അടുത്തിടെ ഉക്രെയ്‌നില്‍ നിന്നുള്ള 57 -കാരിയായ ഒരു സ്ത്രീ അന്താരാഷ്ട്ര വാര്‍ത്താ തലക്കെട്ടുകളില്‍ ഇടം നേടിയിരുന്നു. മദ്യപിച്ച് ലക്കുകെട്ട രണ്ട് അയല്‍വാസികള്‍ അവരെ മണിക്കൂറുകളോളം ക്രൂരമായി മര്‍ദ്ദിച്ചതിനു ശേഷം ജീവനോടെ ശ്മശാനത്തില്‍ കുഴിച്ചിട്ട അവര്‍ അവിടെ നിന്ന് അത്ഭുതകരമായി രക്ഷപ്പെടുകയായിരുന്നുവത്രേ. സിനിമയേക്കാള്‍ അവിശ്വസനീയമായ ജീവിതാനുഭവമാണ് അവര്‍ക്ക് പങ്കുവയ്ക്കുന്നത്.

ഈ മാസം ആദ്യം, നീന റുഡ്ചെങ്കോ എന്ന 57 -കാരിയായ സ്ത്രീയെ, ഉക്രേനിലെ മറിയാന്‍സ്‌കെ എന്ന ഗ്രാമത്തി ലുള്ള അവരുടെ വീട്ടില്‍ അതിക്രമിച്ച് കയറിയ 27-ഉം 30-ഉം വയസുള്ള സഹോദരന്മാരായ രണ്ട് യുവാക്കള്‍ മണിക്കൂറുകളോളം അതിക്രൂരമായി തല്ലിച്ചതക്കുകയായിരുന്നു. അടിയേറ്റ് തളര്‍ന്ന അവര്‍ക്ക് ബോധം നഷ്ടമായി. ഓര്‍മ തെളിഞ്ഞപ്പോള്‍ താന്‍ അടുത്തുള്ള സെമിത്തേരിയില്‍ കിടക്കുന്നതായി ആ സ്ത്രീ തിരിച്ചറിഞ്ഞു.

അബോധാവസ്ഥയിലായ റുഡ്ചെങ്കോയെ അര്‍ദ്ധരാത്രി സെമിത്തേരിയിലേക്ക് വലിച്ചിഴച്ചു കൊണ്ടുപോയ സഹോദരന്മാരായ ഒലെഗും, വ്ളാഡിമിറും സെമിത്തേരിയില്‍ വച്ച് അവരുടെ മേല്‍ തണുത്ത വെള്ളം ഒഴിച്ച് അവരെ ഉണര്‍ത്തി. അതിന് ശേഷം സഹോദരന്മാര്‍ ആ സ്ത്രീയോട് അവര്‍ക്കുള്ള കുഴിമാടം സ്വന്തമായി കുഴിക്കാന്‍ ആവശ്യപ്പെട്ടു. കഷ്ടപ്പെട്ട് കുഴിയെടുക്കുന്നതിനിടയില്‍, അവരുടെ വീട് തങ്ങള്‍ക്ക് നല്‍കണമെന്ന് രണ്ട് സഹോദരന്മാരും പറഞ്ഞുകൊണ്ടിരുന്നതായും അവര്‍ പൊലീസിനോട് വെളിപ്പെടുത്തി. വീട് നല്‍കിയില്ലെങ്കില്‍ അവരെ ചുട്ടുകൊല്ലുമെന്നും മരുമകന്റെ സമീപത്ത് അവരെ അടക്കുമെന്നും അക്രമകാരികള്‍ ഭീഷണിപ്പെടുത്തിയതായും അവര്‍ പറഞ്ഞു.

കുഴി തയ്യാറായപ്പോള്‍ ഇരുവരും റുഡ്ചെങ്കോയെ അതില്‍ കിടത്തി മണ്ണിട്ട് മൂടാന്‍ തുടങ്ങി. അവര്‍ മനഃസാന്നിധ്യം കൈവിടാതെ പരമാവധി പിടിച്ചുനില്‍ക്കാന്‍ ശ്രമിച്ചു. മണ്ണിന്റെ സമ്മര്‍ദ്ദം അവരുടെ ശരീരത്തിന് മേല്‍ വര്‍ദ്ധിച്ചു വന്നു. എന്നിട്ടും അവര്‍ സംയമനം പാലിച്ച് അനങ്ങാതെ കിടന്നു. ഒടുവില്‍ താന്‍ മരിച്ചോ എന്ന് ആ സഹോദരന്മാര്‍ പരസ്പരം ചോദിക്കുന്നത് കേട്ടെന്നും റുഡ്ചെങ്കോ പറഞ്ഞു. അക്രമകാരികള്‍ അവിടെ നിന്ന് പോയി എന്ന് ഉറപ്പാക്കിയ ശേഷം അവര്‍ കൈകൊണ്ട് തനിക്ക് മേലുള്ള മണ്ണ് മാറ്റാന്‍ തുടങ്ങി.

സഹോദരിയാണ് ബോധമറ്റ് തറയില്‍ കിടക്കുന്ന അവരെ കണ്ടെത്തിയത്. ആഴമില്ലാത്ത കുഴിയില്‍ നിന്ന് രക്ഷപ്പെട്ട് അവര്‍ ഇഴഞ്ഞ് വീട്ടില്‍ എത്തുകയായിരുന്നു. ഉടന്‍ തന്നെ റുഡ്ചെങ്കോയെ അടുത്തുള്ള ആശുപത്രിയിലേക്ക് സഹോദരി കൊണ്ടുപോയി. അവരുടെ ശരീരത്തില്‍ നിരവധി ഒടിവുകളും, മുഖത്തും കൈകാലുകളിലും മുറിവുകളിലും ഡോക്ടര്‍മാര്‍ കണ്ടെത്തി. അവര്‍ക്ക് വീട്ടിലേക്ക് മടങ്ങാന്‍ ഇപ്പോഴും ഭയമാണെന്ന് അവര്‍ പറയുന്നു.

രണ്ട് ആക്രമണകാരികള്‍ക്കെതിരെയും ഉക്രേനിയന്‍ പൊലീസ് ക്രിമിനല്‍ നടപടികള്‍ ആരംഭിച്ചു കഴിഞ്ഞു. കുറ്റം തെളിഞ്ഞാല്‍, സഹോദരന്മാര്‍ 5 വര്‍ഷം വരെ തടവ് അനുഭവിക്കേണ്ടിവരും.