വീട്ടമ്മയെ ബ്ലാക്ക്‌മെയില്‍ ചെയ്ത ശേഷം കിടക്ക പങ്കിടാന്‍ ഡിവൈഎഫ്‌ഐ നേതാവ് ആവശ്യപ്പെട്ടതായി പരാതി. ഡിവൈഎഫ്‌ഐ ഇടുക്കി ഏലപ്പാറ ബ്ലോക്ക് ഭാരവാഹിയും ജില്ലാകമ്മിറ്റിയംഗവുമായ യുവാവിനെതിരെയാണ് വീട്ടമ്മ പരാതി നല്‍കിയത്. വിദേശത്തേക്ക് ജോലിക്കുപോയ യുവതിയെ മൂന്നംഗസംഘം പീഡിപ്പിച്ചിരുന്നു. യുവതി നാട്ടിലെത്തിയപ്പോള്‍ ഇത് ചൂണ്ടിക്കാട്ടി തനിക്കും രണ്ടു സുഹൃത്തുക്കള്‍ക്കും വഴങ്ങിത്തരാന്‍ ഡിവൈഎഫ്‌ഐ നേതാവ് ആവശ്യപ്പെട്ടതെന്ന് യുവതിയായ വീട്ടമ്മ പൊലീസില്‍ നല്‍കിയ പരാതിയില്‍ പറയുന്നത്. മുണ്ടക്കയത്തിന് സമീപപ്രദേശത്തെ യുവതിയായ വീട്ടമ്മയാണ് അബുദാബിയില്‍ പീഡനത്തിനരയായത്. കഴിഞ്ഞ മാര്‍ച്ച് 20-നാണ് യുവതി ഏലപ്പാറ സ്വദേശിയായ ഏജന്റുവഴി വിദേശത്തേക്കു പോയത്. 

അവിടെയെത്തിയ ദിവസം തന്നെ മലയാളികളായ മൂന്നംഗസംഘം വീട്ടമ്മയായ യുവതിയെ കൂട്ടമാനഭംഗത്തിനു ഇരയാക്കിയെന്നും പരാതിയില്‍ പറയുന്നു. സംഭവത്തില്‍ മനംനൊന്ത ഇവര്‍ സുഹൃത്തുക്കളുടെ സഹായത്തോടെ അടുത്തദിവസംതന്നെ തിരികെ നാട്ടിലേക്കു മടങ്ങി. ഇവിടെ എത്തി ഏതാനും ദിവസങ്ങള്‍ കഴിഞ്ഞപ്പോള്‍ ഡിവൈഎഫ്‌ഐ ഏലപ്പാറ ബ്ലോക്ക് കമ്മിറ്റി ഭാരവാഹിയും ജില്ലാ കമ്മിറ്റി അംഗവുമായ യുവാവ് വാഗമണിലെ റിസോര്‍ട്ടില്‍ എത്തണമെന്ന് ആവശ്യപ്പെട്ടെന്നാണ് യുവതി പരാതിയില്‍ പറയുന്നത്. താനും രണ്ടു സുഹൃത്തുക്കളും ഉണ്ടെന്നും വഴങ്ങണമെന്നും ഒരുരാത്രിക്ക് 20,000 രൂപ നല്‍കാമെന്നും ഫോണിലൂടെ ആവശ്യപ്പെട്ടതായും യുവതി പറയുന്നു. എതിര്‍ത്തപ്പോള്‍ വിദേശത്തേക്ക് അയച്ച ഏജന്റ് അവിടെ നടന്ന വിവരം അറിയിച്ചിരുന്നുവെന്നും പറഞ്ഞ് ഇയാള്‍ ഭീഷണിപ്പെടുത്തിയതായും യുവതിയുടെ പരാതിയില്‍ പറയുന്നുണ്ട്. 

ഇതെല്ലാം കാട്ടി പീരുമേട് സിഐക്ക് പരാതി നല്‍കിയെങ്കിലും ഡിവൈഎഫ്‌ഐ നേതാവിന്റെ പേരില്‍ പൊലീസ് കേസെടുക്കാന്‍ തയ്യാറായിട്ടില്ലെന്നും യുവതി ആരോപിക്കുന്നു. നേതാവിന്റെ പേര് ഒഴിവാക്കണമെന്നും തങ്ങള്‍ക്കുമേല്‍ കടുത്ത സമ്മര്‍ദമാണെന്ന് പൊലീസ് പറയുന്നതായും വീട്ടമ്മ ആരോപിക്കുന്നു. എന്നാല്‍ പരാതി ലഭിച്ച ദിവസംതന്നെ ഇരയുടെ മൊഴിയനുസരിച്ച് കുട്ടമാനഭംഗത്തിനു വിദേശ മലയാളികളായ മൂന്നുപേരുടെ പേരില്‍ കേസെടുത്തതായാണ് പൊലീസ് വിശദീകരണം. എന്നാല്‍ ഡിവൈഎഫ്‌ഐ നേതാവ് റിസോര്‍ട്ടില്‍ എത്താന്‍ ആവശ്യപ്പെട്ട കാര്യം യുവതിയുടെ പരാതിയില്‍ ഇല്ലെന്നും പീരുമേട് സിഐ ഷിബുകുമാര്‍ വ്യക്തമാക്കി. വിശദമായ അന്വേഷണത്തിന് കേസ് കട്ടപ്പന ഡിവൈഎസ്പിക്ക് കൈമാറിയിരിക്കുകയാണ്.