ഗുണ്ടകളുടെ കുത്തേറ്റ് ചികിത്സയിൽ കഴിഞ്ഞ ശേഷം വീട്ടിലേയ്ക്കു മടങ്ങിയെത്തിയ ഓട്ടോ ഡ്രൈവറുടെ വീടിനു നേരെ ബോംബെറിഞ്ഞ സംഭവത്തിൽ ഗുണ്ടാ സംഘാംഗങ്ങളായ ആറു പേരെ പൊലീസ് പിടികൂടി. ഓട്ടോഡ്രൈവർ മാത്യുവിനെ കുത്തിക്കൊലപ്പെടുത്താൻ ശ്രമിച്ചതിനും, അനധികൃതമായി തോക്ക് കൈവശം സൂക്ഷിച്ചതിനും പ്രതികളായ അതിരമ്പുഴ നീണ്ടുപറമ്പ് ജിബിൻ ജോസ് (21) , കാണക്കാരി വലിയതടപ്പിൽ മെൽവിൻ ജോസഫ് (26) , ഓണംതുരുത്ത് കദളിമറ്റം തളിക്കൽ അഭിജിത്ത് (22) ഇവരെ രക്ഷപ്പെടാനും ഒളിവിൽ കഴിയാനും സഹായിച്ച അതിരമ്പുഴ കാവനായിൽ സിയാദ് (24), നീണ്ടൂർ മങ്ങാട്ട് കുഴിയിൽ ശരത്ത് (23) , കാണക്കാരി വലിയതടപ്പിൽ ഡെൽബിൻ (23) എന്നിവരെയാണ് കടുത്തുരുത്തി സ്‌റ്റേഷൻ ഹൗസ് ഓഫിസർ ഇൻസ്‌പെക്ടർ രഞ്ജിത്ത് വിശ്വനാഥന്റെ നേതൃത്വത്തിലുള്ള സംഘം അറസ്റ്റ് ചെയ്തത്.

നേരത്തെ ബോംബേറ് കേസുമായി ബന്ധപ്പെട്ട് മുട്ടുചിറ കുരിശുമ്മൂട് ചെത്തുകുന്നേൽ അനന്തു പ്രദീപ് (23), കോതനല്ലൂർ മാഞ്ഞൂർ കുറുപ്പന്തറയിൽ പഴംമഠം പഴേമഠം വള്ളിക്കാഞ്ഞിരത്ത് ശ്രീജേഷ് (കുട്ടു -20), കടുത്തുരുത്തി അറുനൂറ്റിമംഗലം വിൻസെന്റിന്റെ ഉടമസ്ഥതയിലുള്ള വെഞ്ചാംപുറത്ത് വീട്ടാൽ വാടകയ്ക്കു താമസിക്കുന്ന ഇടുക്കി തൊടുപുഴ മുട്ടം ശങ്കരപ്പള്ളി വെഞ്ചാംപുറത്ത് വീട്ടിൽ അക്ഷയ് (അപ്പു -21), കോതനല്ലൂർ മാഞ്ഞൂർ കുറുപ്പന്തറ പഴേമഠം പള്ളിത്തറമാലിയിൽ ശ്രീലേഷ് (ശ്രീക്കുട്ടൻ -21), മുട്ടുചിറ പറമ്പ്രം ചാത്തൻകുന്ന് കൊണ്ടുക്കുന്നേൽ രതുൽ രാജ് (വിഷ്ണു -27) എന്നിവരെ നേരത്തെ പിടികൂടിയിരുന്നു.

മേയ് ഏഴിനു കോതനല്ലൂരിലായിരുന്നു കേസിനാസ്പദമായ സംഭവം. വാക്ക് തർക്കത്തെ തുടർന്നു ഗുണ്ടകളുടെ കുത്തേറ്റ് ചികിത്സയിൽ കഴിഞ്ഞിരുന്ന ഓട്ടോ ഡ്രൈവർ കോനല്ലൂർ പട്ടമന മാത്യു(തങ്കച്ചൻ -53)വിന് അക്രമി സംഘത്തിന്റെ കുത്തേറ്റിരുന്നു. സാരമായി പരിക്കേറ്റ മാത്യു കോട്ടയം മെഡിക്കൽ കോളേജ് ആശുപത്രിയിൽ ചികിത്സയിലായിരുന്നു. ചികിത്സയ്ക്കു ശേഷം കഴിഞ്ഞ ഏഴിനാണ് മാത്യു കോതനല്ലൂർ ട്രാൻസ്‌ഫോമർ ജംഗ്ഷന് സമീപത്തെ വീട്ടിൽ എത്തിയത്. ഈ സമയം സ്‌കൂട്ടറിൽ എത്തിയ അക്രമി സംഘം ബോബ് ആക്രമണം നടത്തുകയായിരുന്നു.

സ്‌കൂട്ടറിൽ എത്തിയ അക്രമി സംഘം ആദ്യം വഴിയിൽ സംസാരിച്ചു നിന്നവർക്ക് നേരെ ബോംബ് എറിഞ്ഞു. ഇതോടെ സ്‌കൂട്ടറിനു പിന്നിൽ ഇരുന്ന യുവാവിനെ പിടികൂടാൻ നാട്ടുകാർ ശ്രമിച്ചു. ഇതോടെ അക്രമി സംഘം വീണ്ടും ബോംബെറിയുകയായിരുന്നു. ബോംബേറിൽ നിന്നും പ്രദേശവാസികളായ ഞരളക്കാട്ട് തുരുത്തേൽ സാജു (54), ജേക്കബ് മാത്യു (54), മഠത്തിൽപ്പറമ്പിൽ കുഞ്ഞച്ചൻ എന്നിവർ അത്ഭുതകരമായി രക്ഷപെടുകയായിരുന്നു.

സംഭവത്തെ തുടർന്നു ഡി വൈ എസ്.പി എ.ജെ തോമസ് , കടുത്തുരുത്തി എസ്.എച്ച്.ഒ രഞ്ജിത്ത് വിശ്വനാഥൻ, എസ്.ഐ ബിബിൻ ചന്ദ്രൻ എന്നിവർ ചേർന്ന് തിരച്ചിൽ നടത്തുകയായിരുന്നു. തുടർന്ന് എ.എസ്.ഐ റജിമോൻ, സീനിയർ സിവിൽ പൊലീസ് ഓഫിസർമാരായ സജി, തുളസി, സിവിൽ പൊലീസ് ഓഫിസർമാരായ പ്രവീൺ , അനൂപ് അരുൺ, സജയൻ എന്നിവർ ചേർന്നാണ് പ്രതികളെ പിടികൂടിയത്. തുടർന്നു പൊലീസ് സംഘം നടത്തിയ പരിശോധനയിലാണ് അക്രമി സംഘാംഗങ്ങളെ തിരിച്ചറിഞ്ഞത്. 

രാത്രിയിൽ തോട്ടിലൂടെ പെരുമ്പാമ്പ് ഒഴുകി വരുന്ന വിവരം അറിയിച്ച വനിതാ ജനപ്രതിനിധിയോട് വനം വകുപ്പ് അധികൃതരുടെ മറുപടി ഇങ്ങനെ : ‘രണ്ടു ചാക്കിലാക്കി കെട്ടി സുരക്ഷിതമായി പിടിച്ചുവയ്ക്കൂ. കുട്ട കൊണ്ടു മൂടി വച്ചാൽ മതി. നാളെ രാവിലെ വന്ന് എടുത്തോളാം !.’പഞ്ചായത്ത് അംഗം കുഞ്ഞൂഞ്ഞമ്മ കുര്യന്റെ നേതൃത്വത്തിൽ നാട്ടുകാർ വനംവകുപ്പ് ഉദ്യോഗസ്ഥർ പറഞ്ഞത് അപ്പടി അനുസരിച്ചു. തോട്ടിലിറങ്ങി പണിപ്പെട്ട് പെരുമ്പാമ്പിനെ ചാക്കിലാക്കി. സ്ഥലത്തിന് അടുത്തു താമസിക്കുന്ന കണിയാംപറമ്പിൽ തമ്പിയുടെ വീടിനുള്ളിൽ രാത്രിയിൽ പാമ്പിനെ സൂക്ഷിച്ചുവച്ചു.

വീട്ടുകാർ പുറത്ത് ഇരുന്നു നേരം വെളുപ്പിച്ചു. നേരം വെളുത്തിട്ടും വനം വകുപ്പ് അധികൃതർ എത്തിയില്ല. തുടർന്ന് മുൻ മുഖ്യമന്ത്രി ഉമ്മൻ ചാണ്ടിയെ നാട്ടുകാർ വിവരം ധരിപ്പിച്ചു. അദ്ദേഹം ഇടപെട്ടതിനെത്തുടർന്ന് ഇന്നലെ രാവിലെ 10നു വനം വകുപ്പ് അധികൃതരെത്തി പാമ്പിനെ കൊണ്ടുപോയി. കൂരോപ്പട പ‍ഞ്ചായത്തിലെ കോത്തല പുതുവയൽ ഭാഗത്ത് കഴിഞ്ഞ ദിവസം രാത്രിയിലാണ് സംഭവം.

ഓട്ടോറിക്ഷ ഡ്രൈവറായ പ്രവീണാണ് രാത്രി 10നു തോട്ടിൽ കൂടി പാമ്പ് ഒഴുകി വരുന്നത് ആദ്യം കണ്ടത്. പാമ്പിനെ കൊണ്ടുപോകാൻ രാവിലെ വനം വകുപ്പ് ഉദ്യോഗസ്ഥർ എത്തിയപ്പോൾ ‘വീടിനുള്ളിൽ പാമ്പിനെ കയറ്റി വച്ചത് എന്തിനാണെന്നായിരുന്നു’ ചോദ്യമെന്നു പഞ്ചായത്ത് അംഗം കുഞ്ഞൂഞ്ഞമ്മ കുര്യൻ പറഞ്ഞു. പാമ്പിനെ പരുക്കേൽക്കാതെ സുരക്ഷിതമായി വയ്ക്കുകയാണ് ചെയ്‌‍തതെന്നു മറുപടി നൽകിയെന്നും പഞ്ചായത്ത് അംഗം.