ആലപ്പുഴയില്‍ പൊലീസും ലഹരിവിരുദ്ധ സ്‌ക്വാഡും ചേര്‍ന്ന് വന്‍ മയക്കുമരുന്ന് വേട്ട. മാരക മയക്കുമരുന്നായ എം.ഡി.എം.എയും, എല്‍.എസ്.ഡിയുമായി രണ്ട് യുവാക്കളാണ് പിടിയിത്. കായംകുളം കീരിക്കാട് തുളിയനയ്യത്ത് വീട്ടില്‍ സക്കീര്‍ (26), കായംകുളം രണ്ടാംകുറ്റി പന്തപ്ലാവില്‍ മുനീര്‍ (25) എന്നിവരാണ് പൊലീസും ലഹരിവിരുദ്ധ സ്‌ക്വാഡും രാമപുരം എല്‍പി സ്‌കൂളിന് മുന്‍വശം നടത്തിയ വാഹനപരിശോധനയില്‍ പിടിയിലായത്.

ഇവരുടെ പക്കല്‍നിന്ന് 90 ഗ്രാം എം.ഡി.എം.എയും 10 എല്‍.എസ്.ഡി സ്റ്റാമ്പും പൊലീസ് പിടിച്ചെടുത്തു. സിന്തറ്റിക് മയക്കുമരുന്ന് ഇനത്തില്‍പെട്ട എം.ഡി.എം.എ, എല്‍.എസ്.ഡി എന്നിവ മുംബൈ, ഗോവ എന്നിവിടങ്ങളില്‍ നിന്നും വന്‍തോതില്‍ കേരളത്തിലേക്ക് കടത്തുന്ന സംഘത്തെകുറിച്ച് പൊലീസിന് രഹസ്യവിവരം ലഭിച്ചിരുന്നു.

ഇതിന്റെ അടിസ്ഥാനത്തില്‍ ഈ സംഘത്തിലുള്ളവരെ കേന്ദ്രീകരിച്ച് അന്വേഷണം നടത്തിവരികെയാണ് യുവാക്കാള്‍ പിടിയിലാകുന്നത്. കായംകുളം കേന്ദ്രീകരിച്ചുള്ള ക്വട്ടേഷന്‍സംഘങ്ങള്‍, കോളേജ് വിദ്യാര്‍ത്ഥികള്‍, ഇതര സംസ്ഥാന തൊഴിലാളികള്‍ എന്നിവര്‍ക്കാണ് പ്രധാനമായും ഇവര്‍ വില്പന നടത്താറുള്ളത്.

എം.ഡി.എം .എ ഗ്രാമിന് 1500 രൂപക്ക് വാങ്ങുന്ന ഇവര്‍ ഗ്രാമിന് 5000 രൂപയ്ക്കാണ് ആവശ്യക്കാര്‍ക്ക് നല്‍കാറുള്ളത്. എല്‍.എസ്.ഡി ഒരെണ്ണം 2000 രൂപയ്ക്കാണ് വാങ്ങുന്നത്. അതില്‍ നാലില്‍ ഒരു ഭാഗം 2500 രൂപയ്ക്ക് വില്‍ക്കും. പിടികൂടിയ എം.ഡി.എം.എയ്ക്ക് വിപണിയില്‍ 4.5 ലക്ഷത്തോളം രൂപയും, എല്‍.എസ്.ഡിക്ക് ഒരുലക്ഷം രൂപയും വിലവരും.

സക്കീര്‍ ജില്ലയിലെ പല സ്‌റ്റേഷനുകളിലായി 11 ഓളം അടിപിടി, പിടിച്ചുപറി, മയക്കുമരുന്ന്, മോഷണം, ക്രിമിനല്‍ കേസുകളിലും കായംകുളം മജിസ്‌ട്രേറ്റിന്റെ വീട്ടില്‍ നിന്ന് സ്വര്‍ണ്ണവും പണവും മോഷണം ചെയ്ത കേസിലും പ്രതിയാണ്. മുനിര്‍ അടിപിടി, പിടിച്ചുപറി, മോഷണം മയക്കുമരുന്ന് കച്ചവടം എന്നിവയിലും പ്രതിയാണ്.

പ്രതികള്‍ക്ക് ഇതിന് വേണ്ടി സാമ്പത്തിക സഹായം നല്‍കിയവരെ കുറിച്ചും പ്രതികള്‍ക്ക് ലഹരിവസ്തുലഭിച്ച ഉറവിടത്തെ പറ്റിയും, പ്രതികളുമായി മയക്കുമരുന്ന് ഇടപാട് നടത്തുന്നവരെകുറിച്ചും പോലീസ് അന്വേഷണം നടത്തിവരികയാണെന്നും, വരുംദിവസങ്ങളിലും ശക്തമായപരിശോധനകള്‍നടത്തുമെന്നും ഇന്‍പെക്ടര്‍ പറഞ്ഞു.