ദുരൂഹസാചര്യത്തില്‍ മരിച്ച വിദേശവനിത ലിഗയുടെ മൃതദേഹം സംബന്ധിച്ച പരിശോധനാഫലങ്ങള്‍ ഇന്ന് ലഭിക്കും. പോസ്റ്റുമാര്‍ട്ടം റിപ്പോര്‍ട്ടും ഡിഎന്‍എ പരിശോധനാഫലവുമാണ് ഇന്ന് പുറത്തു വരിക. ശാസ്ത്രീയ പരിശോധനാ ഫലത്തിലൂടെ ദുരൂഹത പരിഹരിക്കാമെന്ന വിശ്വാസത്തിലാണ് ലിഗയുടെ സഹോദരിയും ഭര്‍ത്താവും.

ഇവര്‍ ഇന്ന് കേരളാമുഖ്യമന്ത്രി പിണറായി വിജയനെ സന്ദര്‍ശിച്ചേക്കുമെന്നും സൂചനയുണ്ട്. ഇന്നലെ ലിഗയുടെ സഹോദരി എല്‍സിയും ഭര്‍ത്താവ് ആന്‍ഡ്രൂസും വാര്‍ത്താസമ്മേളനം വിളിച്ചിരുന്നു. പോലീസിന്റെ ആദ്യത്തെ അന്വേഷണത്തില്‍ മതിപ്പില്ലെങ്കിലും പുതിയ അന്വേഷണ സംഘത്തില്‍ വിശ്വാസമുണ്ടെന്നും സഹോദരി എല്‍സി പറഞ്ഞു. വരാപ്പുഴ കസ്റ്റഡി മരണത്തിന് പിന്നാലെ വിദേശ വനിതയുടെ മരണത്തില്‍ കുടുംബം തന്നെ ദുരൂഹത ആരോപിച്ച് രംഗത്ത് വന്നതോടെ പോലീസ് അധികൃതര്‍ സമ്മര്‍ദ്ദത്തിലായിട്ടുണ്ട്.

ഫോറന്‍സിക് ഫലങ്ങള്‍ വരും മുമ്പ് തന്നെ അന്വേഷണം തുടങ്ങിയിരിക്കുന്ന പോലീസ് മൃതദേഹം കണ്ടെത്തിയ വാഴമുട്ടം കേന്ദ്രീകരിച്ച് പതിവായി ഇവിടേയ്ക്ക് എത്തുന്നവര്‍ ആരെല്ലാമാണെന്ന അന്വേഷണം പോലീസ് തുടങ്ങിയിട്ടുണ്ട്. ലിഗയുടെ മൃതദേഹം കണ്ടെത്തിയ സ്ഥലത്തേക്കു അവര്‍ക്ക് ഒറ്റയ്ക്ക് എത്തിപ്പെടാനാകില്ല.

കോവളം ബീച്ചിനെക്കുറിച്ചു കേട്ടുകേള്‍വിപോലുമില്ലാത്ത അവര്‍ എങ്ങനെ ആറുകിലോമീറ്ററനപ്പുറം എത്തിയെന്നതിനെക്കുറിച്ചു അന്വേഷണം വേണം. അതോ മറ്റാരെങ്കിലും അങ്ങോട്ടേക്ക് എത്തിച്ചതാണോ എന്നും അന്വേഷിക്കണമെന്നും ഈ പ്രദേശത്ത് മുമ്പും മരണങ്ങള്‍ നടന്നിട്ടുണ്ടെന്നും പറഞ്ഞു. മൃതദേഹത്തില്‍നിന്ന് കണ്ടെത്തിയ ജാക്കറ്റ് ലിഗയുടേതല്ല.

ആവശ്യത്തിന് പണം കൈയിലില്ലാത്ത ലിഗ എങ്ങനെ പുതിയ ജാക്കറ്റ് വാങ്ങുമെന്നും ഇല്‍സി ചോദിക്കുന്നു. സഹോദരിയുടേതു അസ്വാഭാവികമരണമാണെന്നും ഈ ദുരനുഭവം മറ്റൊരാള്‍ക്കും ഉണ്ടാകരുതെന്ന വാശിയിലാണു താന്‍ പോരാട്ടത്തിനിറങ്ങുന്നതെന്നും അവര്‍ പറഞ്ഞു. സംശയാസ്പദമായ സാഹചര്യം തോന്നിയാല്‍ ലിഗയുടെ മൃതദേഹം ലാത്വിയയിലെത്തിച്ചു വിശദപരിശോധന നടത്തുമെന്നു സഹോദരി പറഞ്ഞു. മരണത്തെക്കുറിച്ചു ഉന്നതതല അന്വേഷണത്തിനു ഉത്തരവിട്ട ഡി.ജി.പിയുടെ തീരുമാനം സ്വാഗതം ചെയ്യുന്നു. എന്നാല്‍, മരണം ആത്മഹത്യയാക്കുകയാണെങ്കില്‍ പുനര്‍പോസ്റ്റ്‌മോര്‍ട്ടം ആവശ്യപ്പെടും.