ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദ്ദത്തെത്തുടര്‍ന്ന് ദക്ഷിണ തീരത്ത് കനത്ത കനത്ത കാറ്റും മഴയും .ചെന്നൈ വിമാനത്താവളം അടച്ചു   വര്‍ധ ചുഴലിക്കാറ്റ് മുന്നില്‍ കണ്ട് തമിഴ്‌നാട്, ആന്ധ്ര, പുതുച്ചേരി സംസ്ഥാനങ്ങളില്‍ അതീവ ജാഗ്രതക്ക് അധികൃതര്‍ നിര്‍ദേശം നല്‍കിയിട്ടുണ്ട്. ചുഴലിക്കാറ്റിന്റെ പശ്ചാത്തലത്തില്‍ ഉച്ചയ്ക്ക് ഒന്നു മുതല്‍ മൂന്നു വരെ വീടിനു പുറത്തേക്ക് ഇറങ്ങരുതെന്നു ചെന്നൈയിലും സമീപ പ്രദേശങ്ങളിലുമുള്ളവരോടും സംസ്ഥാന സര്‍ക്കാര്‍ അറിയിച്ചു. ഈ സമയത്തിനിടയില്‍ ചുഴലിക്കാറ്റ് കരയിലേക്കു കടക്കുമെന്നാണു പ്രതീക്ഷിക്കുന്നത്.
ശക്തമായ കാറ്റും ചെന്നൈ ഉള്‍പ്പെടെ വടക്കന്‍ ജില്ലകളില്‍ കനത്ത മഴയും പ്രതീക്ഷിക്കാമെന്ന് ചെന്നൈ റീജനല്‍ കാലാവസ്ഥ നിരീക്ഷണ കേന്ദ്രം ഡയറക്ടര്‍ പറഞ്ഞു.

ചുഴലിക്കാറ്റിന്റെ സ്വാധീനത്തില്‍ ചെന്നൈയില്‍ കനത്ത മഴയും കാറ്റും ഇന്നു പുലര്‍ച്ചെ മുതല്‍ അനുഭവപ്പെടുന്നുണ്ട്. ചെന്നൈയില്‍ ഇപ്പോള്‍ 67 കിലോമീറ്റര്‍ വേഗത്തില്‍ വരെ കാറ്റു വീശാന്‍ തുടങ്ങിയിട്ടുണ്ട്. ആളുകള്‍ പുറത്തിറങ്ങാതെ വീടിനുള്ളില്‍ തന്നെ ഇരിക്കുകയാണ്. ആവശ്യത്തിനുള്ള ഭക്ഷണ സാധനങ്ങള്‍ പലരും ഇന്നലെ രാത്രി തന്നെ സംഭരിച്ചിരുന്നു. നഗരത്തിലെ പല ഭാഗങ്ങളിലും വൈദ്യുതി മുടങ്ങിയിരിക്കുകയാണ്.

മണിക്കൂറില്‍ 80-90 കിലോമീറ്റര്‍ വരെ വേഗതയില്‍ കാറ്റുവീശുമെന്ന മുന്നറിയിപ്പിനെത്തുടര്‍ന്ന് തമിഴ്‌നാട്, ആന്ധ്ര സംസ്ഥാനങ്ങളില്‍ മുഖ്യമന്ത്രിമാരുടെ അധ്യക്ഷതയില്‍ ഒരുക്കം വിലയിരുത്തി. മണിക്കൂറില്‍ 100 കിലോമീറ്ററിനുമേല്‍ വരെ വേഗത പ്രാപിക്കാമെന്ന് കാലാവസ്ഥ നിരീക്ഷകരുടെ കൂട്ടായ്മ പറയുന്നു.
ചെന്നൈയുള്‍പ്പെടെ മൂന്നു വടക്കന്‍ ജില്ലകളിലെ സ്‌കൂളുകള്‍ക്കും കോളജുകള്‍ക്കും ഇന്ന് അവധി പ്രഖ്യാപിച്ചിട്ടുണ്ട്. ജനങ്ങള്‍ വീടിനുള്ളില്‍ തന്നെ ഇരിക്കണമെന്നും അത്യാവശ്യത്തിനു മാത്രമേ പുറത്തിറങ്ങാവൂവെന്നും സംസ്ഥാന സര്‍ക്കാര്‍ അഭ്യര്‍ഥിച്ചു. സ്വകാര്യ സ്ഥാപനങ്ങളിലെ ജീവനക്കാര്‍ക്ക് അവധിയോ, വീട്ടില്‍ ഇരുന്നു തന്നെ ജോലി ചെയ്യാനുള്ള സൗകര്യമോ നല്‍കിയിട്ടുണ്ട്.
അണ്ണാ സര്‍വകലാശാല ഇന്നും നാളെയുമായി നടത്താനിരുന്ന എല്ലാ പരീക്ഷകളും നീട്ടിവെച്ചു. തീരപ്രദേശങ്ങളില്‍ താമസിക്കുന്നവരെ വേണ്ടിവന്നാല്‍ സുരക്ഷിത സ്ഥാനങ്ങളിലേക്ക് മാറ്റും. മത്സ്യത്തൊഴിലാളികള്‍ കടലില്‍ പോകുന്നത് തടഞ്ഞിട്ടുണ്ട്.

ചെന്നൈ സുളൂര്‍പേട്ട് സബര്‍ബന്‍ ട്രെയിന്‍ സര്‍വീസിനു നിയന്ത്രണമേര്‍പ്പെടുത്തി. ഈ റൂട്ടില്‍ ഒരു മണിക്കൂര്‍ ഇടവിട്ടു മാത്രമാണ് ഇപ്പോള്‍ ട്രെയിന്‍ സര്‍വീസ് നടത്തുന്നത്. ചില ട്രെയിനുകള്‍ വഴിതിരിച്ചുവിട്ടു. ചെന്നൈ വിമാനത്താവളത്തില്‍ ഇറങ്ങേണ്ട ചില വിമാനങ്ങള്‍ വഴിതിരിച്ചുവിട്ടു. പുറപ്പെടേണ്ട ചില സര്‍വീസുകള്‍ മോശം കാലാവസ്ഥയെ തുടര്‍ന്നു റദ്ദാക്കി.

കര, നാവിക, വ്യോമ, തീരസംരക്ഷണ സേനകളെ തയ്യാറാക്കി നിര്‍ത്തിയിട്ടുണ്ട്. അടിയന്തര സാഹചര്യങ്ങള്‍ നേരിടാന്‍ ദുരിതാശ്വാസ കേന്ദ്രങ്ങളും ഒരുക്കി. മതിയായ ഭക്ഷണം, വെള്ളം, മറ്റു സംവിധാനങ്ങള്‍ എന്നിവ ഇത്തരം കേന്ദ്രങ്ങളില്‍ ഒരുക്കിയിട്ടുണ്ട്. അടിയന്തര ആവശ്യങ്ങള്‍ക്കായി എല്ലാ സജ്ജീകരണങ്ങളും ഒരുക്കിയിട്ടുണ്ടെന്ന് നാവിക സേന അറിയിച്ചു. 30 ഡൈവിങ് സംഘങ്ങളെ സജ്ജമാക്കിയിട്ടുണ്ട്.