ഉയര്‍ന്ന സമ്മര്‍ദ്ദം എല്ലാവരുടെയും പേടി സ്വപ്നമാണ്. എന്നാല്‍ താഴ്ന്ന രക്ത സമ്മര്‍ദ്ദമാണ് ഏറ്റവും അപകടകാരി എന്ന് പലര്‍ക്കും അറിയില്ല. സൂക്ഷിച്ചില്ലെങ്കില്‍ അത് നമ്മുടെ ജീവനും കൊണ്ടേ പോവുകയുള്ളു. മാറിവരുന്ന ജീവിതശൈലിയാണ് രക്തസമ്മര്‍ദ്ദത്തിലെ വ്യതിയാനങ്ങള്‍ക്കുള്ള പ്രധാന കാരണം.
ബിപി അഥവ രക്ത സമ്മര്‍ദ്ദം ശരീരത്തിലൂടെ ക്രമാനുഗതമായി രക്തം ഒഴുകുമ്പോഴുണ്ടാകുന്ന സമ്മര്‍ദ്ദമാണ്. ഇത് ചിലപ്പോള്‍ സാധാരണ സമ്മര്‍ദ്ദത്തേക്കാള്‍ കുറയാം അല്ലെങ്കില്‍ കൂടാം. ശരീരത്തിന്റെ പ്രവര്‍ത്തനത്തില്‍ രക്ത സമ്മര്‍ദ്ദത്തിന് വളരെ വലിയ പങ്കാണുള്ളത്. അതിനാല്‍ രക്തസമ്മര്‍ദ്ദം അമിതമായി കുറയുന്നതും കൂടുന്നതും വളരെ ദോഷകരമായിട്ടാണ് ശരീരത്തെ ബാധിക്കുക
രക്ത സമ്മര്‍ദത്തിന്റെ സാധാരണ ക്രമം 120/80 എന്ന നിലയിലാണ്. രക്തം ധമനികളിലേയ്ക്ക് പമ്പു ചെയ്യുന്നതിന് കൂടുതല്‍ മര്‍ദ്ദമുപയോഗിക്കേണ്ടിവരുന്നു. പമ്പ് ചെയ്തതിനു ശേഷം ഹൃദയം വിശ്രമിക്കുമ്പോള്‍ മര്‍ദ്ദം കുറയുകയും രക്തം തിരികെ ഹൃദയത്തിനുള്ളില്‍ നിറയുകയും ചെയ്യുന്നു. സിസ്‌റ്റോളിക് പ്രഷര്‍ പ്രായപൂര്‍ത്തിയായ ഒരു വ്യക്തിയില്‍ 120 ല്‍ നിന്നും 90 വരെയും ഡൈസ്‌റ്റോളിക് 80ല്‍ നിന്നും 60 വരെയും താഴാം. ഈ ഒരു രേഖയില്‍ നിന്നും താഴേക്കാണ് നിങ്ങളുടെ രക്ത സമ്മര്‍ദത്തിന്റെ അളവെങ്കില്‍ അത് വളരെ അപകടം പിടിച്ച അവസ്ഥയാണ്. ചിലര്‍ക്കു സ്ഥിരമായി 90/50 എന്ന മര്‍ദ്ദം കാണപ്പെടും. പക്ഷേ പ്രത്യേക ക്ഷീണങ്ങളൊന്നും ഉണ്ടാകുകയില്ല. അതു കൊണ്ട് ഇവര്‍ക്കു താഴ്ന്ന രക്തസമ്മര്‍ദ്ദം അഥവാ ഹൈപോ ടെന്‍ഷന്‍ ഉണ്ടെന്ന് ഊഹിയ്ക്കാന്‍ സാദ്ധ്യമല്ല. എന്നാല്‍ സാധാരണ നിലയില്‍ 120/80 ഉള്ള വ്യക്തിയുടെ രക്തസമ്മര്‍ദ്ദം കുറഞ്ഞ് 100/60 നിലയിലെത്തിയാല്‍ ഇതുണ്ടെന്നുറപ്പു വരുത്താം. തികച്ചും വൈദ്യസഹായം തേടേണ്ടുന്ന അവസ്ഥയാണിത്.

രക്തപ്രവാഹത്തിന്റെ കുറവു മൂലം തലച്ചോറ്, ഹൃദയം, വൃക്കകള്‍ തുടങ്ങിയ ശരീരത്തിലെ പ്രധാന അവയവങ്ങളില്‍ പ്രാണവായുവും പോഷണങ്ങളും എത്തുന്നതു കുറയുന്നു. ഇതു മൂലം ഈ അവയവങ്ങള്‍ക്കു തകരാറു സംഭവിക്കാം. ലക്ഷണങ്ങള്‍ കൊണ്ടു മാത്രം എളുപ്പത്തില്‍ കണ്ടെത്താന്‍ കഴിയുന്ന അവസ്ഥയാണിത്.
തലയ്ക്കു കനം കുറവു തോന്നുക, തലകറക്കം, എഴുന്നേറ്റു നില്‍ക്കുമ്പോള്‍ ബോധം കെടുക, ഛര്‍ദിക്കാന്‍ തോന്നുക തുടങ്ങിയവയാണ് താഴ്ന്ന രക്തസമ്മര്‍ദ്ദത്തിന്റെ ലക്ഷണം. നിവര്‍ന്നു നില്‍ക്കുമ്പോള്‍ രക്തപ്രവാഹത്തിന്റെ തോത് വര്‍ദ്ധിക്കുന്നു. ഇതിനു മതിയായ സമ്മര്‍ദ്ദം ചെലുത്തുവാന്‍ സാധാരണ വ്യക്തിയുടെ ഹൃദയത്തിനു സാധിക്കുന്നു. എന്നാല്‍ ഇങ്ങനെയുള്ള രക്തചംക്രമണ സ്ഥിതി നിലനിര്‍ത്തിപ്പോരാന്‍ ഹൈപോടെന്‍ഷനുള്ള വ്യക്തിയുടെ ഹൃദയത്തിനു സാധിയ്ക്കാതെ വരുന്നു. അതാണീ ആരോഗ്യ പ്രശ്‌നങ്ങളുടെ കാരണം.
ശരീരഭാരം നിയന്ത്രിക്കുക, പുകവലി,മദ്യപാനം എന്നിവ ഒഴിവാക്കുക, ആഹാരത്തിലെ ഉപ്പിന്റെ അളവ് കുറയ്ക്കുക, ആവശ്യത്തിന് ഭക്ഷണം കഴിക്കുക, ധാരാളം വെള്ളം കുടിക്കുക. ശരീര ഭാരം വര്‍ധിപ്പിക്കുക ( അധികമാകരുത്) എന്നിവ വളരെ പ്രധാനപ്പെട്ട കാര്യങ്ങളാണ്.