തൃക്കാക്കര ഉപതെരഞ്ഞെടുപ്പില്‍ യുഡിഎഫ് സ്ഥാനാര്‍ത്ഥി ഉമ തോമസിന്റെ മിന്നും വിജയത്തിന് ശബരിമല ദര്‍ശനം നടത്തി എംഎല്‍എയും ഡിസിസി ഉപാദ്ധ്യക്ഷനുമായ എല്‍ദോസ് കുന്നപ്പള്ളി. മകന്‍ സെബാസ്റ്റ്യനും രണ്ട് സുഹൃത്തുക്കള്‍ക്കുമൊപ്പം ചൊവ്വാഴ്ച രാവിലെയാണ്എല്‍ദോസ് ശബരിമലയില്‍ ദര്‍ശനത്തിനെത്തിയത്.

ഇരുമുടിക്കെട്ടുമായി മല കയറിയെത്തിയ എല്‍ദോസ് രാവിലെ ദര്‍ശനം നടത്തി സന്നിധാനത്ത് വിശ്രമിച്ച ശേഷം ഉച്ചകഴിഞ്ഞാണ് മലയിറങ്ങിയത്. മുമ്പ് ജില്ലാ പ്രസിഡന്റായിരുന്നപ്പോള്‍ എല്‍ദോസ് കലക്ടര്‍ രാജമാണിക്യത്തിനൊപ്പം മല കയറിയിട്ടുണ്ട്. ഇത്തവണ ദര്‍ശനത്തോടെ ആകെ ആറ് തവണയാണ് എല്‍ദോസ് മല കയറിയത്.

തൃക്കാക്കരയിൽ ആർക്ക് വോട്ട് ചെയ്യണമെന്ന് വിശ്വാസികൾക്ക് തീരുമാനിക്കാമെന്നായിരുന്നു കഴിഞ്ഞ ​ദിവസം സിറോ മലബാർ സഭാ മേജർ ആർച്ച് ബിഷപ്പ് കർദ്ദിനാൾ മാർ ജോർജ്ജ് ആലഞ്ചേരി പ്രതികരിച്ചത്. ഇതിന് പിന്നാലെ ഇന്ന് ഉമ തോമസ് ആലഞ്ചേരിയെ സന്ദർശിച്ചു.

കോൺഗ്രസ് നേതാക്കൾക്കൊപ്പമെത്തിയായിരുന്നു കൂടിക്കാഴ്ച. കൂടിക്കാഴ്ചയ്ക്ക് പിന്നാലെ മാധ്യമങ്ങളോട് സംസാരിച്ച കർദ്ദിനാൾ തെരഞ്ഞെടുപ്പിൽ സഭയ്ക്ക് പ്രത്യേക നിലപാടില്ലെന്ന് ആവർത്തിക്കുകയായിരുന്നു.സമദൂരമെന്ന പ്രസ്താവനയോട് യോജിപ്പില്ലെന്നും ജനങ്ങളാണ് തീരുമാനമെടുക്കേണ്ടതെന്നും അദ്ദേഹം വ്യക്തമാക്കി.അതേസമയം മൂന്ന് മുന്നണികളുടെയും സ്ഥാനാർഥികൾ മണ്ഡലത്തിൽ പ്രചാരണം ശക്തമാക്കിയിട്ടുണ്ട്.