വര്‍ക്കല ന്യൂ ജംഗിള്‍ ക്ലിഫ് റിസോര്‍ട്ട് മയക്കുമരുന്ന് കേസില്‍ ഫെബ്രുവരി 11 മുതല്‍ റിമാന്റില്‍ കഴിയുന്ന ഏഴാം പ്രതി 21 കാരിയായ യുവതിക്ക് ജാമ്യമില്ല. തിരുവനന്തപുരം ഒന്നാം അഡീ. ജില്ലാ സെഷന്‍സ് കോടതിയാണ് പ്രതിക്ക് ജാമ്യം നിഷേധിച്ചത്.

ഏഴാം പ്രതി വട്ടച്ചാല്‍ സ്വദേശിനി കൃഷ്ണപ്രിയ (21) യുടെ ജാമ്യഹര്‍ജിയാണ് വിചാരണ കോടതി തള്ളിയത്. ഇത്തരം കേസുകളില്‍ സ്ത്രീയെന്ന പരിഗണനക്ക് യുവതി അര്‍ഹയല്ലെന്ന് ജാമ്യം നിരസിച്ച ഉത്തരവില്‍ കോടതി വ്യക്തമാക്കി. ഒന്നാം പ്രതി റിസോര്‍ട്ട് ഉടമക്കും കഴിഞ്ഞ ദിവസം ജാമ്യം നിഷേധിച്ചിരുന്നു. യുവതിയായ പ്രതിക്കെതിരായ ആരോപണം ഗൗരവമേറിയതാണ്.

കേസ് ഡയറി പരിശോധിച്ചതില്‍ പ്രതിയുടെ പങ്കും പങ്കാളിത്തവും പ്രഥമദൃഷ്ട്യാ വെളിവാക്കുന്നുണ്ട്. അന്വേഷണം പ്രാരംഭ ഘട്ടത്തിലാണ്. ഈ ഘട്ടത്തില്‍ പ്രതിയെ സ്വതന്ത്രയാക്കിയാല്‍ തെളിവു നശിപ്പിക്കാനും സാക്ഷികളെ സ്വാധീനിക്കാനുമുള്ള സാധ്യത തള്ളിക്കളയാനാവില്ല. ആരോപിക്കപ്പെട്ട കുറ്റകൃത്യത്തിന്റെ സ്വഭാവവും കാഠിന്യവും കണക്കിലെടുക്കുമ്പോള്‍ പ്രതിയെ ജാമ്യത്തില്‍ വിട്ടയക്കാനാവില്ലെന്നും ജാമ്യഹര്‍ജി തള്ളിയ ഉത്തരവില്‍ കോടതി ചൂണ്ടിക്കാട്ടി.
ഫെബ്രുവരി 11 നാണ് സംഭവം നടന്നത്. 7.32ഛ കിലോ കഞ്ചാവും 90 മി.ഗ്രാം എം ഡി എം എയും ഇലക്ട്രോണിക് ത്രാസും പൗച്ചും റിസോര്‍ട്ടിലെ മെയര്‍ ഹോളിഡേസ് കോട്ടേജില്‍ സൂക്ഷിച്ച് വില്‍പ്പനക്കായി കൈവശം വച്ചുവെന്നാണ് കേസ്.

21 കാരിയായ യുവതി അടക്കം 10 പ്രതികള്‍ റിസോര്‍ട്ടിലെ കോട്ടേജില്‍ തങ്ങിയാണ് യുവതിയെ മുന്‍നിര്‍ത്തി സംശയം തോന്നാത്ത വിധം ബീച്ച് കേന്ദ്രീകരിച്ച് മയക്കുമരുന്ന് വില്‍പ്പന നടത്തി വന്നത്. വിനോദ സഞ്ചാര കേന്ദ്രങ്ങളായ കാപ്പില്‍ , ഇടവ , പരവൂര്‍ , വര്‍ക്കല എന്നീ സ്ഥലങ്ങളില്‍ യുവാക്കളെ കേന്ദ്രീകരിച്ച് ഇവര്‍ കച്ചവടം നടത്തിവരികയായിരുന്നു. പ്രതികളില്‍ നിന്നും 2 ബൈക്കുകളും ഒരു കാറും 12 മൊബൈല്‍ ഫോണുകളും പിടിച്ചെടുത്തിട്ടുണ്ട്.

വര്‍ക്കല പെരുകുളത്തിന് സമീപം ന്യൂ ജംഗിള്‍ ക്ലിഫ് റിസോര്‍ട്ടുടമ ഇടവ ഓടയം തൈക്കാപ്പള്ളിക്ക് സമീപം അല്‍ അമന്‍ വിട്ടില്‍ സല്‍മാന്‍ (27) , മാവിന്‍ മൂട് ഷൈജു (37) , മുണ്ടയില്‍ സ്വദേശി വിഷ്ണു (25) , ശ്രീനിവാസപുരം സ്വദേശികളായ നാച്ച (23) , സലീം (25) , കുറമണ്ഡലം സ്വദേശിനിഷാദ് (21) , വട്ടച്ചാല്‍ സ്വദേശിനി കൃഷ്ണപ്രിയ (21) , മണ്ണാറ സ്വദേശി ആഷിഖ് (23) , കുറഞ്ഞിലക്കാട് സ്വദേശി സല്‍മാന്‍ (27) , ഭൂതക്കുളം സ്വദേശി സന്ദേശ് (25) എന്നിവരാണ് കേസിലെ 1 മുതല്‍ 10 വരെയുള്ള പ്രതികള്‍. 10 പേരും ഫെബ്രുവരി 11 ന് വൈകിട്ട് 4 മണിക്ക് അറസ്റ്റ് ചെയ്യപ്പെട്ടു.