ഒരു വിഷു കാലം കൂടി.. സന്തോഷത്തിന്റേയും സമാധാനത്തിന്റേയും ദിനങ്ങൾക്ക് വേണ്ടി നാടും ​ന​ഗരവും ഒരുങ്ങിക്കയിഞ്ഞു. കണിക്കൊന്നയുടെ മഞ്ഞപ്പട്ടുടുത്ത് ഒരുങ്ങുന്ന ഐശ്വര്യത്തിന്റെ ഉത്സവമായ വിഷു ദിനത്തിൽ മലയാളികൾ ആഘോഷത്തിലാണ്. ക്ഷേത്രങ്ങളിൽ വൻ ഭക്ത ജനതിരക്കാണെന്ന് റിപ്പോർട്ടുകൾ വന്നു തുടങ്ങി. ഗുരുവായൂരിൽ വിഷുക്കണി ദർശനത്തിനായി ത്തിനായി വൻ ഭക്തജന തിരക്ക്. പുലർച്ചെ 2.50 മുതൽ 3.30 വരെയായിരുന്നു. ഈ സമയത്ത് എത്തിയ ഭക്തർക്ക് മേൽശാന്തി കൈനീട്ടം നൽകി.

മേടമാസത്തിലെ സംക്രമദിനമാണ് വിഷുവായി ആഘോഷിക്കപ്പെടുന്നത്. വിഷു എന്ന വാക്കിന്റെ അർത്ഥം തുല്യമായത് എന്നാണ്; അതായത് പകലും രാത്രിയും തുല്യമായി വരുന്ന ദിവസം. കാർഷിക സംസ്‌കൃതിയുമായി ആഴത്തിൽ ബന്ധപ്പെട്ടു കിടക്കുന്ന ഈ ഉത്സവം, സമൃദ്ധമായ ഒരു വിളവെടുപ്പ് കാലത്തിന്റെ ഓർമ്മപ്പെടുത്തൽ കൂടിയാണ്. ലോകത്തിന്റെ ഏത് കോണിലാണെങ്കിലും ഓരോ മലയാളിയുടെയും മനസ്സിൽ വിഷു എന്ന് കേൾക്കുമ്പോൾ ആദ്യം ഓടിയെത്തുന്നത് നിലവിളക്കിന്റെ പ്രഭയിൽ തിളങ്ങുന്ന വിഷുക്കണിയും, മുറ്റത്ത് പൂത്തുനിൽക്കുന്ന കണിക്കൊന്നയുമാണ്.

വീടിന്റെ ഉമ്മറത്ത് വയ്ക്കുന്ന വാല്ക്കണ്ണാടിയും കണിവെള്ളരിയും ധാന്യങ്ങളും ഫലവർഗ്ഗങ്ങളും ചേർന്ന് ഒരുക്കുന്ന ആ കാഴ്ച വരാനിരിക്കുന്ന ഒരു വർഷത്തെ മുഴുവൻ ഐശ്വര്യത്തിന്റെയും പ്രതീകമായാണ് വിശ്വസിക്കപ്പെടുന്നത്. കുടുംബാംഗങ്ങൾ ഒത്തുചേരുന്നതും, മുതിർന്നവർ കുട്ടികൾക്ക് വിഷുക്കൈനീട്ടം നൽകുന്നതും, പടക്കം പൊട്ടിച്ചും സദ്യ കഴിച്ചും ആഘോഷിക്കുന്നതും മലയാളിക്ക് ഗൃഹാതുരമായ ഒരനുഭവമാണ്. വേദനകളും പ്രതിസന്ധികളും മറികടന്ന് നല്ലനാളുകൾക്കായി എല്ലാ മലയാളി വാർത്ത പ്രക്ഷർക്കും ഹൃദയം നിറഞ്ഞ വിഷു ആശംസകൾ.