അടവു പാളിയ അടവു നയ രേഖ
ഈ അടവു മാറ്റി, സത്യം പറഞ്ഞും പഠിപ്പിച്ചും ജനങ്ങളിലേക്കിറങ്ങിച്ചെല്ലാന് മാര്ക്സിസ്റ്റ് പാര്ട്ടി ഇനിയെന്നു പഠിക്കും? അച്യുതാനന്ദന് കുറെക്കാലമായിട്ട് പഠിപ്പിച്ചു. എന്നിട്ടും കളി ആശാന്റെ നെഞ്ചത്തു തന്നെ. ഒടുവില് പരനാറിയിലും പഠിച്ചില്ല. ശരീരഭാഷയാണു പ്രശ്നമെന്നറിയാന് പ്രശ്നം വെക്കേണ്ടതില്ല എന്നുപദേശിച്ചു. മസിലു പിടിക്കുന്ന ജയരാജന്മാരുണ്ടോ ഇതൊക്കെ കേള്ക്കുന്നു.
എന്തു ചെയ്യണമെന്നറിയാതെ വിമ്മിഷ്ടപ്പെടുന്ന നേതൃത്വം അരിപ്രാഞ്ചിക്കണക്കെ ടോയ്ലറ്റ് വൃത്തിയാക്കിയും ഞാറു നട്ടും ജനത്തെ കയ്യിലെടുക്കാന് വെപ്രാളം കൂട്ടി. ജനകീയാടിത്തറ വിപുലപ്പെടുത്താന് സിപിഎം നടത്തുന്ന ശ്രമങ്ങള് എത്രത്തോളം ഫലപ്രദമാകും. അടവുനയരേഖയ്ക്ക് എന്തെങ്കിലും പ്രത്യയശാസ്ത്ര അടിത്തറയുണ്ടോ. പ്രാദേശിക തലത്തിലുളള പാലിയേറ്റീവ് കെയര്, മാലിന്യ സംസ്ക്കരണ പരിപാടികള്, വിവാഹ സഹായ പദ്ധതികള് ഇവയെല്ലാം എത്രത്തോളം ഫലപ്രദമാകും.കാരാട്ടിന്റെ കയ്യില് ഒരു രേഖ. പണ്ടു ശങ്കരാടി പറഞ്ഞപോലെ, എന്റെ കയ്യിലുമുണ്ടൊരു രേഖയെന്നു പറഞ്ഞ് യെച്ചൂരി. രേഖയെല്ലാം കൂടി പരിശോധിച്ച് ഒടുവില് തീരുമാനം പാര്ട്ടി കോണ്ഗ്രസ് എടുക്കട്ടെയെന്ന് കേന്ദ്രകമ്മിറ്റി.
പാച്ചുവും ഗോപാലനും പോലെ നടന്നിരുന്ന സിപിഎമ്മും സിപിഐ.യും തമ്മില് മൂപ്പിളവു തര്ക്കം. തമ്മിലടിച്ചു തമ്മിലടിച്ചു തറവാടു കുളം തോണ്ടിയതോര്ത്താല് ആര്ക്കാ സഹിക്കുക. ഇറങ്ങിപ്പോയ സിപിഎംകാര് എല്ലാം കൊണ്ടു പോയില്ലേ. ഒടുവില് സിപിഐക്കാരുടെ തറവാട്ടിലെന്താ ബാക്കിയുണ്ടായത്. കാര്യമായ അണികളൊന്നുമില്ല. കുറച്ചു നേതാക്കള് മാത്രം. ഈ ഭാരം ഒറ്റയ്ക്ക് ചുമന്നു മടുത്തപ്പോള് അറിയാതെ പന്ന്യന് സഖാവു പറഞ്ഞുപോയതാ. തമ്മില് പിരിഞ്ഞാലും ഒരു കുടുംബത്തില് തന്നെയല്ലേ അന്തിയുറക്കം. പിന്നെ ഒന്നായാലെന്താ?
ഒന്നായാലും കുഴപ്പമൊന്നുമില്ല.. പിന്നെ കയറി വരുന്ന നേതാക്കള് കാരണവന്മാര്ക്ക് ഒന്നും ബോധിക്കില്ല. നല്ല സ്ഥാനം ഇരിപ്പിടം എല്ലാം പ്രശ്നങ്ങളാ. പത്തായത്തിലുള്ളവനല്ലേ സൂക്ഷിക്കേണ്ടത്, കേറി വരുന്നവന് തടയിട്ടാല് പ്രശ്നം തീരില്ലേ.
അതുകൊണ്ട് സിപിഎം ഉം സിപിഐയും തത്ക്കാലം മോരും മുതിരയുമായി തന്നെ കിടക്കും. ഇടയ്ക്ക് മാണിയുടെ കേരള കോണ്ഗ്രസ്, കുടുംബത്തില് കയറി പൊറുതി തുടങ്ങുമോ എന്നു ഭയന്ന പന്ന്യന് പല്ലും നഖവുമുപയോഗിച്ച് കേരളാ കോണ്ഗ്രസിനെതിരെ പൊരുതി. അഥവാ വന്നു പൊറുതി തുടങ്ങിയാല് പെരുവഴിയിലാകുമെന്ന് പന്ന്യനറിയാം. മാണിക്ക് നയനാരുമായി കൂടിയ സഖാവു പരിവേഷവും പരിചയവുമാണല്ലോ. പിന്നെ നല്ല മെയ്വഴക്കവും.
ഏറ്റെടുത്ത സമരങ്ങളൊക്കെ നിലം തൊടാതെ പോകുകയും , ജനങ്ങള്ക്കിടയിലുള്ള സ്വാധീന ശക്തി കുറയുകയും ചെയ്തപ്പോള് പാര്ട്ടി ഏറെ മാറി ചിന്തിക്കലിന് തയ്യാറാകണം. സിപിഎമ്മിന് ഇപ്പോഴുള്ള വീണ്ടു വിചാരങ്ങളൊക്കെ തെരഞ്ഞെടുപ്പുകളെ മുന്നില്ക്കണ്ടാണെന്ന് ജനങ്ങള്ക്കു സന്ദേഹമുണ്ടാകും.
കാലഘട്ടത്തിന്റെ ചുവരെഴുത്തുകള് ഇന്നു സോഷ്യല് മീഡിയയാണ്. പുതിയൊരു മധ്യവര്ഗം ഇവിടെ ഉയര്ന്നു വരുന്നു. സമൂഹത്തിന്റെ ചിന്തകളെയും വിചാരങ്ങളെയും സ്വാധീനിക്കാന് അവര്ക്കാകുന്നു. ഇനി രാഷ്ട്രീയമാണ് മാറേണ്ടത്.
ഇന്ത്യയുടെ ജനാധിപത്യ വീഴ്ചകളില് മോഡി വിജയം കണ്ടു. ജനാധിപത്യത്തിലെ ശുചീകരണത്തിന്റെ പ്രതീകമായി ആം ആദ്മി അവതരിപ്പിച്ച ചൂല് മോഡി തട്ടിയെടുത്തു.
പ്രസ്ഥാനം ക്ഷയിക്കുമ്പോള്, നേതാക്കള് ദുര്ബലരാകുമ്പോള് ഏകാധിപതികള്ക്കു ചരിത്രം വഴി മാറും. വര്ഗീയത അധികാരത്തിനുള്ള മാര്ഗമാകുമ്പോള് രാഷ്ട്രം ദുര്ബലമാകും. കേരളത്തിനുമേല് കാവി പടര്ന്നാല് വര്ഗ സമരം നെഞ്ചില് നെരിപ്പോടു പോലെ കൊണ്ടു നടന്നവര്, നിങ്ങള് നാളെയെകുറിച്ചു സ്വപ്നം കാണാന് പഠിപ്പിച്ചവര് വഴി മാറി ചിന്തിക്കും. ചരിത്രം മാപ്പു നില്കില്ല, ഒരിക്കലും.
നമുക്കു വേണ്ടത് പുതിയ സ്വപ്നങ്ങളാണ്. ചിന്തകളും. ചോരയുടെ മണം വെറുപ്പിന്റേതാണ്. അതു പടരും. ഉണര്ന്നിരിക്കുന്ന ഇന്റര്നെറ്റ് ലോകം നിമിഷാര്ദ്ധത്തില് അവ പകര്ത്തും. കമ്മ്യൂണിസ്റ്റ് ചിന്തകള് പുതിയ കാലഘട്ടത്തിന്റേതാവട്ടെ. വെറുക്കപ്പെടലിന്റെ വര്ഗബോധം നമുക്കു വേണ്ട. സ്നേഹത്തിന്റെ ശരീരഭാഷയില് പുതിയൊരു സ്നേഹവിപ്ലവ പ്രസ്ഥാനം പിറക്കട്ടെ.
അടവുകളില്ലാത്ത പ്രവര്ത്തനരേഖയാണ് നമുക്കു വേണ്ടത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha