മുല്ലപ്പെരിയാര്‍ അണക്കെട്ടിന്റെ രണ്ടു സ്പില്‍വേ ഷട്ടറുകള്‍ വീണ്ടും തുറന്നു. കഴിഞ്ഞ തിങ്കളാഴ്ച രാത്രി പൂര്‍ണമായി അടച്ച സ്പില്‍വേ ഇന്നലെ ഉച്ചയോടെയാണു തുറന്നത്. അണക്കെട്ടില്‍ ജലനിരപ്പ് ഉയര്‍ന്നതോടെയാണു വീണ്ടും വെള്ളം തുറന്നുവിടാന്‍ തുടങ്ങിയത്. ഇന്നലെ 140.15 അടിയായിരുന്നു ജലനിരപ്പ്. 

ജലനിരപ്പ് 139 അടിയില്‍ നിലനിര്‍ത്തണമെന്ന സുപ്രീം കോടതി നിര്‍ദേശം തമിഴ്‌നാട് ഇതുവരെ പാലിച്ചിട്ടില്ല. 3243 ഘനയടി വെള്ളമാണ് ഇപ്പോള്‍ പെരിയാറിലേക്ക് ഒഴുക്കുന്നത്. 2212 ഘനയടി വെള്ളം തമിഴ്‌നാട് കൊണ്ടുപോകുമ്പോള്‍ 5455 ഘനയടി ഒഴുകിയെത്തുന്നുണ്ട്.

അതേസമയം, ഇടുക്കി അണക്കെട്ടിലെ ജലനിരപ്പ് കുറഞ്ഞതോടെ തുറന്നുവിടുന്ന വെള്ളത്തിന്റെ അളവ് മൂന്നുലക്ഷം ലിറ്ററായി കുറച്ചു. ഇന്നലെ അണക്കെട്ടിലെ ജലനിരപ്പ് 2400.78 അടിയാണ്. 404 ക്യുമെക്‌സ് വെള്ളം ഒഴുകിയെത്തി.