അമിത് ഷായുടെ ആ വമ്പന്‍ നിര്‍ദ്ദേശം.... നടപ്പിലാക്കാന്‍ ഒരുങ്ങി  അസം.. ശ്രദ്ധയോടെ വീക്ഷിച്ച് രാജ്യം...മയക്കുമരുന്ന്, മനുഷ്യക്കടത്ത്, കന്നുകാലി കടത്ത് എന്നിവയ്ക്കെതിരായ നടപടി കര്‍ശനമാക്കാനൊരുങ്ങുകയാണ് അസം. കേന്ദ്ര ആഭ്യന്ത്രര മന്ത്രി അമിത് ഷാ ഇക്കാര്യങ്ങളില്‍ കര്‍ശന നടപടി സ്വീകരിക്കാന്‍ നിര്‍ദ്ദേശിച്ചതായി മുഖ്യമന്ത്രി ഹിമന്ത ബിശ്വ ശര്‍മ്മ അറിയിച്ചു. ബജറ്റ് സെഷനില്‍ പ്രതിപക്ഷ ചോദ്യങ്ങള്‍ക്ക് മറുപടി പറയുകയായിരുന്നു ഹിമന്ത.

എല്ലാ സംസ്ഥാനങ്ങളും ഇത്തരം നിയമ വിരുദ്ധ പ്രവര്‍ത്തനങ്ങള്‍ക്കെതിരെ ഒരുമിച്ച് പോരാടണമെന്നും ഹിമന്ത ആവശ്യപ്പെടുകയുണ്ടായി . സംസ്ഥാന സര്‍ക്കാര്‍ ലഹരി ഉപയോഗങ്ങള്‍ക്കെതിരെ അധികാരമേറ്റനാള്‍ മുതല്‍ നടപടികള്‍ സ്വീകരിച്ചു തുടങ്ങിയിരുന്നു. മെയ് 10നാണ് ഹിമന്ത ബിശ്വ ശര്‍മ്മ അസമില്‍ മുഖ്യമന്ത്രിയായി ചുമതലയേറ്റത്.

മെയ് മാസത്തില്‍ മാത്രം സംസ്ഥാനത്ത് നിന്ന് പോലീസ് 2,439 ഗ്രാം ഹെറോയിന്‍, 91 കിലോ കഞ്ചാവ്, 17,551 കുപ്പി സിറപ്പ്, 1.57 ലക്ഷം ലഹരി ഗുളികകള്‍, 14.16 ഗ്രാം മോര്‍ഫിന്‍ തുടങ്ങിയവ പിടിച്ചെടുത്തിട്ടുണ്ട്. കൂടാതെ ലഹരി ഇടപാടിലൂടെ ലഭിച്ച 10.5 ലക്ഷം രൂപയും പോലീസ് കണ്ടെടുത്തിട്ടുണ്ടെന്ന് അദ്ദേഹം പറഞ്ഞു .

കഴിഞ്ഞ രണ്ട് മാസത്തിനിടെ അനധികൃത മയക്കുമരുന്ന് വ്യാപാരത്തില്‍ ഏര്‍പ്പെട്ട 1,897 പേരെയാണ് അറസ്റ്റ് ചെയ്തത്. 1,100ല്‍ അധികം കേസുകള്‍ രജിസ്റ്റര്‍ ചെയ്തിട്ടുണ്ടെന്നും മുഖ്യമന്ത്രി പറഞ്ഞു . പിടിച്ചെടുത്ത ലഹരിവസ്തുക്കള്‍ കത്തിച്ച് കളയാനാണ് സര്‍ക്കാര്‍ തീരുമാനം. ജൂലൈ 17, 18 തീയതികളില്‍ ഇത് നടപ്പാക്കും. ഭീകര സംഘടനകളും അവരുടെ നേതാക്കളും മയക്കുമരുന്ന് വ്യാപാരത്തില്‍ പങ്കാളികളാണ്. ലഹരി വിരുദ്ധ പ്രവര്‍ത്തനങ്ങളില്‍ ചില രാഷ്ട്രീയ പാര്‍ട്ടികള്‍ പോലീസിനെ നിരാശപ്പെടുത്താന്‍ ശ്രമിക്കുകയാണെന്നും അദ്ദേഹം വ്യക്തമാക്കി .

അതേസമയം ലഹരി കടത്ത് തീവ്രവാദം രാജ്യത്തിന് പുതിയ ഭീഷണിയാണെന്ന് കേന്ദ്ര ആഭ്യന്തരമന്ത്രി അമിത് ഷാ പറഞ്ഞു . ഗുജറാത്തിലെ ഗാന്ധിനഗറിലെ നാഷണല്‍ ഫോറന്‍സിക് സയന്‍സസ് സര്‍വ്വകലാശാലയില്‍ തുടങ്ങിയ നാര്‍ക്കോട്ടിക് ഡ്രഗ്സ് ആന്‍ഡ് സൈക്കോട്രോപ്പിക് സബ്സ്റ്റന്‍സസ് റിസര്‍ച്ച് അനാലിസിസ് സെന്റര്‍ ഓഫ് എക്സ് ലന്‍സ് ഉദ്ഘാടനം ചെയ്യവേയാണ് രാജ്യം നേരിടുന്ന പുതിയ ഭീഷണിയെക്കുറിച്ച് അമിത് ഷാ പറഞ്ഞത് .

അടുത്തിടെയായി രാജ്യത്തേക്ക് ലഹരി കടത്ത് വര്‍ദ്ധിച്ചുവരുന്നതായാണ് റിപ്പോര്‍ട്ടുകള്‍ സൂചിപ്പിക്കുന്നതെന്ന കാര്യവും അദ്ദേഹം ചൂണ്ടിക്കാട്ടി. വിദേശരാജ്യങ്ങളില്‍ നിന്ന് കടത്താന്‍ ശ്രമിക്കുന്ന ഹെറോയിന്‍ ഉള്‍പ്പെടെയുളള ലഹരി വസ്തുക്കള്‍ വന്‍തോതില്‍ പിടികൂടുന്നുമുണ്ട്. ഈ സാഹചര്യത്തിലാണ് ആഭ്യന്തരമന്ത്രി പ്രസ്താവന നടത്തിയിരിക്കുന്നത് എന്ന കാര്യം ശ്രദ്ധേയമാണ്.രാജ്യം നേരിടുന്ന മറ്റൊരു അപകടമാണ് നാര്‍ക്കോ തീവ്രവാദം എന്ന് അമിത് ഷാ വ്യക്തമാക്കി .

ലഹരി മരുന്നുകള്‍ രാജ്യത്തേക്ക് കടത്താന്‍ അനുവദിക്കില്ലെന്ന് സര്‍ക്കാര്‍ ഉറച്ച തീരുമാനമെടുത്തിരുന്നു. അതില്‍ നിന്ന് പിന്നോട്ടുവലിക്കാന്‍ ആര്‍ക്കുമാവില്ല. ഇത് തടയേണ്ടത് പ്രധാനകാര്യമാണെന്നും അമിത് ഷാ പറഞ്ഞു.

ഇത്തരം കേസുകളില്‍ വേഗത്തിലും മികച്ചതുമായ അന്വേഷണങ്ങള്‍ നടത്താന്‍ ശാസ്ത്രീയ മാര്‍ഗങ്ങള്‍ അവലംബിക്കേണ്ടതുണ്ടെന്നും അദ്ദേഹം പറഞ്ഞു. ഇക്കാര്യത്തില്‍ ഫോറന്‍സിക് സയന്‍സിന് ഒട്ടേറെ സംഭാവനകള്‍ നല്‍കാന്‍ കഴിയും. ശാസ്ത്രീയ തെളിവുകള്‍ അടിസ്ഥാനമാക്കിയാണ് ഇത്തരം കേസുകളില്‍ അന്വേഷണം പുരോഗമിക്കുകയെന്നും അമിത് ഷാ വ്യക്തമാക്കിയിരുന്നു .