മധ്യപ്രദേശില്‍ പഴയ ദുരാചാരത്തിന്‍റെ ഭാഗമായി 50,000 രൂപക്ക്​ ഭാര്യയെ വില്‍ക്കാന്‍ ശ്രമിച്ച്‌​ ഭര്‍ത്താവ്​. വിസമ്മതിച്ചതോടെ ഭര്‍ത്താവും ഭര്‍തൃവീട്ടുകാരും ​ചേർന്ന് കിണറ്റിലെറിഞ്ഞ ലദോബായ് എന്ന യുവതിയെ ​വാച്ച്‌​മാന്‍ രക്ഷപ്പെടുത്തി. രാജസ്​ഥാനുമായി അതിര്‍ത്തി പങ്കിടുന്ന രാജ്​ഗഡിലെ ഗുണയിലാണ്​ സംഭവം. പഴയ ദുരാചാരമായ ജഗ്​ധ പ്രദയുടെ പേരിലായിരുന്നു അതിക്രമം. ഭാര്യയും ഭര്‍ത്താവും വഴക്കു​കൂടുമ്പോൾ ഭാര്യയെ വില്‍ക്കുന്നതാണ്​ ജഗ്​ധ പ്രദ.

കുടുംബത്തി​ന്‍റെ സമ്മതത്തോടെ 50,000 രൂപക്ക്​ ഭാ​ര്യ ലദോബായ്​യെ വില്‍ക്കാന്‍ ശ്രമിച്ചതായി ഭര്‍ത്താവ്​​ ഗോപാല്‍ ഗുര്‍ജാര്‍ പൊലീസിനോട്​ സമ്മതിച്ചു. 50,000 രൂപ ഇയാള്‍ കൈപ്പറ്റുകയും ചെയ്​തു. തുടര്‍ന്ന്​, പണം നല്‍കിയ​വര്‍ക്കൊപ്പം പോകാന്‍ യുവതിയെ ഭര്‍ത്താവും കുടുംബവും നിര്‍ബന്ധിക്കുകയായിരുന്നു.

ഇതിന്​ വിസമ്മതിക്കുകയും വഴക്കുണ്ടാക്കുകയും ചെയ്​തതോടെ കുടുംബം യുവതിയെ കിണറ്റിലെറിയുകയായിരുന്നു. സംഭവം ശ്രദ്ധയില്‍പ്പെട്ട ഉടന്‍ ഗ്രാമത്തിലെ കാവല്‍ക്കാരന്‍ സ്​ഥലത്തെത്തുകയും ഗ്രാമവാസികളുടെ സഹായത്തോടെ യുവതിയെ കരയ്​ക്ക്​ കയറ്റുകയുമായിരുന്നു.

വീട്ടില്‍ മൂന്നുപേര്‍ വന്നിരുന്നതായും ഞായറാഴ്ച​ ഗോപാല്‍ ഗുര്‍ജാറുമായി കരാര്‍ ഉറപ്പിച്ചതായും ലദോബായ്​ പൊലീസിനോട്​ പറഞ്ഞു. തുടര്‍ന്ന്​ അവര്‍ക്കൊപ്പം പോകാന്‍ താന്‍ വിസമ്മതിച്ചു. അടുത്ത ദിവസം, തിങ്കളാഴ്ച രാവിലെയും അവര്‍ക്കൊപ്പം പോകാന്‍ തന്നെ നിര്‍ബന്ധിച്ചു.

തുടര്‍ന്ന്​ ഭര്‍തൃമാതാവ്​ രമതി ബായ്​​യും ഭര്‍ത്താവ്​ ഗോപാലും തന്നെ തൊട്ടടുത്ത കിണറ്റിലെറിയുകയായിരുന്നു. തുടര്‍ന്ന്​ കാവല്‍ക്കാരനെത്തി തന്നെ രക്ഷപ്പെടുത്തി -യുവതി പറഞ്ഞു.​ സംഭവം അറിഞ്ഞതോടെ​ യുവതി​യുടെ പിതാവ്​ നാരായന്‍ ഗുര്‍ജാര്‍ മകളുടെ അടുത്തെത്തുകയും പൊലീസില്‍ പരാതി നല്‍കുകയുമായിരുന്നു. പൊലീസെത്തി​യതോടെ യുവതിയെ വാങ്ങാന്‍ എത്തിയവര്‍ ഓടി രക്ഷപ്പെട്ടു.