സിനിമസീരിയല്‍ താരവും റിയാലിറ്റി ഷോ ഫെയിമുമായ ഷിയാസ് കരീമിനെതിരെ ഗുരുതര ആരോപണങ്ങളുമായി യുവതി. വിവാഹ വാഗ്ദാനം നല്‍കി പീഡിപ്പിച്ചെന്നും പലപ്പോഴായി 49 ലക്ഷത്തോളം രൂപ തട്ടിയെടുത്തെന്നുമാണ് കൊച്ചിയില്‍ താമസിക്കുന്ന ബിസിനസുകാരിയായ യുവതി പാലാരിവട്ടം പോലീസില്‍ പരാതി നല്‍കിയിരിക്കുന്നത്. പരാതിയില്‍ പോലീസ് പ്രാഥമിക അന്വേഷണം ആരംഭിച്ചു.

2023 ജൂണില്‍ സോഷ്യല്‍ മീഡിയ വഴിയാണ് ഷിയാസ് കരീമിനെ പരിചയപ്പെട്ടതെന്ന് യുവതി പരാതിയില്‍ പറയുന്നു. സൗഹൃദം വളര്‍ന്നതോടെ 2024ല്‍ ഇരുവരും ലിവിങ് റിലേഷനിലായി. ഈ കാലയളവില്‍ പലപ്പോഴായി പത്തു ലക്ഷം രൂപ കൈക്കലാക്കി. പിന്നീട് യുവതിയുടെ കുടുംബസ്വത്ത് വിറ്റ വിവരം അറിഞ്ഞതോടെ, ജിം തുടങ്ങാനെന്ന പേരില്‍ 22 ലക്ഷം രൂപ കൂടി വാങ്ങി. ജിമ്മില്‍ പങ്കാളിയാക്കാമെന്നും ആജീവനാന്തം ഒപ്പം നിര്‍ത്താമെന്നും വാഗ്ദാനം നല്‍കിയാണ് തുക കൈക്കലാക്കിയതെന്നും പരാതിയില്‍ വ്യക്തമാക്കുന്നു.

ആരോഗ്യപ്രശ്‌നങ്ങള്‍ മൂലം തന്റെ ഗര്‍ഭപാത്രം നീക്കം ചെയ്തതോടെ ഷിയാസിന്റെ നിലപാടില്‍ മാറ്റം വന്നതായി യുവതി ആരോപിക്കുന്നു. തനിക്ക് മറ്റൊരു വിവാഹം കഴിക്കണമെന്ന് ആവശ്യപ്പെട്ട ഷിയാസ്, പിന്നീട് വിവാഹ വസ്ത്രങ്ങള്‍ വാങ്ങാനും സല്‍ക്കാരത്തിനുമായി യുവതിയില്‍ നിന്ന് വീണ്ടും പണം വാങ്ങി. എന്നാല്‍ വിവാഹശേഷവും താനുമായുള്ള ബന്ധം തുടര്‍ന്നെന്നും കൊച്ചിയിലെയും കോഴിക്കോട്ടെയും വിവിധ ഹോട്ടലുകളില്‍ എത്തിച്ച് പീഡനത്തിന് ഇരയാക്കിയെന്നും യുവതി ആരോപിച്ചു. ഒടുവില്‍ ബന്ധത്തില്‍ നിന്ന് പിന്മാറാന്‍ ശ്രമിച്ചപ്പോള്‍ നഗ്‌നചിത്രങ്ങള്‍ പ്രചരിപ്പിക്കുമെന്ന് ഭീഷണിപ്പെടുത്തി വീണ്ടും പണം തട്ടിയതായും യുവതി പോലീസിനോട് പറഞ്ഞു.

യുവതിയുടെ പരാതി അടിസ്ഥാനരഹിതമാണെന്നാണ് ഷിയാസ് കരീമിന്റെ പ്രതികരണം. യുവതി തന്നില്‍ നിന്ന് പലതവണ പണം വാങ്ങിയിട്ടുണ്ടെന്നും, ഈ തുക തിരികെ ചോദിച്ചപ്പോള്‍ കേസില്‍ കുടുക്കുമെന്ന് ഭീഷണിപ്പെടുത്തുകയായിരുന്നു എന്നുമാണ് ഷിയാസ് പറയുന്നത്. സംഭവത്തില്‍ യുവതിക്കെതിരെ ഷിയാസ് കരീം പെരുമ്പാവൂര്‍ പോലീസില്‍ പരാതി നല്‍കിയിട്ടുണ്ട്.