ഞെട്ടിക്കുന്ന വിധത്തില്‍ കോടികള്‍ പ്രവഹിക്കുന്നു. പ്രളയത്തെ തുടര്‍ന്നുള്ള സര്‍ക്കാരിന്റെ ദുരിതാശ്വാസ പ്രവര്‍ത്തനങ്ങള്‍ക്ക് സഹായിക്കുന്നതിനായി സിപിഎം 16.5 കോടി രൂപ ജനങ്ങളില്‍ നിന്നും സമാഹരിച്ചു. സിപിഎം സംസ്ഥാന സെക്രട്ടറിയേറ്റ് വാര്‍ത്താക്കുറിപ്പിലൂടെയാണ് ഇക്കാര്യം അറിയിച്ചത്.
ഓഗസ്റ്റ് 18, 19 തീയതികളില്‍ നടത്തിയ ധനശേഖരണത്തിലൂടെ 16,43,73,940 രൂപ ലഭിച്ചുവെന്നാണ് സിപിഎം അറിയിച്ചിരിക്കുന്നത്. ഈ തുക മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കും.
ദുരന്ത ബാധിത ജില്ലകളായതിനാല്‍ എറണാകുളം, ആലപ്പുഴ, ഇടുക്കി, പത്തനംതിട്ട എന്നിവിടങ്ങളില്‍ നിന്നും, തൃശൂര്‍, കോട്ടയം ജില്ലകളിലെ ചില ഭാഗങ്ങളില്‍ നിന്നും ഫണ്ട് സമാഹരിച്ചില്ല. സംഭാവനകള്‍ നല്‍കി സഹായിച്ച എല്ലാവര്‍ക്കും സിപിഎം നേതൃത്വം നന്ദി അറിയിച്ചു.
ജില്ല തിരിച്ച പണം ലഭിച്ച കണക്ക്
കാസര്‍കോഡ് 1,25,19,688, കണ്ണൂര്‍ 6,39,69,320, വയനാട് 10,00,000, കോഴിക്കോട് 1,26,00,000, മലപ്പുറം 1,20,00,000, പാലക്കാട് 1,37,44,397, തൃശൂര്‍ 65,00,000, കോട്ടയം 44,00,000, കൊല്ലം 1,51,00,000, തിരുവനന്തപുരം 2,25,40,535.