സ്റ്റാര്‍ പൈലറ്റായി നിലൂഫര്‍ റഹ്മാനി, മാതൃകയാക്കുന്നത് അഫ്ഗാന്‍ പെണ്‍കുട്ടികള്‍
മാലാല യൂസഫ് സായിക്ക് ശേഷം അറബ് ലോകത്ത് സ്റ്റാറായി മാറിയിരിക്കുകയാണ് അഫ്ഗാന്‍ വ്യോമസേനയില്‍ പൈലറ്റായ നീലൂഫര്‍ റഹ്മാനിയെന്ന ഇരുപത്തിമൂന്നുകാരി.വിമാനം പറത്തുകയെന്ന സ്വപ്നം കണ്ടുനടക്കുന്ന അഫ്ഗാനിസ്ഥാനിലെ പെണ്‍കുട്ടികള്‍ക്ക് പ്രചോദനം നല്‍കുന്നു നീലൂഫറിന്റെ വിജയം. അഫ്ഗാനിസ്ഥാനിലെ ആദ്യ വനിതാ എയര്‍ഫോഴ്‌സ് പൈലറ്റായ നീലൂഫര്‍ റഹ്മാനി ഇപ്പോള്‍ സമൂഹത്തില്‍ മാതൃക സ്ഥാനമാണ്. ചെറുപ്പത്തില്‍ പക്ഷികള്‍ ആകാശത്തു കൂടി പറക്കുന്നതു കാണുമ്പോഴേ ചിറകു വിരിച്ചു തുടങ്ങിയതാണ് നീലൂഫറിന്റെ സ്വപ്‌നങ്ങളും. ഒരു വിമാനം പറത്തുകയെന്നതായിരുന്നു ഏറ്റവും വലിയ സ്വപ്നം. കാബൂളില്‍ ജനിച്ചു വളര്‍ന്ന നീലൂഫറിന് പക്ഷേ സ്വപ്‌ന സാക്ഷാത്ക്കാരത്തിന് ഒട്ടേറെ കടമ്പകളുണ്ടായിരുന്നു. പലഭാഗത്തു നിന്നും ഭീഷണികള്‍ വരെയുണ്ടായി. എല്ലാ കടമ്പകളും തരണം ചെയ്ത് അവസാനം 2010ല്‍ എയര്‍ഫോഴ്‌സ് ട്രെയിനിങ് പ്രോഗ്രാമിലേക്ക് തെരഞ്ഞെടുക്കപ്പെടുകയായിരുന്നു. എന്നാല്‍ ഈ വിവരം ബന്ധുക്കളില്‍ നിന്ന് ആദ്യം മറച്ചു വച്ചു. ബന്ധുക്കളില്‍ നിന്ന് എതിര്‍പ്പുകള്‍ നേരിടേണ്ടി വരുമെന്നതിനാലായിരുന്നു ഇത്.
രണ്ടു വര്‍ഷത്തെ ട്രെയിനിംഗിനു ശേഷം അഫ്ഗാനിസ്ഥാന്‍ സൈനിക ചരിത്രത്തിലെ ആദ്യ വനിതാ ഫിക്‌സഡ് വിങ് ഏവിയേറ്ററായി നീലൂഫര്‍ ചുമതലയേറ്റു. 2012 ജൂലൈയിലാണ് സെക്കന്റ് ലെഫ്റ്റണന്റായി ബിരുദം നേടിയത്. സെസ്‌ന 182 ലായിരുന്നു ക്യാപ്റ്റന്‍ റഹ്മാനിയുടെ ആദ്യ പറക്കല്‍. ഫ്‌ളൈററ് സ്‌കൂളിലെ പ്രത്യേക പഠനത്തിനു ശേഷം സി208 മിലിട്ടറി കാര്‍ഗൊയും പരീക്ഷിച്ചു. ഒരിക്കല്‍ വിമാന യാത്രയ്ക്കിടെ തോളിന് പരിക്കേറ്റ നിലൂഫര്‍ പരിക്കേറ്റ സഹപൈലറ്റിനെ ആശുപത്രിയില്‍ എത്തിച്ചത് ഏറെ സാഹസികമായിട്ടായിരുന്നു.
എയര്‍ഫോഴ്‌സ് ട്രെയിനിംഗില്‍ നിന്ന് പിന്മാറണമെന്ന് ആവശ്യപ്പെട്ടുകൊണ്ട് നീലൂഫറിന് പല തവണ താലിബാനില്‍ നിന്നും ഭീഷണിക്കത്തുകള്‍ ലഭിച്ചിരുന്നു. എന്നാല്‍ തന്റെ തീരുമാനവുമായി മുന്നോട്ടുപോകാനായിരുന്നു നീലൂഫറിന്റെ ഉറച്ച തീരുമാനം. ഭീഷണി ശക്തമായപ്പോള്‍ രാജ്യത്തു നിന്ന് രണ്ടു മാസം വിട്ടു നില്‍ക്കേണ്ട ഗതികേടും നീലൂഫറിനുണ്ടായി. ഇപ്പോഴും ഭീഷണി നിലനില്‍ക്കുന്നതിനാല്‍ ഒരു തോക്ക് എപ്പോഴും കൂടെക്കരുതുന്നുണ്ട്. യൂണിഫോമില്‍ മിലിട്ടറി ബേസിന് ഒരിക്കലും പുറത്തു പോകാറില്ല നീലൂഫര്‍. അതേസമയം തെരുവുകളില്‍ കൂടി നടക്കാനോ, ഷോപ്പിംഗിനും മറ്റും പോകാനോ ഇപ്പോള്‍ സാധിക്കാറേയില്ല. പുറത്തു കറങ്ങിനടക്കാനുള്ള സ്വാതന്ത്ര്യം ഇതോടെ അവസാനിച്ചിരിക്കുകയാണെന്നും നീലൂഫര്‍ പറയുന്നു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
