പ്രതികള്ക്ക് ഒരു കീഴടങ്ങലിന്റെ സുഖം പോലും നല്കാതെ ഏത് ഉന്നതങ്ങളില് കയറിയും കസ്റ്റഡിയിലെടുക്കാന് തീരുമാനിച്ചത് കൊച്ചി റെയ്ഞ്ച് ഐ.ജി പി.വിജയന്റെ നിശ്ചയദാര്ഢ്യത്തോടെയുള്ള കര്ശന നിര്ദ്ദേശം
കോടതി മുറിക്കുള്ളില് അഭയം തേടിയ പ്രതിയെ പോലീസ് കീഴ്പ്പെടുത്തി അറസ്റ്റ് ചെയ്യുന്നത് ഇന്ത്യയില് തന്നെ ആദ്യ സംഭവമാണ്. സാധാരണ ഗതിയില് കോടതി കെട്ടിടത്തിനുള്ളില് പ്രതി പ്രവേശിച്ചു കഴിഞ്ഞാല് അവിടെ കയറി ബലപ്രയോഗം നടത്താന് പോലീസ് തയാറാകില്ല. കൊച്ചിയില് നടന്ന സംഭവത്തില് പോലീസിന്റെ പ്രവര്ത്തിയെ വിമര്ശനാത്മകമായാണ് എല്ലാവരും ചിത്രീകരിച്ചത്.
എന്നാല് കേരളത്തിന്റെ മനസാക്ഷിയെ ഞെട്ടിച്ച കുപ്രസിദ്ധമായ അതിക്രമത്തിലെ പ്രതിയ്ക്ക് ഒരു കീഴടങ്ങലിന്റെ സുഖം പോലും നല്കാതെ ഏത് ഉന്നതങ്ങളില് കയറിയും കസ്റ്റഡിയിലെടുക്കാന് തീരുമാനിച്ചത് കൊച്ചി റെയ്ഞ്ച് ഐജി പി വിജയന്റെ കര്ശന നിര്ദ്ദേശമായിരുന്നു.
പ്രതി കോടതി വസതിയിലെത്തിയെന്നറിഞ്ഞതോടെ സി.ജെ.എം കോടതി വരാന്തയില് നിന്ന പോലീസ് ഉദ്യോഗസ്ഥര് ആദ്യമൊന്ന് മടിച്ച് നിന്നു. കോടതിയാണ്,ഇവിടെ പോലീസിന്റെ കളിയൊന്നും നടക്കില്ല. കോടതി പരിസരത്ത് സുനിലിനായി തിരച്ചിലിന്റെ ചുമതലയുണ്ടായിരുന്ന ഉദ്യോഗസ്ഥന് ഉടന് വിളിച്ചത് ഐ .ജിയെയാണ്. മജിസ്ട്രേറ്റ് കോടതിയിലുണ്ടോ എന്നായിരുന്നു ഐ.ജിയുടെ ഏക ചോദ്യം. ഇല്ലെന്നു ഉദ്യോഗസ്ഥരുടെ മറുപടി.
'എന്നാല് പ്രതി മജിസ്ട്രേറ്റിന്റെ മുന്നിലെത്തും മുമ്പ് എങ്ങനെയും കസ്റ്റഡിയില് എടുത്തിരിക്കണം. അതിന്റെ റിസ്ക് ഞാന് ഏറ്റു, ഉടന് അവരെ പിടികൂടൂ-'എന്നായിരുന്നു ഐ.ജിയുടെ മറുപടി. ഉടന് പോലീസ് കോടതി ഹാളിലേക്ക് കുതിക്കുകയായിരുന്നു. ചെറുക്കാന് ശ്രമിച്ച പ്രതികളെയും അഭിഭാഷകരെയും സ്തബ്ധരാക്കിക്കൊണ്ടുള്ളതായിരുന്നു പിന്നെ പോലീസിന്റെ നീക്കം.
അഭിഭാഷകര്ക്ക് പോലും ഒന്ന് പരസ്പരം ആലോചിക്കാന് സമയം ലഭിക്കും മുമ്പ് പ്രതികളുമായി പോലീസ് കോടതി മുറ്റത്തെത്തി. പ്രതി കോടതിയില് കീഴടങ്ങിയാല് പോലീസിന്റെ ചോദ്യം ചെയ്യലിന് പരിമിതികളുണ്ട്. ഗൂഡാലോചന ഉള്പ്പെടെ ആരോപിക്കപ്പെടുന്ന സംഭവത്തില് പ്രതിയെക്കൊണ്ട് ഉള്ളിലുള്ളത് മുഴുവന് പറയിപ്പിക്കണമെങ്കില് പോലീസ് മുറയിലുള്ള ചോദ്യം ചെയ്യല് കൂടിയേ തീരൂ. അതൊഴിവാക്കാനുള്ള തീവ്ര ശ്രമത്തിലായിരുന്നു പോലീസ്.
പ്രതികളുടെ തൊട്ടു പിന്നാലെ നീങ്ങിയ പോലീസിന്റെ പക്കല് നിന്നും മൂന്ന് തവണ കഷ്ടിച്ചാണ് സുനിയും വിജീഷും രക്ഷപെട്ടത്. ഇതിനിടെ സുനിയ്ക്ക് ഏറെ മാനസിക അടുപ്പമുള്ള സഹോദരിയെയും രണ്ടു കാമുകിമാരെയും പോലീസ് പൊക്കി. അതുകൂടി ആയതോടെ സുനി കടുത്ത സമ്മര്ദ്ദത്തിലായി. ഇനി പോലീസിനെ വെട്ടിച്ച് മുന്നോട്ട് പോകാനാകില്ലെന്നുറപ്പിച്ചതോടെ പോലീസ് പിടിയിലാകാതെ എങ്ങനെയും കീഴടങ്ങാനായിരുന്നു പ്രതികളുടെ നീക്കം.
ഇതിനായാണ് ബുധനാഴ്ച തിരുവനന്തപുരത്തെത്തിയത്. പക്ഷെ അതും പോലീസ് മണത്തറിഞ്ഞു. സുനിയുടെ അഭിഭാഷകനെ കണ്ടെത്തി കൃത്യമായി നിരീക്ഷണത്തിലൂടെയാണ് ഇത്തരം നീക്കങ്ങള് പോലീസിനു മനസിലാക്കാന് കഴിഞ്ഞത്.
സുനിയും വിജീഷും തിരുവനന്തപുരത്ത് കോടതി പരിസരത്തെത്തിയപ്പോള് തന്നെ പ്രദേശത്ത് പോലീസ് സാന്നിധ്യം ഇവരുടെ ശ്രദ്ധയില്പ്പെട്ടു. ഇതോടെ അവിടെ നിന്ന് മുങ്ങി. അത് മനസിലാക്കിയ പോലീസ് പിന്നെ ഇവര് കീഴടങ്ങാന് സാധ്യതയുള്ള കോടതികള് കണ്ടെത്തി അവിടെ മുഴുവന് പോലീസിനെ വിന്യസിപ്പിക്കുകയായിരുന്നു.
പ്രതികള് തിരുവനന്തപുരത്ത് കീഴടങ്ങാന് നീക്കം നടത്തിയതോടെ കൊച്ചിയിലും ആലുവയിലും അങ്കമാലി, പെരുമ്പാവൂര് എന്നിവിടങ്ങളിലെ കോടതികളിലും കീഴടങ്ങാന് സാധ്യതയില്ലെന്നായിരുന്നു പോലീസില് ഒരു വിഭാഗത്തിന്റെ നിഗമനം.
പ്രതികളുടെ വിശ്വാസവും അതായിരുന്നു. ഒരിക്കലും തങ്ങള് കൊച്ചിയില് തന്നെ കീഴടങ്ങാന് വരുമെന്ന് പോലീസ് കരുതില്ലെന്നായിരുന്നു അവരുടെ വിശ്വാസം. എന്നാല് എറണാകുളം ജില്ലയിലെ മുഴുവന് കോടതികളിലും പോലീസിനെ നിയോഗിച്ച് ശക്തമായ സന്നാഹം ഒരുക്കിയത് ഐ.ജി വിജയന്റെ നിര്ദ്ദേശ പ്രകാരമായിരുന്നു. അതാണ് ഒടുവില് ഫലം കണ്ടത്. കീഴടങ്ങലിന്റെ സംരക്ഷണം തേടിയെത്തിയ പ്രതികള് ഒടുവില് പോലീസിന്റെ വലയില് കുരുങ്ങി.
തുടക്കത്തില് മാധ്യമങ്ങള് ഇതിനെ വലിയ രീതിയില് വിമര്ശിക്കാന് ശ്രമിച്ചെങ്കിലും കോടതിയ്ക്കുള്ളില് കയറി ഒളിച്ച പ്രതികളെ വലിച്ചിഴച്ച് പുറത്തിറക്കി കസ്റ്റഡിയിലെടുത്ത പോലീസ് നടപടിയെ സോഷ്യല് മീഡിയ വാനോളം പുകഴ്ത്തിയതോടെ ചാനലുകള് ആ ശ്രമം ഉപേക്ഷിച്ചു.
https://www.facebook.com/Malayalivartha