാന്‍ഡ് നടത്തിവരികയാണ്. ഇരുവര്‍ക്കും സൈബറിടങ്ങളില്‍ ഒരുപോലെ പിന്തുണയും വിമര്‍ശനങ്ങളും ലഭിക്കാറുണ്ട്. ഇപ്പോഴിതാ സംവിധായകന്‍ ആലപ്പി അഷ്‌റഫ് തന്റെ യൂട്യൂബ് ചാനലിലൂടെ അമൃതയുടെയും അഭിരാമിയുടെയും ജീവിതത്തിലെ ചില കാര്യങ്ങള്‍ പറഞ്ഞിരിക്കുകയാണ്.

'അമൃത സുരേഷിനും അഭിരാമി സുരേഷിനുമെതിരെ സൈബറിടങ്ങളില്‍ വന്‍വിമര്‍ശനങ്ങളാണ് ഉണ്ടാകുന്നത്. മിക്കതും ലൈംഗിക അധിക്ഷേപങ്ങളാണ്. അവര്‍ സ്‌റ്റേജില്‍ പാടുന്ന രീതിയെക്കുറിച്ചും വിമര്‍ശനങ്ങള്‍ ഉയര്‍ന്നിരുന്നു. ഒരു തെറ്റും ചെയ്യാതെയാണ് വലിയ വിമര്‍ശനങ്ങളേറ്റുവാങ്ങുന്നതെന്ന് അഭിരാമി അടുത്തിടെ പ്രതികരിച്ചിരുന്നു. വളരെയധികം യുക്തിപൂര്‍വമായിട്ടാണ് അവര്‍ സമൂഹത്തോട് സംസാരിക്കുന്നത്.

ചെറിയ പ്രായത്തില്‍ ഒരുപാട് സ്വപ്നങ്ങളും മോഹങ്ങളുമായാണ് അമൃത സുരേഷ് വിവാഹജീവിതത്തിലേക്ക് കടന്നത്. പല സാഹചര്യങ്ങളിലും അമൃത തന്നെ വിവാഹജീവിതത്തിലുണ്ടായ പ്രശ്‌നങ്ങള്‍ ജനങ്ങള്‍ക്ക് മുന്‍പില്‍ പറഞ്ഞിട്ടുണ്ട്. മുന്‍ഭര്‍ത്താവും നടനുമായ ബാലയുടെ പണം തന്റെ മകള്‍ക്ക് വേണ്ടെന്നും അതിനാല്‍ തനിക്കും വേണ്ടെന്ന് അമൃത ഒരു അഭിമുഖത്തില്‍ പറഞ്ഞിട്ടുണ്ട്. പണത്തിനുവേണ്ടി അത്യാര്‍ത്തിയുള്ളവരല്ല താനെന്ന് തെളിയിക്കുന്ന നിലപാടായിരുന്നു അത്.

അടുത്തിടെ അമൃത തന്റെ യൂട്യൂബ് ചാനലിലൂടെ തനിക്കുണ്ടായ മോശം അനുഭവം പങ്കുവയ്ക്കുകയുണ്ടായി. തന്റെ ഒരു ബന്ധു പണം ആവശ്യപ്പെട്ട് വാട്‌സാപ്പിലൂടെ സന്ദേശം അയച്ചു. അങ്ങനെ 45,000 രൂപ കൊടുത്തു. ഇഎംഐ അടയ്ക്കാനുള്ള പണമാണ് അമൃത ബന്ധുവിന് അയച്ചുകൊടുത്തത്. വീണ്ടും അതേ നമ്പറില്‍ നിന്ന് 30,000 രൂപ കൂടി ആവശ്യപ്പെട്ടു. ആ പണം കൈവശമില്ലെന്ന കാര്യം പറയാന്‍ വേണ്ടി അമൃത ബന്ധുവിനെ വിളിച്ചപ്പോഴാണ് അവരുടെ വാട്‌സാപ്പ് ആരോ ഹാക്ക് ചെയ്‌തെന്ന കാര്യം അറിഞ്ഞത്. ഇതോടെ അവര്‍ പൊലീസില്‍ പരാതി നല്‍കി. ഇത് മറ്റുള്ളവര്‍ക്ക് സംഭവിക്കാതിരിക്കാനുള്ള ഒരു പാഠമായാണ് അമൃത ഇക്കാര്യം വെളിപ്പെടുത്തിയത്.

സാരിയുടുക്കാനും കല്യാണം കഴിക്കാനുമൊക്കെ ആഗ്രഹിച്ചിരുന്നുവെന്ന് അഭിരാമി പറയുന്നു. ചേച്ചിക്ക് സംഭവിച്ചത് കണ്ടതോടെ മതിയായെന്നും എന്നാല്‍ വിവാഹം കഴിക്കേണ്ടെന്ന് തീരുമാനിച്ചിട്ടില്ലെന്നും വിവാഹം പേടിയാണെന്നുമാണ് അഭിരാമി പറയുന്നത്. സംഗീത സംവിധായകന്‍ ഗോപി സുന്ദറുമായുള്ള ബന്ധം അമൃത മറച്ചുവച്ചിരുന്നില്ല. ഇരുവരും വിവാഹം കഴിച്ചെങ്കിലും ഒന്നിച്ചുപോകാന്‍ സാധിക്കില്ലെന്ന് മനസിലായതോടെ സന്തോഷത്തോടെ ബന്ധം പിരിയുകയായിരുന്നു. അമൃതയ്ക്ക് സന്തോഷം പകരുന്ന മറ്റൊരു കാര്യം ഇപ്പോള്‍ സംഭവിച്ചുകഴിഞ്ഞു. ബോളിവുഡ് നടന്‍ ഷാരൂഖ് ഖാന്റെ മകന്‍ ആര്യന്‍ ഖാന്‍ സംവിധാനം ചെയ്യുന്ന വെബ്‌സീരീസായ ദ ബാഡ് ഒഫ് ബോളിവുഡിലെ പ്രധാന വേഷത്തിന് ശബ്ദം നല്‍കിയത് അമൃതയാണ്' ആലപ്പി അഷ്‌റഫ് പറഞ്ഞു.