കോടതിയുടെ നിര്‍ദ്ദേശത്തിന് കൈയ്യടി. പൊതുസ്ഥലങ്ങള്‍ കൈയേറി നിര്‍മിച്ച ആരാധനാലയങ്ങള്‍ ഒഴിപ്പിക്കണമെന്ന സുപ്രീംകോടതി വിധി അടിയന്തരപ്രാധാന്യത്തോടെ നടപ്പാക്കാന്‍ ജില്ലാ ജഡ്ജിമാര്‍ക്ക് ഹൈക്കോടതിയുടെ നിര്‍ദേശം. 2009 സെപ്റ്റംബര്‍ 29ന് പുറപ്പെടുവിപ്പിച്ച ഉത്തരവ് നടപ്പാക്കുന്നില്ലെന്ന് സുപ്രീംകോടതി ഹൈക്കോടതികളെ അറിയിച്ചിരുന്നു. ഇതിന്റെ അടിസ്ഥാനത്തിലാണ് ഈ നടപടി.
സുപ്രീംകോടതിവിധി ഇങ്ങനെ
പാര്‍ക്കുകള്‍, പൊതുസ്ഥലങ്ങള്‍, പൊതുമാര്‍ക്കറ്റുകള്‍, സര്‍ക്കാര്‍ ഉടമസ്ഥതയിലുള്ള മറ്റുസ്ഥലങ്ങള്‍ എന്നിവിടങ്ങള്‍ കൈയേറി ആരാധനാലങ്ങള്‍ നിര്‍മിച്ചിട്ടുണ്ട്. കളക്ടര്‍മാര്‍, ജില്ലാ മജിസ്‌ട്രേറ്റുമാര്‍, കമ്മിഷണര്‍മാര്‍, ചീഫ് സെക്രട്ടറി എന്നിവര്‍ക്കാണ് ഇവ കണ്ടെത്തി ഒഴിപ്പിക്കാനുള്ള ഉത്തരവാദിത്വം. വിധി നടപ്പാക്കാന്‍ ഹൈക്കോടതി മേല്‍നോട്ടം വഹിക്കും. ഇക്കാര്യത്തില്‍ അന്തിമനടപടിയെടുക്കാന്‍ സംസ്ഥാനത്തിന് നേരിട്ടും ഹൈക്കോടതിയെ സമീപിക്കാം.
2009ലെ വിധി നടപ്പാക്കുന്നതില്‍ സംസ്ഥാനങ്ങളും കേന്ദ്രഭരണപ്രദേശങ്ങളും നിസ്സംഗത കാണിച്ചപ്പോഴാണ് 2010 ഫെബ്രുവരി 16ന് സുപ്രീംകോടതി പുതിയനിര്‍ദേശം നല്‍കിയത്. ആറ് ആഴ്ചയ്ക്കുള്ളില്‍ സംസ്ഥാനങ്ങള്‍ ഇതിനായുള്ള പദ്ധതി രൂപവത്കരിക്കണമെന്നും ഒഴിപ്പിക്കാനെടുക്കുന്ന സമയം സുപ്രീംകോടതിയെ അറിയിക്കണമെന്നുമായിരുന്നു നിര്‍ദേശം.
സത്യവാങ്മൂലങ്ങളും പദ്ധതിയും സമര്‍പ്പിക്കപ്പെട്ടുവെങ്കിലും കേരളത്തില്‍ ഒഴിപ്പിക്കല്‍നടപടി തുടങ്ങിയില്ല. വിധി നടപ്പാക്കാന്‍ ഇനിയും വൈകിയാല്‍ ചീഫ് സെക്രട്ടറിയും കളക്ടര്‍മാരും ജില്ലാ മജിസ്‌ട്രേറ്റുമാരുമായിരിക്കും ഉത്തരവാദികള്‍. ജനുവരി 31ന് സുപ്രീംകോടതിയില്‍ വീണ്ടും ഇതേ കേസ് വന്നപ്പോള്‍ ഉത്തരവ് നടപ്പാക്കാന്‍ എല്ലാ കക്ഷികളും സമവായത്തിലെത്തിയിരുന്നു.