ചികിത്സയ്ക്കായി അമേരിക്കയിൽ പോയ മുഖ്യമന്ത്രി പിണറായി വിജയൻ പൂർണ ആരോഗ്യവാനായിരിക്കുന്നു എന്ന് മന്ത്രി ഇ.പി.ജയരാജൻ. യുഎസിലേക്കു പോയതു വൈദ്യപരിശോധനയുടെ ഭാഗമായിട്ടാണെന്നും അദ്ദേഹം പൂർണ ആരോഗ്യവാനാണെന്നും മുഖ്യമന്ത്രിയുടെ ചികിത്സയെക്കുറിച്ചു സർക്കാർ ഭാഗത്തുനിന്നുള്ള ആദ്യ ഔദ്യോഗിക വിശദീകരണം.

ദിവസവും മുഖ്യമന്ത്രി തങ്ങളെ ബന്ധപ്പെടുന്നുണ്ട്. പരിശോധന പൂർത്തിയാകുമ്പോൾ മടങ്ങിയെത്തും. മുഖ്യമന്ത്രി എത്താൻ വൈകിയാലും അടുത്തു തന്നെ മന്ത്രിസഭാ യോഗം ചേരും. മാധ്യമങ്ങൾ ഇക്കാര്യത്തിൽ ആശങ്കപ്പെടേണ്ട. മന്ത്രിസഭ ചേരേണ്ട അടിയന്തര വിഷയമുണ്ടായാൽ ഉടൻ ചേരും. എന്നും അദ്ദേഹം വ്യക്തമാക്കി.

മുതിർന്ന മന്ത്രിമാർ എതിർത്തതിനെത്തുടർന്നാണ് മന്ത്രിസഭ ചേരാൻ സാധിക്കാത്തതെന്ന പ്രതിപക്ഷ ആരോപണം ചൂണ്ടിക്കാട്ടിയപ്പോൾ, ഇതൊക്കെ പണ്ടുനടന്നതല്ലേ, അതൊക്കെ മനസ്സിൽ തികട്ടിവരുന്നതാണ്. അതുപോലെയാണ് ഇന്നും നടക്കുന്നതെന്ന് കരുതുന്നതിനാലാണെന്നും അദ്ദേഹം മറുപടി നൽകി

19നു മന്ത്രിസഭ ചേരുമോ എന്ന ചോദ്യത്തിന്, താൻ യോഗം വിളിച്ചിട്ടില്ലെന്നായിരുന്നു മറുപടി.
സംസ്ഥാനത്തു ഭരണസ്തംഭനമില്ല. എല്ലാം ഭംഗിയായി നടക്കുന്നു. ആക്ഷേപിക്കേണ്ടവർക്ക് ആക്ഷേപിക്കാം. ഇന്നലെ മന്ത്രിസഭ ചേരാൻ തീരുമാനിച്ചിരുന്നതാണ്. ജില്ലകളിലെ പിരിവുമായി ബന്ധപ്പെട്ടു മന്ത്രിമാരെല്ലാം പുറത്തായതിനാലാണു ചേരാൻ സാധിക്കാതിരുന്നത് എന്ന് അദ്ദേഹം വ്യക്തമാക്കി.