മുൻ വർഷങ്ങളിൽ നിന്നും വ്യത്യസ്തമായി ഇത്തവണത്തെ സ്വാതന്ത്ര്യദിന സന്ദേശം ഒരു മണിക്കൂറിൽ താഴെയായി ചുരുക്കുമെന്ന് പ്രധാനമന്ത്രി നരേന്ദ്ര മോദി. പ്രതിമാസ റേഡിയോ പ്രഭാഷണ പരിപാടിയായ 'മൻ കീ ബാത്തി'ലൂടെയാണ് മോദി ഇക്കാര്യം വ്യക്തമാക്കിയത്.

കഴിഞ്ഞ 3 വർഷങ്ങളിലും സ്വാതന്ത്ര്യദിനത്തിൽ പ്രധാനമന്ത്രി നടത്തിയ പ്രസംഗം നീണ്ടുപോയെന്ന് വ്യാപകമായി പരാതി ഉയർന്നിരുന്നു. ഈ സാഹചര്യം കണക്കിലെടുത്താണ് ഇത്തവണത്തെ പ്രസംഗം 40- 50 മിനിറ്റിനുള്ളിൽ അവസാനിപ്പിക്കാൻ താൻ തീരുമാനിച്ചിരിക്കുന്നതെന്നും മോദി വ്യക്തമാക്കി.

ആഗസ്റ്റ് മാസം വിപ്ലവത്തിന്റെ മാസമാണ്. അതിനാൽ രാജ്യത്തെ യുവാക്കൾ സ്വാതന്ത്ര്യദിനത്തെ നിശ്ചയദാർഢ്യത്തിന്റെ ദിനമായി ആഘോഷിക്കണമെന്നും പ്രധാനമന്ത്രി ആഹ്വാനം ചെയ്തു. വൃത്തിഹീനത്വം, ദാരിദ്യം, തീവ്രവാദം, ജാതിവ്യവസ്ഥ, വർഗീയത എന്നിവ രാജ്യത്ത് നിന്നും തുടച്ചുനീക്കുമെന്ന് ഓരോ പൗരനും പ്രതിജ്ഞ ചെയ്യണമെന്നും അദ്ദേഹം ആവശ്യപ്പെട്ടു.