ഏത് കഥാപാത്രമായാലും അതിന്റെ ആഴത്തില്‍ അഭിനയിച്ച് ഫലിപ്പിക്കുന്നതില്‍ വിജയരാഘവന്‍ എന്ന താരത്തിന് പ്രത്യേക കഴിവാണ്. അതുകൊണ്ട് തന്നെ മലയാളികളുടെ എക്കാലത്തെയും പ്രിയപ്പെട്ട നടന്‍മാരിലൊരാളാണ് വിജയരാഘവന്‍. തന്റെ യഥാര്‍ഥ പ്രായത്തേക്കാള്‍ കൂടുതല്‍ പ്രായമുള്ള നിരവധി കഥാപാത്രങ്ങളെ വിജയരാഘവന്‍ അനശ്വരമാക്കിയിട്ടുണ്ട്. അവാര്‍ഡ് കിട്ടുന്നതിനേക്കാളും വലിയൊരു നിമിഷമാണ് വളരെ വ്യത്യസ്തമായിട്ടുള്ള ഒരു കഥാപാത്രം ചെയ്യുമ്പോള്‍ തനിക്ക് കിട്ടുന്നതെന്ന് പറയുകയാണ് വിജയരാഘവന്‍.

ഒരു യൂട്യൂബ് ചാനലിന് നല്‍കിയ അഭിമുഖത്തില്‍ സംസാരിക്കുകയായിരുന്നു നടന്‍. 'കിഷ്‌കിന്ധാ കാണ്ഡം', 'പൂക്കാലം' തുടങ്ങി എനിക്കിപ്പോള്‍ അവാര്‍ഡ് കിട്ടിയ സിനിമയൊക്കെ 10 വര്‍ഷം മുന്‍പ് കിട്ടിയിരുന്നെങ്കിലും ഞാന്‍ അഭിനയിക്കും. 'വെനീസിലെ വ്യാപാരി' ചെയ്യുമ്പോള്‍ മമ്മൂട്ടി എന്നോട് ചോദിച്ചിട്ടുണ്ട്, 'ഇയാള്‍ക്കെന്തിനാ ഈ വയസന്‍ റോളൊക്കെ'? ഞാന്‍ പറഞ്ഞു, എനിക്ക് അതാണ് ഇഷ്ടം. എനിക്ക് എന്റെ നടപ്പോ, ഇരിപ്പോ, എന്റെ സംസാര രീതിയോ അല്ലാതെ വ്യത്യസ്തനാകുന്ന കഥാപാത്രങ്ങള്‍ ചെയ്യുമ്പോഴാണ് ഒരു നടനെന്ന രീതിയില്‍ എനിക്ക് എന്നെക്കുറിച്ച് അഭിമാനം തോന്നുന്ന നിമിഷം അതാണ്.

എനിക്കിപ്പോള്‍ അവാര്‍ഡ് കിട്ടുന്നതിനേക്കാളും വലിയൊരു നിമിഷമാണ് വളരെ വ്യത്യസ്തമായിട്ടുള്ള ഒരു കഥാപാത്രം ചെയ്യുമ്പോള്‍ കിട്ടുന്നത്. ഞാന്‍ ആസ്വദിക്കുന്ന ഒരു സുഖമുണ്ട്. സ്‌റ്റേജിലൊക്കെ നില്‍ക്കുമ്പോള്‍ പ്രേക്ഷകനും നമ്മളും തമ്മില്‍ സംവദിക്കുന്ന ഒരവസ്ഥയുണ്ട്. അതാണ് ഒരു നടന് കിട്ടുന്ന ഏറ്റവും വലിയ സുഖം'. വിജയരാഘവന്‍ പറഞ്ഞു.