ഗുജറാത്തിലും രാജസ്ഥാനിലും അടുത്ത നാലുദിവസം ശക്തമായ മഴ തുടരുന്നു. ഗുജറാത്തിന്റെ വിവിധ ഭാഗങ്ങളില്‍നിന്നും ഏതാണ്ട് 25,000 ആളുകളെ സുരക്ഷിത കേന്ദ്രങ്ങളിലേക്ക് മാറ്റി. പ്രധാനമന്ത്രി നരേന്ദ്ര മോദി പ്രളയബാധിത പ്രദേശങ്ങളില്‍ വ്യോമനിരീക്ഷണം നടത്തും. ഗുജറാത്തിലെ സ്ഥിതിഗതികള്‍ മുഖ്യമന്ത്രി വിജയ് രൂപാനി പ്രധാനമന്ത്രിയെ അറിയിച്ചിരുന്നു. ഇതേ തുടര്‍ന്നാണ് നേരിട്ട് പ്രശ്‌നങ്ങള്‍ മനസിലാക്കാന്‍ മോദി എത്തുന്നത്.

പ്രളയത്തില്‍ രാജസ്ഥാനില്‍ രണ്ടു പേര്‍ മരിച്ചു. ജോദ്പൂര്‍, സിരോഹി, ജലോര്‍ തുടങ്ങിയ സ്ഥലങ്ങളാണ് പ്രളയക്കെടുതി അനുഭവിക്കുന്നത്. സൈന്യം, ദേശീയ ദുരന്ത നിവാരണസേന, വ്യോമസേന, ബിഎസ്എഫ്, പൊലീസ് തുടങ്ങിയവര്‍ രക്ഷാപ്രവര്‍ത്തനത്തെ സഹായിക്കുന്നു.

വടക്കന്‍ ഗുജറാത്ത്, സൗരാഷ്ട്ര തുടങ്ങിയ സ്ഥലങ്ങളെയാണ് പ്രളയം ശക്തമായി ബാധിച്ചത്. ബനസ്‌കാന്ത, സബര്‍കാന്ത, ആനന്ദ്, പഠാന്‍ വല്‍സാദ് ജില്ലയുടെ ചില ഭാഗങ്ങള്‍ തുടങ്ങിയ സ്ഥലങ്ങള്‍ പ്രളയക്കെടുതിയിലാണ്. സബര്‍മതി നദി കരകവിഞ്ഞൊഴുകുകയാണ്. ഏതാണ്ട് 11,000 ആളുകളെ ബനസ്‌കാന്ത ജില്ലയില്‍ നിന്നു മാത്രം ഒഴിപ്പിച്ചു. വിവിധ സ്ഥലങ്ങളില്‍ ദുരിതാശ്വാസ കേന്ദ്രങ്ങള്‍ തുറന്നു.

കഴിഞ്ഞ 24 മണിക്കൂറിനിടെ ബനസ്‌കാന്തയിലെ 12 താലൂക്കുകളിലും പഠാന്‍, സബര്‍കാന്ത ജില്ലകളിലും 200 മില്ലി മീറ്റര്‍ മഴയാണ് പെയ്തത്. ബനസ്‌കാന്തയിലെ ഡന്‍ടിവാഡയിലാണ് ശക്തമായ മഴ പെയ്തത് 463 എംഎം. പാലന്‍പൂര്‍ (380 എംഎം), വാഗഡം (357 എംഎം), അമിര്‍ഗാഡ് (337 എംഎം) ലക്ഷ്‌നി (305 എംഎം) എന്നിങ്ങനെയാണ് ശക്തമായ മഴ ലഭിച്ച മറ്റു പ്രദേശങ്ങള്‍. ചൊവ്വാഴ്ച രാവിലെ മാത്രം ഏതാണ്ട് 400 പേരെ ബനസ്‌കാന്ത ജില്ലയില്‍ നിന്നും രക്ഷിച്ചു.

രാജസ്ഥാനില്‍ കനത്ത മഴ റോഡ്, റയില്‍ ഗതാഗത മേഖലയെ ബാധിച്ചു. ജലോറിലേക്കുള്ള ദേശീയ പാത വെള്ളത്തില്‍ മുങ്ങി. സിരോഹിയില്‍ ദുരിതാശ്വാസ ക്യാംപുകള്‍ ആരംഭിച്ചു. കനത്ത മഴയെ തുടര്‍ന്ന് ദക്ഷിണ രാജസ്ഥാനിലെ ധന്‍ഡിവാഡ, സിപു, ധോരി തുടങ്ങിയ അണക്കെട്ടുകള്‍ നിറഞ്ഞൊഴുകുകയാണ്.

ദേശീയ ദുരന്ത നിവാരണസേനയുടെ സംഘം രക്ഷാപ്രവര്‍ത്തനങ്ങള്‍ക്ക് നേതൃത്വം നല്‍കുന്നു. രാജസ്ഥാനിലും ഗുജറാത്തിലും വ്യോമസേനയുടെ ഹെലികോപറ്റര്‍ രക്ഷാപ്രവര്‍ത്തനത്തിനുണ്ട്. ഗുജറാത്തില്‍ ഭക്ഷണം എത്തിക്കുന്നതിനും ജനങ്ങളെ വ്യോമമാര്‍ഗം രക്ഷപ്പെടുത്താനും വ്യോമസേനയുടെ മൂന്ന് ഹെലികോപ്റ്ററുകള്‍ രംഗത്തുണ്ട്.

അഹമ്മദാബാദ്-ഡല്‍ഹി റെയില്‍പാതയില്‍ സര്‍വീസുകള്‍ താല്‍ക്കാലികമായി നിര്‍ത്തിവച്ചു.

ഗുജറാത്ത് മുഖ്യമന്ത്രി വിജയ് രൂപാനി പ്രളയ പ്രദേശങ്ങളില്‍ വ്യോമ നിരീക്ഷണം നടത്തി. മണ്‍സൂണ്‍ ആരംഭിച്ചതു മുതല്‍ ഇതുവരെ ഏതാണ്ട് 70 പേര്‍ക്ക് മഴക്കെടുതിയില്‍ ജീവന്‍ നഷ്ടമായി.