ചാനലുകളെ നിയന്ത്രിക്കണമെന്ന് ആവശ്യപ്പെട്ട് പ്രസ് കൗണ്‍സിലിനും കേന്ദ്രസര്‍ക്കാരിനും റിപ്പോര്‍ട്ട് നല്‍കും
മുന്‍ മന്ത്രി എ.കെ ശശീന്ദ്രന്റെ കസേര തെറിപ്പിച്ച മംഗളം പെണ്‍കെണി സംസ്ഥാനത്തെ ദൃശ്യമാധ്യമങ്ങള്‍ക്ക് പണിയാകുന്നു. ദൃശ്യമാധ്യമങ്ങള്‍ക്ക് നിയന്ത്രണം ഏര്‍പ്പെടുത്തണമെന്ന്, സംഭവത്തെ കുറിച്ച് അന്വേഷിച്ച ജസ്റ്റിസ് പി.എസ് ആന്റണി കമ്മിഷന്‍ റിപ്പോര്‍ട്ട് സര്‍ക്കാരിനോട് ശുപാര്‍ശ ചെയ്തു. റിപ്പോര്‍ട്ട് കേന്ദ്രസര്‍ക്കാരിനും പ്രസ് കൗണ്‍സിലിനും അയച്ചുകൊടുക്കാനും സര്‍ക്കാര്‍ തീരുമാനിച്ചു. ഫലത്തിലിത് ദൃശ്യമാധ്യമങ്ങള്‍ക്കുള്ള നിയന്ത്രണമാകും. ഇ.പി ജയരാജനെയും എ.കെ. ശശീന്ദ്രനെയും തോമസ് ചാണ്ടിയെയും മന്ത്രിപദത്തില്‍ നിന്ന് തെറിപ്പിച്ചതില്‍ ചാനലുകള്‍ക്ക് പ്രധാന പങ്കുണ്ട്. അതിന്റെ അസഹിഷ്ണുത മുഖ്യമന്ത്രി പരസ്യമായി പ്രകടിപ്പിച്ചിട്ടുണ്ട്. കണ്ണൂരിലെ രാഷ്ട്രീയ സംഘര്‍ഷം പരിഹരിക്കാന്‍ ചേര്‍ന്ന ഉഭയകക്ഷി യോഗത്തില്‍ നിന്ന് ചാനലുകളോട് കടക്ക് പുറത്തെന്ന് ആക്രോശിച്ചതും, കഴിഞ്ഞ ദിവസം കൊച്ചിയില്‍ സി.പി.എം ജില്ലാ കമ്മിറ്റി ഓഫീസില്‍ വെ്ച്ച് മാറി നില്‍ക്കാന്‍ എന്ന് ദേഷ്യപ്പെട്ടതും ഇതിന് ഉദാഹരണമാണ്.
ദൃശ്യമാധ്യമങ്ങളിലെ വാര്‍ത്തകള്‍ക്ക് തീര വിശ്വാസ്യതയില്ലെന്ന് മന്ത്രി ജി.സുധാകരന്‍ കഴിഞ്ഞയാഴ്ച അഭിപ്രായപ്പെട്ടിരുന്നു. പത്രപ്രവര്‍ത്തക യൂണിയന്‍ തിരുവനന്തപുരം ജില്ലാ കമ്മിറ്റി നടത്തിയ മാധ്യമ സെമിനാറിലാണ് അദ്ദേഹം വിമര്‍ശനം ഉന്നയിച്ചത്. ചാനല്‍ ചര്‍ച്ചകളില്‍ മുഖ്യമന്ത്രി അടക്കമുള്ള മന്ത്രിമാരെയും രാഷ്ട്രീയ നേതാക്കളെയും അധിക്ഷേപിക്കുന്ന പ്രവണത കൂടിവരുകയാണ്. ഭിന്നാഭിപ്രായം പറയുന്നവരെ സംസാരിക്കാന്‍ അനുവദിക്കുന്നില്ല. തങ്ങളുടെ അജണ്ടകള്‍ അടിച്ചേല്‍പ്പിക്കാന്‍ ശ്രമിക്കുന്നു. തുടങ്ങി നിരവധി പരാതികള്‍ ചാനലുകള്‍ക്കെതിരെ ഉയരാന്‍ തുടങ്ങിയിട്ട് നാളേറെയായി. പലപ്പോഴും ഔചിത്യബോധമില്ലാതെ മുഖ്യമന്ത്രിയെയും മറ്റും തടഞ്ഞ് ബൈറ്റ് ചോദിക്കുക, ഇത് കാരണം പൊലീസിന് മതിയായ സുരക്ഷയൊരുക്കാന്‍ കഴിയാതെ വരുക. എന്നീ പരാതികളും ഉയര്‍ന്നിട്ടുണ്ട്.
എം. എ ബേബി വിദ്യാഭ്യാസമന്ത്രിയായിരുന്ന സമയത്ത് എസ്.ഡി.പി.ഐ പ്രവര്‍ത്തകര്‍ തേജസ് ദിനപത്രത്തിന്റെ ഐഡന്റിറ്റി കാര്‍ഡ് ഉപയോഗിച്ച് പി.ആര്‍.ഡിയിലെ പ്രസ് റൂമില്‍ കയറി മുദ്രാവാക്യം വിളിച്ചിരുന്നു. അതിന് ശേഷമാണ് സെക്രട്ടറിയേറ്റില്‍ മാധ്യമപ്രവര്‍ത്തകര്‍ക്ക് നിയന്ത്രണം ഏര്‍പ്പെടുത്തിയത്. പലപ്പോഴും വിവരങ്ങള്‍ ക്രോസ് ചെക്ക് ചെയ്യാതെ നല്‍കുകയും അത് തെറ്റാണെന്ന് അറിയുമ്പോള്‍ തിരുത്ത് നല്‍കാതെ വാര്‍ത്ത പിന്‍വലിക്കുക മാത്രമാണ് ദൃശ്യമാധ്യമങ്ങള്‍ ചെയ്യുന്നതെന്ന് രമേശ് ചെന്നിത്തല ആഭ്യന്തരമന്ത്രിയായിരിക്കുമ്പോള്‍ തന്നെ വിമര്‍ശനം ഉന്നയിച്ചിരുന്നു.
https://www.facebook.com/Malayalivartha
