ഇടുക്കി കൈതപ്പാറയിൽ കിണറ്റിൽ വീണ് ചരിഞ്ഞ ആനയുടെ മൃതദേഹം പുറത്തെത്തിക്കാൻ ശ്രമിക്കുന്നതിനിടെ ഒരാൾ മരിച്ചു. കാട്ടാന തകര്‍ത്ത വീടിന്റെ ഉടമ കൈതപ്പാറ കുളമ്പേല്‍ ജോസഫിന്റെ സഹോദരന്റെ മകനും ജെസിബി ഓപ്പറേറ്ററായ ജ്യോബിഷ്‌ ചാക്കോ(28)യാണു മരിച്ചത്‌. ഇന്നലെ വൈകിട്ട് കൈതപ്പാറയിലെത്തിയ മണ്ണുമാന്തിയന്ത്രത്തിനു വഴി കാണിക്കാനാണു ജോബിഷ് കൂടെപ്പോയത്.

വീടും കൃഷിയും തകർത്ത കാട്ടാനക്കൂട്ടത്തിലെ ആനകളിലെ ഒരെണ്ണം പുരയിടത്തിലെ കിണറ്റിൽ വീണു ചരിയുകയും ചെയ്തു. അപകടത്തില്‍ സമീപവാസികളായ അഞ്ച്‌പേര്‍ക്കു പരിക്കേറ്റു. ദുര്‍ഘടം പിടിച്ചതും വഴുക്കലുള്ളതുമായി റോഡിലൂടെയേ കാട്ടാന ചരിഞ്ഞ കിണറിനു സമീപം എത്താന്‍ സാധിക്കുകയുള്ളൂ. കഞ്ഞിക്കുഴി പഞ്ചായത്തിലെ പതിനഞ്ചാം വാര്‍ഡ്‌ കൈതപ്പാറ ഗ്രാമത്തില്‍ ശനിയാഴ്‌ച അര്‍ധരാത്രിയിലായിരുന്നു സംഭവം.

തൊടുപുഴ റേഞ്ചിനു കീഴിലെ മണിയാറൻകുടി വനമേഖലയിൽ നിന്ന് രാത്രി കൂട്ടമായി ഇറങ്ങിയ ആറു കാട്ടാനകൾ കുളമ്പനേൽ ജോസഫിന്റെ പുരയിടത്തിലേക്ക് കയറുകയായിരുന്നു. കൃഷി ചവിട്ടിമെതിച്ച ഇവ ജോസഫിന്റെ വീടും ,സമീപത്തുള്ള തൊഴുത്തും തകർത്തു. ഈ സമയം വീട്ടിൽ ആളില്ലാതിരുന്നതിനാൽ ദുരന്തം ഒഴിവായി. തുടർന്ന് സമീപത്തെ കുളമ്പനേൽ മാത്യുവിന്റെ പുരയിടത്തിലേക്ക് ഇറങ്ങിയ ആനകൾ ഇവിടെയും കൃഷി തകർത്ത് മടങ്ങുമ്പോഴായിരുന്നു ഒരു ആന കിണറ്റിൽ വീണത്.

തലകുത്തി വീണ ആനയ്ക്ക് കരകയറാനായില്ല. കൂട്ടത്തിലുള്ള മറ്റ് ആനകൾ പുലർച്ചയോടെ മടങ്ങി.ഇന്നലെ രാവിലെ പ്രദേശവാസികൾ കൃഷിയിടത്തിലെത്തിയപ്പോഴാണ് വിവരം അറിയുന്നത് നാട്ടുകാർ അറിയിച്ചതിനെ തുടർന്ന് സ്ഥലത്തെത്തിയ വനപാലകർ കാട്ടാനയെ കിണറ്റിൽ നിന്ന് ഉയർത്തി ജഡം മറവു ചെയ്യുന്നതിനുള്ള‍ നടപടികൾ ആരംഭിച്ചു.വനമേഖലയിൽ നിന്നു നാട്ടിലേക്ക് ഇറങ്ങിയ കാട്ടാനകൾ വഴിയോരത്തുള്ള ഉറുമ്പിൽ ബൈജു, കുളമ്പനേൽ ജോസ് എന്നിവരുടെ കൃഷിയിടങ്ങളിലും വ്യാപക നാശനഷ്ടം വരുത്തി. നാലു ഭാഗവും വനത്താൽ ചുറ്റപ്പെട്ട പ്രദേശമാണ് കൈതപ്പാറ.