ഐ.സി.സിയുടെ മൂന്ന് പ്രധാന ടൂര്‍ണമെന്റുകള്‍ സ്വന്തമാക്കിയ ഒരേയൊരു ക്യാപ്റ്റനാണ് ധോണി. 2007ലെ പ്രഥമ ട്വന്റി20 ലോകകപ്പും 2011ലെ ഏകദിന ലോകകപ്പും 2013ലെ ചാമ്പ്യന്‍സ് ട്രോഫിയും ഇന്ത്യ നേടുമ്പോള്‍ നായകന്‍ ധോണിയായിരുന്നു. 2011 െലോകകപ്പിനുശേഷം നടന്ന പരമ്പരയില്‍ ഇംഗ്ലണ്ടിനെതിരേ സമ്പൂര്‍ണ പരാജയം ഏറ്റുവാങ്ങിയ ടീം ഇന്ത്യ ചാമ്പ്യന്‍സ് ട്രോഫി നേടുന്ന കാഴ്ച പലരും അമ്പരപ്പോടെയാണ് നോക്കിക്കണ്ടത്. 2010ലും 2016ലും ഇന്ത്യ ഏഷ്യാക്കപ്പ് ചാമ്പ്യന്മാരായതും ധോണിയുടെ നേതൃമികവിലായിരുന്നു. അതുകൊണ്ടു തന്നെ ക്യാപ്റ്റന്‍ കുള്‍ ഏറ്റവും മികച്ചൊരു വിടവാങ്ങല്‍ തന്നെ അര്‍ഹിക്കുന്നുണ്ട്. പക്ഷേ നല്‍കാന്‍ ബി.സി.സി.ഐക്ക് സാധിച്ചില്ല എന്നത് അപമാനകരമാണ്. അതിനായി അദ്ദേഹം കാത്തു നിന്നുമില്ല.

എം.എസ് ധോണിയുടെ മാത്രം അവസ്ഥയല്ല ഇത്. ഇതെ അവസ്ഥതന്നെയാണ് ഇന്ത്യയുടെ ഏറ്റവും മിടുക്കരായ ക്യാപ്റ്റന്മാര്‍ക്ക് എല്ലാമുണ്ടായത്. 1983 യില്‍ ഇന്ത്യയെ ആദ്യമായി ലോകകപ്പ് നേട്ടത്തിലെത്തിയ കപില്‍ ദേവ് മുതല്‍ ധോണിയുടെ പിന്‍ഗാമി സൗരവ് ഗാംഗുലിവരെയുള്ള എല്ലാവരുടെയും അവസ്ഥ ഇതു തന്നെയാണ്. സച്ചില്‍ ടെണ്ടുല്‍ക്കറിന് മാത്രമാണ് മാന്യമായി വിരമിക്കാനുള്ള അവസരം ബി.സി.സി.ഐ നല്‍കിട്ടുള്ളത്. എന്നാല്‍ ധോണിയും എന്തുകൊണ്ടും മാന്യമായ ഒരു വിരമിക്കല്‍ അര്‍ഹിക്കുന്നുണ്ട്. അത് അദ്ദേഹം ആവശ്യപ്പെട്ടില്ലെങ്കിലും ബി.സി.സി.ഐ അറിഞ്ഞ് ചെയ്യണമായിരുന്നു. അതുണ്ടായില്ല. സച്ചിനുശേഷം ഇന്ത്യന്‍ ക്രിക്കറ്റില്‍ വിരാട് കോലിയേക്കാള്‍ വലിയ ഫാന്‍ബേസ് ധോണിക്കു നേടാന്‍ കഴിഞ്ഞിട്ടുണ്ട്. എന്നിട്ടും ബി.സി.സി.ഐ ഇതുകണ്ടില്ലെന്നു മാത്രം.

ധോണി എന്തുകൊണ്ട് ഇന്ത്യകണ്ട എക്കാലത്തെയും മികച്ച ക്യാപ്റ്റനാകുന്നു എന്ന ചോദ്യത്തിന് ഉത്തരം വളരെ ലളിതമാണ്. പ്രതിസന്ധി ഘട്ടത്തില്‍ രാഹുല്‍ ദ്രാവിഡില്‍നിന്ന് ഉത്തരവാദിത്തം ഏറ്റെടുത്തതിനു ശേഷം ടീം ഇന്ത്യയുടെ നേടിയ വിജയങ്ങളുടെ പട്ടിക മാത്രം പരിശോധിച്ചാല്‍ ഇതിനുള്ള ഉത്തരം ലഭിച്ചേക്കും. എന്നാല്‍ വിജയങ്ങളില്‍മാത്രം ഒതുങ്ങിനില്‍ക്കുന്നതല്ല എം.എസ്. ധോനി എന്ന നായകന്റെ വ്യക്തിപ്രഭാവം. അതുകൊണ്ടുതന്നെയാണ് ധോനി ഏറ്റവും കൂടുതല്‍ മത്സരങ്ങളില്‍ ഒരു ടീമിനെ നയിച്ച നായകനായതും. എം.എസ് ധോനി അന്താരാഷ്ട്ര ക്രിക്കറ്റില്‍നിന്ന് വിരമിക്കുമ്പോള്‍ ബാക്കിയാക്കുന്നത് ഒരുപിടി ക്യാപ്റ്റന്‍സി റെക്കോഡുകള്‍ മാത്രമല്ല. തന്റേതായ മുദ്ര പതിപ്പിച്ച ക്രിക്കറ്റ് സ്‌റ്റൈല്‍ കൂടിയാണ്. കളിക്കളത്തിലെ വ്യത്യസ്തമായ പെരുമാറ്റരീതിയും കളിയോടുള്ള സമീപനവും വഴി ക്യാപ്റ്റന്‍ കൂളിന് സ്വന്തമാക്കാനായത് ക്രിക്കറ്റ്‌പ്രേമികളുടെ ഹൃദയം കൂടിയാണ്. അന്താരാഷ്ട്ര ക്രിക്കറ്റില്‍ ഇനിയില്ലെങ്കിലും ഐ.പി.എല്‍ ഉള്‍പ്പെടെയുള്ള ടൂര്‍ണമെന്റുകളില്‍ കളിതുടരുമെന്ന ധോനിയുടെ പ്രഖ്യാപനം പ്രതീക്ഷയോടെയാണ് ആരാധകര്‍ നോക്കിക്കാണുന്നത്.

ഏകദിന ക്രിക്കറ്റില്‍ വിക്കറ്റിനു പിന്നില്‍ പുറത്താക്കിവരുടെ എണ്ണത്തില്‍ ദക്ഷിണാഫ്രിക്കയുടെ മാര്‍ക്ക് ബൗച്ചറിന്റെയും ആദം ഗില്‍ക്രിസ്റ്റിനും പിന്നിലാണ് ധോനി. എന്നാല്‍ വിക്കറ്റ് കീപ്പര്‍മാരുടെ കഴിവിനെ അളക്കാവുന്ന സ്റ്റംപിങിന്റെ കാര്യം വരുമ്പോള്‍ കണക്കുകള്‍ മറ്റൊന്നാണ്. 350 ഏകദിന മത്സരങ്ങളില്‍നിന്നായി തന്റെ സ്വതസിദ്ധമായ മിന്നല്‍ സ്റ്റമ്പിങിലൂടെ ധോണി പുറത്താക്കിയത് 123 പേരെയാണ്. ഏകദിനത്തില്‍ 100നുമേല്‍ ബാറ്റ്‌സ്മാന്‍മാരെ സ്റ്റമ്പിങിലൂടെ പുറത്താക്കിയ ഏക വിക്കറ്റ് കീപ്പര്‍ ധോണിയാണ്.

332 അന്താരാഷ്ട്ര മത്സരങ്ങളിലാണ് ധോണി ഇന്ത്യയെ നയിച്ചത്. 200 ഏകദിനത്തിലും 60 ടെസ്റ്റ് മത്സരങ്ങളിലും 72 ട്വന്റി20 മത്സരങ്ങളിലും. ഇതില്‍ 178 എണ്ണത്തിലും വിജയം ഇന്ത്യയ്‌ക്കൊപ്പമായിരുന്നു. ബാറ്റിങ് ഓഡറില്‍ ഏറെ താഴെയായാണ് ഇറങ്ങുന്നതെങ്കിലും ഇന്ത്യയ്ക്കുവേണ്ടി 10,000 ഏകദിന റണ്‍സ് നേടിയവരുടെ പട്ടികയില്‍ ധോണിയുമുണ്ട്. ഏകദിനത്തിലെ മികച്ച ഫിനിഷര്‍ കൂടിയായ ധോനി 84 മത്സങ്ങളില്‍ പുറത്താകാതെ നിന്നതിന്റെ റെക്കോഡിനും ഉടമയാണ്. ക്യാപ്റ്റനെന്ന നിലയില്‍ ധോണി നേടിയ 204 സിക്‌സറുകളുടെ റെക്കോഡ് എളുപ്പത്തില്‍ തകര്‍ക്കപ്പെടാനിടയില്ല. 2006 മുതല്‍ 2015 വരെ തുടര്‍ച്ചയായ 10 വര്‍ഷങ്ങളില്‍ ഐ.സി.സി റാങ്കിങില്‍ ആദ്യ 10ല്‍ ഇടംനേടിയ മറ്റൊരു ബാറ്റ്‌സ്മാന്‍ ഇല്ലെന്നത് ശ്രദ്ധേയമാണ്. ഇന്ത്യന്‍ പ്രീമിയര്‍ ലീഗിലും ധോണിയുടെ ക്യാപ്റ്റന്‍സി റെക്കോഡ് മറ്റാര്‍ക്കും എത്തിപ്പിടിക്കാനായിട്ടില്ല. 12 വര്‍ഷമായി ചെന്നൈ സൂപ്പര്‍കിങ്‌സിന്റെ നായകനായി തുടരുന്ന ധോണി ടീമിനെ നാലു തവണ കിരീട നേട്ടത്തിലും അതിലേറെ തവണ ഫൈനലിലും എത്തിച്ചിട്ടുണ്ട്. ഐ.പി.എല്ലില്‍ ഇതുവരെ 4432 റണ്‍സും ധോണി നേടിയിട്ടുണ്ട്. തലയുടെ ആട്ടം ഇനിയും കാണാനുള്ള കാത്തിരിപ്പിലാണ് ആരാധകര്‍.