സ്വർണ വില വീണ്ടും കുതിച്ചു കയറുന്നു . സംസ്ഥാനത്തെ സ്വർണവിലയിൽ ഇന്ന് കുതിപ്പ്. ഇന്നലെ രാവിലെ 1520 രൂപയുടെ കുറവുണ്ടായ വിപണിയിൽ വൈകുന്നേരം 1000 രൂപ വർദ്ധിച്ചിരുന്നു. ഇതിന് പിന്നാലെയാണ് ഇന്നത്തെ കുതിച്ചു ചാട്ടം. ഇന്ന് 2,120 രൂപയാണ് ഒരു പവൻ സ്വർണത്തിന് കൂടിയത്. 1,14,840 രൂപയാണ് ഒരു പവൻ സ്വർണത്തിന് ഇന്ന് നൽകേണ്ടത്. 14,355 രൂപയാണ് ഇന്ന് ഒരു ഗ്രാം സ്വർണത്തിന് നൽകേണ്ട നിരക്ക്. സ്വർണവില വീണ്ടും പഴയ റെക്കോർഡ് നിരക്കുകളിലേക്ക് തിരിച്ചെത്തുമോ എന്നാണ് ആഭരണം വാങ്ങാനായി കാത്തിരിക്കുന്നവരുടെ പ്രധാന ആശങ്ക.

അന്താരാഷ്ട്ര വിപണിയിൽ സ്വർണ്ണവില ഔൺസിന് 4,600 ഡോളർ നിലവാരത്തിൽ നിന്ന് വീണ്ടും ശക്തിയാർജ്ജിക്കുന്നതാണ് ആഭ്യന്തര വിപണിയിലും പ്രതിഫലിച്ചത്. അമേരിക്കൻ പ്രസിഡന്റ് ഡൊണാൾഡ് ട്രംപ് 14 രാജ്യങ്ങൾക്കുമേൽ പുതിയ താരിഫ് നിയന്ത്രണങ്ങൾ പ്രഖ്യാപിച്ചത് ആഗോള വിപണിയിൽ അനിശ്ചിതത്വം സൃഷ്ടിച്ചു.താരിഫ് യുദ്ധം ശക്തമാകുമെന്ന സൂചനകൾ നിക്ഷേപകരെ വീണ്ടും സുരക്ഷിത നിക്ഷേപമെന്ന നിലയിൽ സ്വർണ്ണത്തിലേക്ക് ആകർഷിച്ചു. ഇതോടൊപ്പം ഡോളർ ഇൻഡക്സിലുണ്ടായ ഇടിവും സ്വർണ്ണത്തിന് കരുത്തേകി.

പലിശ നിരക്കുകൾ സംബന്ധിച്ച യുഎസ് ഫെഡറൽ റിസർവിന്റെ പുതിയ നിലപാടുകളും വിപണിയിലെ കുതിപ്പിന് കാരണമായിട്ടുണ്ട്.ജനുവരി അവസാന വാരം സ്വർണ്ണവില പവന് 1.30 ലക്ഷം രൂപ കടന്ന് റെക്കോർഡ് ഇട്ടിരുന്നു. തുടർന്ന് ഫെബ്രുവരി ആദ്യ വാരം വലിയ തിരുത്തലുകൾ ഉണ്ടായെങ്കിലും വില വീണ്ടും ഒരു ലക്ഷത്തിന് മുകളിൽ തന്നെ തുടരുന്നത് സാധാരണക്കാർക്ക് വലിയ വെല്ലുവിളിയാണ്.വിവാഹ സീസൺ തുടരുന്ന സാഹചര്യത്തിൽ വിലയിലുണ്ടാകുന്ന ഈ അപ്രതീക്ഷിത വർദ്ധനവ് വിപണിയിലെ വ്യാപാരത്തെയും ബാധിച്ചേക്കാം.

അന്താരാഷ്ട്ര തലത്തിൽ ഭൗമരാഷ്ട്രീയ സംഘർഷങ്ങൾ നിലനിൽക്കുന്നതും സാമ്പത്തിക നയങ്ങളിലെ അവ്യക്തതയും സ്വർണ്ണവിലയിൽ വരും ദിവസങ്ങളിലും വലിയ ചാഞ്ചാട്ടങ്ങൾക്ക് വഴിതെളിച്ചേക്കാം.