ലോക്ക്ഡൗണ്‍ കാലത്ത് വീട്ടുമുറ്റത്ത് ക്രിക്കറ്റ് കളിച്ച ദമ്പതികള്‍ അതിവേഗത്തിലാണ് സൈബര്‍ ഇടങ്ങളില്‍ വൈറലായത്. ഒരു അച്ഛനും അമ്മയും തമ്മിലുള്ള ക്രിക്കറ്റ് കളിയാണ് സൈബര്‍ലോകത്ത് നിറഞ്ഞത്. രാമന്‍ നമ്പൂതിരി എന്നാണ് ഈ അച്ഛന്റെ പേര്. 58 വയസ്സ് പ്രായമുണ്ട്. 50 വയസ്സുകാരി ബിന്ദു ആണ് ഈ അച്ഛനൊപ്പം ക്രിക്കറ്റ് കളിച്ച അമ്മ. ഇവരുടെ മക്കളില്‍ ഒരാളാണ് ക്രിക്കറ്റ് കളിയുടെ വിഡിയോ പകര്‍ത്തി സമൂഹമാധ്യമങ്ങളില്‍ പങ്കുവെച്ചത്.

പ്രായത്തെ വെല്ലുന്ന ഇവരുടെ പ്രകടനത്തിന് നിറഞ്ഞ് കൈയടിച്ചു സോഷ്യല്‍മീഡിയ. അമ്മയാണ് ബൗളിങ്. അച്ഛന്‍ ബാറ്റിങ്ങും. ആക്ഷനോടുകൂടിയുള്ള അമ്മയുടെ ബൗളിങ്ങും അച്ഛന്റെ ബാറ്റിങ്ങും ഒന്നിനൊന്ന് മികച്ചുനില്‍ക്കുന്നു.

ലോക്ക്‌ഡൈണിന്റെ ബോറടി മാറ്റാന്‍ ക്രിക്കറ്റ് കളിക്കാന്‍ തീരുമാനിച്ച ദമ്പതികള്‍ സംസാരിക്കുന്നു.

'എന്റെ പേര് രാമന്‍ നമ്പൂതിരി ഭാര്യ ബിന്ദു. എനിക്ക് 58 വയസുണ്ട് അവള്‍ക്ക് 50 വയസും. ഞാന്‍ പട്ടാളത്തിലായിരുന്നു 98ല്‍ വിരമിച്ചു. ഇപ്പോള്‍ ഭാര്യയും മക്കളുമൊക്കെയായി പാലക്കാട് പട്ടാമ്പിയിലാണ് താമസം. അടുത്തൊരു ക്ഷേത്രത്തിലെ ശാന്തിപ്പണിയാണ് ഇപ്പോള്‍ ചെയ്യുന്നത്. ലോക്ഡൗണായി വീട്ടിലിരുന്ന് മടുത്തപ്പോള്‍, എന്നാല്‍ വാ ക്രിക്കറ്റ് കളിക്കാമെന്ന് ഞാന്‍ വെറുതേ പറഞ്ഞു. അപ്പോഴേക്കും ഭാര്യ റെഡിയായി.

ക്രിക്കറ്റ് എനിക്ക് വലിയ ഇഷ്ടമാണ്. പക്ഷേ ഭാര്യ ഇത്ര നന്നായി കളിക്കുമെന്ന് എനിക്ക് അറിയില്ലായിരുന്നു. കൈയ്യൊക്കെ കറക്കി കൃത്യമായിട്ടാണ് അവള്‍ പന്തെറിഞ്ഞു തന്നത്. ഞാന്‍ തന്നെ അമ്പരന്നുപോയി. ഇളയ മകനാണ് ഇത് വിഡിയോയില്‍ പകര്‍ത്തിയത്.

അവന്‍ അതില്‍, അമ്മ പട്ടാമ്പി കോളജിലെ വനിതാ ക്രിക്കറ്റ് ടീമിന്റെ ക്യാപ്റ്റനായിരുന്നു എന്നു പറയുന്നത് ചുമ്മാതാണ്. അവന്‍ ഒരു രസത്തിന് പറഞ്ഞതാ. അവള്‍ക്ക് അങ്ങനെ ക്രക്കറ്റില്‍ മുന്‍ പരിചയം ഒന്നുമില്ല. പക്ഷേ നല്ല ബൗളറാണെന്ന് തെളിയിച്ചു.

മുന്‍പ് പട്ടാളത്തില്‍ നിന്നുവരുമ്പോള്‍ നാട്ടിലെ കുട്ടികള്‍ക്ക് ക്രിക്കറ്റ് ബാറ്റ് വാങ്ങിവരുമായിരുന്നു. വര്‍ഷങ്ങള്‍ക്കിപ്പുറം ക്രിക്കറ്റ് ഞങ്ങളെ താരമാക്കി.' ഇനിയും ക്രിക്കറ്റ് കളിക്കണം എന്ന മോഹം പങ്കുവച്ചാണ് രാമേട്ടന്‍ സംഭാഷണം അവസാനിപ്പിച്ചത്. സച്ചിന്‍ എന്ന ഇതിഹാസത്തിന്റെ പിറന്നാള്‍ ദിനം തന്നെ ഇങ്ങനെ ഒരു ശ്രദ്ധ കിട്ടിയതില്‍ ഈ താരങ്ങളും സന്തോഷത്തിലാണ്.