ഡൊണാള്‍ഡ് ട്രംപിനെ മറികടന്ന് അമേരിക്കന്‍ പ്രസിഡന്റായി തിരഞ്ഞെടുക്കപ്പെട്ട ജോ ബെെഡന് ആശംസകളുമായി നിരവധിപേരാണ് രംഗത്ത് എത്തുന്നത്. പുതിയ പ്രതീക്ഷകളുമായി അമേരിക്കയും ലോകരാഷ്ട്രങ്ങളും മുന്നോട്ട് പോകുമ്പോൾ അമേരിക്കൻ പ്രസിഡന്റ് ജോ ബൈഡന്‍ ഒരു വർഷത്തിലധികം ഭരണത്തിൽ ഉണ്ടാകില്ലെന്ന് നടി കങ്കണ റണൗട്ട് വ്യക്തമാക്കുകയുണ്ടായി. ഏറെ ഞെട്ടലോടെയാണ് ഏവരും ഇത് ശ്രവിച്ചത്. അതേസമയം അമേരിക്കയിലെ രണ്ടാമത്തെ ഉയർന്ന സ്ഥാനത്തെത്തുന്ന ചരിത്രത്തിലെ ആദ്യ വനിതയെന്ന നിലയിൽ കമലയുടെ വിജയത്തെ അഭിനന്ദിക്കുകയും അംഗീകരിക്കുകയും ചെയ്തു. എന്നാൽ ജോ ബൈഡൻ തെരഞ്ഞെടുക്കപ്പെട്ടതിൽ അതൃപ്തിയാണ് നടി രേഖപ്പെടുത്തിയത്.

അമേരിക്കയുടെ ഭാവിയെ കുറിച്ച് ട്വിറ്ററിലൂടെയാണ് കങ്കണയുടെ ഇത്തരത്തിലുള്ള പ്രവചനം. ‘ഓരോ 5 മിനിറ്റിലും ഡാറ്റ തകരാറിലാകുന്ന 'ഗജിനി' ബൈഡനെക്കുറിച്ച് ഒരുറപ്പുമില്ല, അവർ അദ്ദേഹത്തിൽ കുത്തിവച്ച എല്ലാ മരുന്നുകളും ഒരു വർഷത്തിൽ കൂടുതൽ നീണ്ടുനിൽക്കില്ല, വ്യക്തമായും കമല ഹാരിസ് തന്നെ ഈ ഷോ നയിക്കും. ഒരു സ്ത്രീ ഉയരുമ്പോൾ അവൾ ഓരോ സ്ത്രീക്കും വഴിയൊരുക്കുന്നു. ചരിത്രപരമായ ഈ ദിനത്തിലേക്ക് ആശംസകൾ'.- എന്നാണ് കങ്കണ ട്വിറ്ററിൽ കുറിച്ചത്. കമലയുടെ പ്രസംഗത്തിന്റെ വിഡിയോയ്ക്കൊപ്പമാണ് കങ്കണയുടെ ഇത്തരത്തിലുള്ള ട്വീറ്റ്.

എന്നാൽ ട്വീറ്റിൽ കങ്കണയെ വിമർശിച്ചും അനുകൂലിച്ചും നിരവധി ആളുകൾ രംഗത്തുവന്നു. ബൈഡനെപ്പോലെ ബഹുമാനിക്കപ്പെടുന്ന ഒരു വ്യക്തിയെ ഇത്തരത്തില്‍ നിന്ദിക്കരുതെന്ന് പലരും ചൂണ്ടിക്കാട്ടുകയുണ്ടായി.