അരയ്ക്കുതാഴെ തളർന്ന മകനെ പോറ്റാനായി ഒരമ്മയുടെ പോരാട്ടം. കഴിഞ്ഞയാഴ്ച തിരൂരില്‍ നടന്ന 'എന്റെ കേരളം' പ്രദര്‍ശനത്തില്‍ 'മോംസ് ടെസോറി' എന്നൊരു സ്റ്റാള്‍. 'മോംസ് ടെസോറി'യെന്നാല്‍ അമ്മയുടെ നിധിയെന്ന് അര്‍ഥം വരുന്ന സ്റ്റാൾ. ആ വാക്കുകൾ അര്ഥവത്താകും പോലെ ആ സ്റ്റാളില്‍ ഒരു അമ്മ തയ്യാറാക്കിയ അമൂല്യമായ കുറേ രുചിക്കൂട്ടുകള്‍ ഉണ്ടായിരുന്നു -അരയ്ക്കുതാഴെ തളര്‍ന്ന മകന്റെ ജീവിതം തിരിച്ചുപിടിക്കാനുള്ള സംരംഭമായിരുന്നു അത്. സാമ്പാര്‍ പെട്ടെന്ന് ഉണ്ടാക്കാന്‍ സഹായിക്കുന്ന വറുത്തരച്ച തേങ്ങാക്കറി പേസ്റ്റും ചിക്കന്‍കറി പേസ്റ്റുമാണ് സ്റ്റാളിലെ അപൂര്‍വമായ ഇനങ്ങള്‍ എന്നത്.

ആതവനാട് കുറുമ്പത്തൂരിലെ തിയ്യംതിരുത്തി കുമ്പളപ്പറമ്പില്‍ സുനില്‍ചന്ദ്രന്‍ ആരംഭിക്കുന്ന സംരംഭത്തിന്റെ ലോഞ്ച് കൂടിയായിരുന്നു ഈ സ്റ്റാള്‍ എന്നതും ശ്രദ്ധേയം. സുനിലും അമ്മ പ്രമീളയും ചേര്‍ന്ന് വീട്ടില്‍വെച്ചുണ്ടാക്കുന്ന ഉത്പന്നങ്ങളാണ് ഇത്.

വറുത്തരച്ച നാളികേരപേസ്റ്റ് അടിസ്ഥാനമാക്കിയുള്ള ഏതു കറികളും ഇതുകൊണ്ട് ഉണ്ടാക്കാമെന്ന് സുനില്‍ചന്ദ്രന്‍ പറയുകയുണ്ടായി. ഇത് സാധാരണ ഊഷ്മാവില്‍ സൂക്ഷിക്കാനും സാധിക്കും. പൊടി ഉപയോഗിച്ച് കറികളുണ്ടാക്കുന്നതിനേക്കാള്‍ രുചിയുണ്ടാകുമെന്നതും പ്രത്യേകതയാണ് ഇതിനുള്ളത്. ചില്ലുകുപ്പിയില്‍ ഇത്തരം കറിക്കുഴമ്പുകള്‍ വില്‍ക്കുന്ന ആദ്യത്തെ സംരംഭമാണിതെന്ന് സുനില്‍ അവകാശപ്പെടുകയുണ്ടായി.

ചില്ലുകുപ്പിയിലായതിനാല്‍ തന്നെ പ്രിസര്‍വേറ്റീവ്സ് ഇല്ലാതെതന്നെ കേടുകൂടാതെ ആറുമാസം വരെ സൂക്ഷിക്കാനും കഴിയുന്നതാണ്. ഇപ്പോഴിറക്കിയ രണ്ടു കറിക്കുഴമ്പുകള്‍ക്കും 240 ഗ്രാമിന്റെ കുപ്പിക്ക് 190 രൂപയാണ് വില ഈടാക്കുന്നത്. എന്നാൽ കടകളില്‍ 230 രൂപയ്ക്ക് വില്‍ക്കുന്നതാണ്. ഇവയ്ക്ക് ഓര്‍ഡറുകള്‍ കിട്ടിത്തുടങ്ങിയിട്ടുമുണ്ട്. ഇനി വിവിധതരം ചട്ണികള്‍, കടലക്കറി തുടങ്ങിയവയുടെ കറിപേസ്റ്റുകളും ഉടനെ ഇറക്കുന്നതായിരിക്കും.

എന്നാൽ സംരംഭം കൂടുതല്‍ വിപുലപ്പെടുത്തി തളരാതെ മുന്നേറാനാണ് സുനിലിന്റെ പരിപാടി. 2008-ല്‍ ഗള്‍ഫില്‍ വെച്ചുണ്ടായ അപകടത്തില്‍ നട്ടെല്ലിന് ക്ഷതം സംഭവിച്ചാണ് സുനിലിന്റെ അരയ്ക്കുതാഴെ ചലനം നഷ്ടപ്പെട്ടത്. പക്ഷേ, അതിലൊന്നും തളരാതെ ചക്രക്കസേരയിലിരുന്ന് ഒരു ചിരിയോടെ ജീവിതത്തെ നേരിടുകയായിരുന്നു. വ്യവസായവകുപ്പിന്റെ ഒരു ക്ലാസില്‍നിന്നാണ് ബിസിനസ് ചെയ്യാനുള്ള പ്രേരണയുണ്ടാകുന്നത്.