ടോംജോസിനും ജേക്കബ് തോമസിനും ഇടയില്‍ പിണറായി ഞെരുഞ്ഞുന്നു. കെ.എം.എം.എല്‍. മഗ്‌നീഷ്യം അഴിമതി കേസില്‍ അഡീ. ചീഫ് സെക്രട്ടറി ടോം ജോസിനെ സസ്‌പെന്‍ഡ് ചെയ്യാന്‍ വിജിലന്‍സ് ഡയറക്ടര്‍ ജേക്കബ് തോമസ് നല്‍കിയ ശിപാര്‍ശയിന്മേല്‍ തീരുമാനമായില്ല. ജേക്കബ് തോമസിന്റെ റിപ്പോര്‍ട്ടിന്റെ അടിസ്ഥാനത്തില്‍ ഉടന്‍ തീരുമാനമെടുക്കാന്‍ സര്‍ക്കാര്‍ തയാറാവില്ലെന്നാണു സൂചന. മുഖ്യമന്ത്രിയുടെ അഭിപ്രായം ഇക്കാര്യത്തില്‍ തേടാനാണ് ചീഫ് സെക്രട്ടറി എസ്.എം. വിജയാനന്ദിന്റെ തീരുമാനം. ജേക്കബ് തോമസ് നല്‍കിയ ശിപാര്‍ശയുടെ എല്ലാവശങ്ങളും പരിശോധിച്ചുമാത്രമേ തീരുമാനമെടുക്കുകയുളളൂവെന്നു ചീഫ് സെക്രട്ടറി എസ്.എം. വിജയാനന്ദ് പറഞ്ഞു. അഡീ. ചീഫ് സെക്രട്ടറി തലത്തിലുളള ഒരു ഉദ്യോഗസ്ഥനെതിരേ എടുത്തുചാടി തീരുമാനമെടുക്കേണ്ടതില്ലെന്നാണു സര്‍ക്കാര്‍ നിലപാട്. ഐ.എ.എസ്. അസോസിയേഷന്‍ പ്രസിഡന്റുകൂടിയാണ് ടോംജോസ് എന്നതും ബന്ധപ്പെട്ടവര്‍ കണക്കിലെടുക്കുന്നുണ്ട്. അതേസമയം വരവില്‍ കവിഞ്ഞ സ്വത്ത് സമ്പാദിച്ചെന്ന കേസില്‍ ടോം ജോസിനെ സര്‍വീസില്‍ നിന്ന് സസ്‌പെന്‍ഡ് ചെയ്യണമെന്ന മറ്റൊരു ശിപാര്‍ശയും വിജിലന്‍സ് ഡയറക്ടര്‍ ചൊവ്വാഴ്ച സര്‍ക്കാരിന് കൈമാറും. ഒരു കേസില്‍നിന്ന് ടോംജോസിനെ ഒഴിവാക്കിയാലും മറ്റൊരു കേസില്‍ സസ്‌പെന്‍ഷന്‍ ഉറപ്പാക്കാനാണു വിജിലന്‍സ് ഡയറക്ടറുടെ നീക്കം. മഗ്‌നിഷ്യം ക്രമക്കേടുമായി ബന്ധപ്പെട്ട് ടോം ജോസ് അടക്കം ഒന്‍പതുപേര്‍ക്കെതിരേ വിജിലന്‍സ് കേസെടുത്തിരുന്നു. 2012, 2014 ല്‍ നടന്ന ഇടപാടില്‍ 1.21 കോടി രൂപയുടെ നഷ്ടമുണ്ടായെന്നു വിജിലന്‍സ് റിപ്പോര്‍ട്ടില്‍ ചൂണ്ടിക്കാണിച്ചിട്ടുണ്ട്. മഗ്‌നീഷ്യം ടണ്ണിന് 1.87 കോടി രൂപയ്ക്കാണ് വാങ്ങിയത്. രാജ്യാന്തര ടെണ്ടര്‍ വിളിച്ചതില്‍ അഴിമതി നടന്നുവെന്നാണു വിജിലന്‍സ് കണ്ടെത്തല്‍.