പുതുമുഖ നടിയെ പീഡിപ്പിച്ച കേസിൽ ദുബായിൽ ഒളിവിൽ കഴിഞ്ഞ പ്രതി വിജയ് ബാബുവിനെ കണ്ടെത്താൻ കൊച്ചി സിറ്റി പൊലീസ് വിദേശ എംബസികളുടെ സഹായം തേടിയിരിക്കുകയാണ്. പാസ്പോർട്ട് റദ്ദാക്കപ്പെടും എന്ന വിവരം വിജയ് ബാബുവിന് ലഭിച്ചിരുന്നു. പിന്നാലെ രണ്ടു ദിവസം മുൻപു തന്നെ ‘ജോർജിയ’യിലേക്കു കടന്നതായി ദുബായിൽ നിന്നു പൊലീസിനു വിവരം ലഭിക്കുകയും ചെയ്തിരുന്നു.

എന്നാൽ പഴയ യുഎസ്എസ്ആറിന്റെ ഭാഗമായിരുന്ന ജോർജിയ എന്ന രാജ്യത്തേക്കാണോ യുഎസിലെ സംസ്ഥാനമായ ജോർജിയയിലേക്കാണോ പോയതെന്നു ഇതുവരെ വ്യക്തമായിട്ടില്ല.

അതേസമയം വിജയ് ബാബുവിന്റെ അടുത്ത ബന്ധു യുഎസിലെ ജോർജിയയിൽ ഉണ്ട്. യുഎസ് സന്ദർശിക്കാനുള്ള വീസയും വിജയ് ബാബുവിന് ഉണ്ടായിരുന്നു എന്നാണ് സൂചന. എന്നാൽ, പാസ്പോർട്ട് റദ്ദാക്കപ്പെട്ടതോടെ തന്നെ ഇപ്പോൾ ഒളിവിൽ കഴിയുന്ന രാജ്യം വിടാൻ കഴിയുന്നതല്ല. വിദേശ എംബസികളുടെ സഹായത്തോടെ വിജയ് ബാബുവിന്റെ ഇതുവരെയുള്ള യാത്രാവിവരങ്ങൾ പരിശോധിച്ചു പ്രതിയെ കണ്ടെത്തി നാട്ടിൽ എത്തിക്കാനാണു പൊലീസിന്റെ നീക്കം എന്നത്.