കുട്ടികളെ ഉപയോഗിച്ച് ഭിക്ഷാടനം നടത്തിയ പൂന്തുറ ബാല ഭിക്ഷാടന കേസില്‍ പ്രതികളായ 5 കര്‍ണ്ണാടക സ്വദേശിനികളെ പിടികിട്ടാപ്പുള്ളികളായി കോടതി പ്രഖ്യാപിച്ചു. പ്രതികളെ അറസ്റ്റ് ചെയ്യാന്‍ അറസ്റ്റുവാറണ്ടും സ്ഥാവരജംഗമ സ്വത്തുക്കള്‍ ജപ്തി ചെയ്യാന്‍ വില്ലേജാഫീസര്‍മാര്‍ക്ക് ജപ്തി വാറണ്ടും കോടതി പുറപ്പെടുവിച്ചു.

തിരുവനന്തപുരം അഞ്ചാം ജുഡീഷ്യല്‍ ഫസ്റ്റ് ക്ലാസ്സ് കോടതിയുടേതാണുത്തരവ്. നവംബര്‍ 19 ന് പ്രതികളെ ഹാജരാക്കാന്‍ പൂന്തുറ പോലീസ് സര്‍ക്കിള്‍ ഇന്‍സ്‌പെക്ടറോട് മജിസ്‌ട്രേട്ട് അശ്വതി. പി.നായര്‍ ഉത്തരവിട്ടു.

1 മുതല്‍ 5 വരെ പ്രതികളായ കര്‍ണ്ണാകെ മൈസൂര്‍ ജില്ലയില്‍ ഹന്‍സൂര്‍ താലൂക്കില്‍ ഹനഗോഡ് ക്രഹഗ്ലി മാഗ്ലൂര്‍ മലയില്‍ താമസം ശാന്ത മകള്‍ സുശീല (27/2014) , മൈസൂര്‍ ബന്ദരപ്പന്‍ കവല 112 ല്‍ താമസക്കാരായ ശിവജി മകള്‍ രാധ (28) , ബാബു മകള്‍ ശോഭ (30) , മഞ്ജുനാഥ് മകള്‍ മഞ്ജുള (18) , പ്രകാശ് മാള്‍ പുലാബായി (25) എന്നിവരെയാണ് അറസ്റ്റ് ചെയ്യേണ്ടത്.


2014 ജൂലൈ 8 ന് പൂന്തുറ സെന്റ്.തോമസ് പള്ളിക്കു മുന്‍വശം പബ്ലിക് റോഡിലാണ് സംഭവം നടന്നത്. 5 വയസ്സുള്ള അശ്വതി , 10 മാസം പ്രായമായ പൂജ , 4 വയസ്സുള്ള . അരുണ്‍ എന്നിവരുമായി നാലുദിവസം കൊണ്ട് സ്ഥലത്ത് തങ്ങി ഭിക്ഷാടനം നടത്തുകയായിരുന്നു.ഇവരില്‍ നിന്ന് ഭിക്ഷാടനത്തിലൂടെ ലഭിച്ച കറന്‍സി നോട്ടുകളും നാണയങ്ങളും ഉള്‍പ്പെടെ 1,012 രൂപയും പോലിസ് പിടിച്ചെടുത്തിരുന്നു.