കര്‍ക്കടക മാസ പൂജകള്‍ക്കായി ശബരിമലനട 16ന് വൈകുന്നേരം 5ന് തുറക്കും. തന്ത്രി കണ്ഠരര് രാജീവരരുടെ മുഖ്യ കാര്‍മ്മികത്വത്തില്‍ മേല്‍ശാന്തി കെ.ജയരാമന്‍ നമ്പൂതിരി നടതുറന്ന് ദീപം തെളിച്ചശേഷം അയ്യപ്പനെ ധ്യാനനിദ്രയില്‍ നിന്നുണര്‍ത്തും.

മേല്‍ശാന്തി പതിനെട്ടാം പടിയിറങ്ങി താഴെ തിരുമുറ്റത്തെ ഹോമകുണ്ഡത്തില്‍ അഗ്നിപകരും. ഇതിനുശേഷം തീര്‍ത്ഥാടകരെ പതിനെട്ടാംപടി ചവിട്ടാനായി അനുവദിക്കും. മാളികപ്പുറം മേല്‍ശാന്തി വി.ഹരികൃഷ്ണന്‍ നമ്പൂതിരി മാളികപ്പുറം ക്ഷേത്രനട തുറക്കും. 17 മുതലാണ് കര്‍ക്കടക മാസ പൂജകള്‍ ആരംഭിക്കുന്നത്.

വാവുബലി ദിനമായ 17ന് പുലര്‍ച്ചെ പമ്പയില്‍ പിതൃതര്‍പ്പണം ആരംഭിക്കും. പമ്പയിലെ ത്രിവേണി സംഗമത്തില്‍ ബലിതര്‍പ്പണം നടത്തുന്നത് പുണ്യമായാണ് വിശ്വാസികള്‍ കരുതുന്നത്.

വനവാസ കാലത്ത് ശ്രീരാമചന്ദ്രന്‍ പിതാവ് ദശരഥ മഹാരാജാവിന്റെ മരണവാര്‍ത്ത അറിയുന്നത് പമ്പയുടെ തീരത്തുവച്ചാണ്. പിതാവിനുവേണ്ടി ശ്രീരാമന്‍ ബലികര്‍മ്മങ്ങള്‍ നടത്തിയത് പമ്പാ ത്രിവേണി സംഗമത്തിലാണ്. ഇവിടെ സ്ത്രീകള്‍ ഉള്‍പ്പടെയുളളവര്‍ ബലിതര്‍പ്പണത്തിന് എത്താറുണ്ട്. ഇവര്‍ക്കായി ദേവസ്വം ബോര്‍ഡ് ഇക്കുറി പ്രത്യേക ക്രമീകരണങ്ങള്‍ ഏര്‍പ്പെടുത്തി. കര്‍ക്കടക മാസ പൂജകള്‍ പൂര്‍ത്തിയാക്കി 21ന് രാത്രി 10ന് നടയടയ്ക്കുന്നതാണ്.