കനത്ത മഴ.... മൂന്ന് വിദ്യാഭ്യാസ സ്ഥാപനങ്ങള്ക്ക് നാളെ അവധി; പത്തനംതിട്ടയില് ദുരിതാശ്വാസ ക്യാമ്പുകള് പ്രവര്ത്തിക്കുന്ന സ്കൂളുകള്ക്കും അവധി
സംസ്ഥാനത്ത് മഴയുടെ തീവ്രത കുറയുമെങ്കിലും ശക്തമായ മഴ തുടരുമെന്നാണ് കാലാവസ്ഥ നിരീക്ഷണകേന്ദ്രത്തിന്റെ അറിയിപ്പ്. തിരുവനന്തപുരം, കൊല്ലം, കാസര്ഗോഡ് ഒഴികെയുള്ള 11 ജില്ലകളില് ഇന്നും 12 ജില്ലകളില് നാളെയും ഓറഞ്ച് അലര്ട്ടുണ്ട്. കേരളത്തിന് മുകളില് അന്തരീക്ഷചുഴിയും മധ്യ ബംഗാള് ഉള്ക്കടലില് ചക്രവാതച്ചുഴിയും നിലനില്ക്കുന്നതാണ് മഴ തുടരാന് കാരണം.
കോട്ടയം, ആലപ്പുഴ, ഇടുക്കി ജില്ലകളിലെ വിദ്യാഭ്യാസ സ്ഥാപനങ്ങള്ക്ക് നാളെ അവധി നല്കിയിട്ടുണ്ട്. തിരുവല്ല താലൂക്കില് പ്രൊഫഷണല് കോളജുകള് ഉള്പ്പെടെയുള്ള വിദ്യാഭ്യാസ സ്ഥാപനങ്ങളും തുറക്കില്ല. പത്തനംതിട്ടയില് ദുരിതാശ്വാസ ക്യാമ്പുകള് പ്രവര്ത്തിക്കുന്ന സ്കൂളുകള്ക്കും അവധി നല്കിയിട്ടുണ്ട്.
ഇടുക്കിയില് മഴ തുടരുന്ന സാഹചര്യത്തില് ജില്ലയിലെ പ്രൊഫഷണല് കോളജുകള് ഉള്പ്പെടെയുള്ള വിദ്യാഭ്യാസ സ്ഥാപനങ്ങള്ക്ക് വ്യാഴാഴ്ച ജില്ലാ കളക്ടര് അവധി പ്രഖ്യാപിച്ചു. മുന്കൂട്ടി നിശ്ചയിച്ച പരീക്ഷകള്ക്കും ഇന്റര്വ്യൂകള്ക്കും മാറ്റമുണ്ടായിരിക്കില്ല.
മലയോരമേഖലയില് അപകടസാധ്യത നിലനില്ക്കുന്നതിനാല് കൂടുതല് ജാഗ്രത വേണം. കടലില് പോകുന്നതിന് മത്സ്യത്തൊഴിലാളികള്ക്ക് ഏര്പ്പെടുത്തിയ കര്ശനവിലക്കും തുടരുകയാണ്. മഴക്കെടുതികള് രൂക്ഷമായതോടെ സംസ്ഥാനത്ത് കൂടുതല് ദുരിതാശ്വാസക്യാമ്പുകള് തുറന്നു.
വൈദ്യുതിവകുപ്പിന്റെ ആറ് ഡാമുകളില് റെഡ് അലര്ട്ട് തുടരുന്നുണ്ടെങ്കിലും ഭയപ്പെടേണ്ട സാഹചര്യമില്ലെന്ന് മന്ത്രി കെ. കൃഷ്ണന് കുട്ടി പറഞ്ഞു.
https://www.facebook.com/Malayalivartha
