മലയാളം നിര്ബന്ധിത ഒന്നാം ഭാഷയാക്കാനുള്ള തീരുമാനം: കര്ണാടകയുടെ ആശങ്കകള് അടിസ്ഥാനരഹിതമെന്ന് മുഖ്യമന്ത്രി
സംസ്ഥാനത്തെ വിദ്യാലയങ്ങളില് മലയാളം നിര്ബന്ധിത ഒന്നാം ഭാഷയാക്കാനുള്ള തീരുമാനത്തില് കര്ണാടക സര്ക്കാര് പ്രകടിപ്പിച്ച ആശങ്കകള് അടിസ്ഥാനരഹിതമാണെന്ന് മുഖ്യമന്ത്രി പിണറായി വിജയന്. കര്ണാടക മുഖ്യമന്ത്രി സിദ്ധരാമയ്യക്ക് അയച്ച മറുപടി കത്തിലാണ് മുഖ്യമന്ത്രി ഇക്കാര്യം വ്യക്തമാക്കിയത്. ഭാഷാ ന്യൂനപക്ഷങ്ങളുടെ ഭരണഘടനാപരമായ അവകാശങ്ങള് ലംഘിക്കുന്ന തരത്തിലുള്ള യാതൊരു വ്യവസ്ഥയും നിയമത്തിലില്ലെന്ന് അദ്ദേഹം ചൂണ്ടിക്കാട്ടി.
കന്നഡ മീഡിയം സ്കൂളുകളില് മലയാളം അടിച്ചേല്പ്പിക്കുന്നു എന്ന പരാതിക്ക് അടിസ്ഥാനമില്ല. മലയാളം ഒന്നാം ഭാഷയാക്കുമെന്ന് നിയമത്തില് പറയുന്നുണ്ടെങ്കിലും, മാതൃഭാഷ മലയാളമല്ലാത്ത കുട്ടികള്ക്ക് ആ ഭാഷയോടൊപ്പം മലയാളം പഠിക്കാനുള്ള അവസരമാണ് നല്കുന്നത്. ദേശീയ പാഠ്യപദ്ധതി പ്രകാരം വിദ്യാര്ത്ഥികള്ക്ക് ഇഷ്ടമുള്ള ഭാഷ തിരഞ്ഞെടുക്കാമെന്നും, ഇതര സംസ്ഥാനങ്ങളില് നിന്നോ വിദേശങ്ങളില് നിന്നോ എത്തുന്നവര്ക്ക് പത്താം ക്ലാസിലും ഹയര് സെക്കന്ഡറി തലത്തിലും മലയാളം പരീക്ഷ നിര്ബന്ധമല്ലെന്നും മുഖ്യമന്ത്രി വിശദീകരിച്ചു.
ഭാഷാ ന്യൂനപക്ഷങ്ങള്ക്ക് സര്ക്കാര് ഓഫിസുകളുമായുള്ള കത്തിടപാടുകള്ക്ക് തമിഴ്, കന്നഡ ഭാഷകള് ഉപയോഗിക്കാന് അനുവാദമുണ്ട്. ഇത്തരം കത്തുകള്ക്ക് അതത് ഭാഷകളില് തന്നെ മറുപടി നല്കാന് നിയമം വ്യവസ്ഥ ചെയ്യുന്നു. മാതൃഭാഷയോടുള്ള സ്നേഹം മറ്റ് ഭാഷകളെ പ്രോത്സാഹിപ്പിക്കുന്നതിന് തടസമല്ല.
കേരളവും കര്ണാടകയും തമ്മിലുള്ള സാംസ്കാരിക ബന്ധവും സഹകരണ ഫെഡറലിസവും ഉയര്ത്തിപ്പിടിച്ചാണ് പ്രസ്തുത നിയമനിര്മ്മാണം നടത്തിയത്. ജനങ്ങളുടെ ഭരണഘടനാപരമായ അവകാശങ്ങള് സംരക്ഷിക്കാനുള്ള നിയമസഭയുടെ കടമയാണ് കേരള സര്ക്കാര് നിര്വഹിക്കുന്നതെന്നും മുഖ്യമന്ത്രി കത്തില് വ്യക്തമാക്കി.
https://www.facebook.com/Malayalivartha
