കേരളത്തിന് എയിംസ് എന്ന സ്വപ്‌നം വീണ്ടും നടക്കാത്ത സ്വപ്‌നമായി അവശേഷിക്കുന്നു. സംസ്ഥാനത്തിന് എയിംസ് അനുവദിക്കുമെന്ന് ആരോഗ്യമന്ത്രി ജെ.പി നദ്ദ മുമ്പ് പറഞ്ഞെങ്കിലും അരുണ്‍ ജെയ്റ്റിലിയുടെ ബജറ്റില്‍ പ്രഖ്യാപനമുണ്ടായില്ല. പകരം പ്രധാനമന്ത്രി നരേന്ദ്രമോദിയുടെ നാട്ടില്‍ 2017ല്‍ എയിംസ് അനുവദിച്ചു. അതിന് പിന്നാലെയാണ് ഇപ്പോള്‍ തമിഴ്‌നാട്ടിലും തെലങ്കാനയിലും എയിംസ് അനുവദിച്ചതായി പ്രധാനമന്ത്രിയുടെ ഓഫീസ് അറിയിച്ചത്. ലോക്‌സഭാ തെരഞ്ഞെടുപ്പ് മുന്നില്‍ കണ്ടാണ് ഈ നീക്കമെന്ന് ആക്ഷേപമുണ്ട്. കേരളത്തില്‍ നിന്ന് ബി.ജെ.പിക്ക് ലോക്‌സഭാ സീറ്റൊന്നും ലഭിക്കില്ലെന്ന് ഏകദേശം ഉറപ്പായ സാഹചര്യത്തിലാണ് തമിഴ്‌നാടും തെലങ്കിനയും ലക്ഷ്യംവെച്ചതെന്നും സി.പി.എം ആരോപിക്കുന്നു.

തമിഴ്നാട്ടിലെ മധുരയില്‍ 1,264 കോടി ചെലവിലും തെലുങ്കാനയിലെ ബിബിനഗറില്‍ 1,028 കോടി രൂപ ചെലവിലും രണ്ടു പുതിയ ഓള്‍ ഇന്ത്യ ഇന്‍സ്റ്റിറ്റിയൂട്ട് ഓഫ് മെഡിക്കല്‍ സയന്‍സ് (എയിംസ്) സ്ഥാപിക്കുന്നതിന് പ്രധാനമന്ത്രി നരേന്ദ്രമോദിയുടെ അ്യക്ഷതയില്‍ ചേര്‍ന്ന കേന്ദ്ര മന്ത്രിസഭായോഗമാണ് അനുമതി നല്‍കിയത്. പ്രധാനമന്ത്രി സ്വാസ്ഥ്യ സുരക്ഷാ യോജന(പി.എം.എസ്.എസ്.വൈ)യുടെ കീഴിലായിരിക്കും ഈ എയിംസുകള്‍ ആരംഭിക്കുന്നത്. മുകളില്‍പ്പറഞ്ഞ ഈ എയിംസുകളില്‍ ഓരോന്നിലും 2,25,000 രൂപ അടിസ്ഥാന ശമ്പളവും ഒപ്പം എന്‍.പി.എയും ഉള്ള ഓരോ ഡയറക്ടര്‍ തസ്തിക സൃഷ്ടിക്കുന്നതിനും അനുമതി നല്‍കി.

100 എം.ബി.ബി.എസ് സീറ്റ് ഓരോ എയിംസിനും

ഓരോ പുതിയ എയിംസും 100 അണ്ടര്‍ ഗ്രാഡുവേറ്റ് (എം.ബി.ബി.എസ്) സീറ്റുകളും 60 ബിഎസ്.സി നഴ്സിംഗ് സീറ്റുകളും കൂട്ടിച്ചേര്‍ക്കും. ഓരോ പുതിയ എയിംസിനും 15-20 സൂപ്പര്‍ സ്പെഷ്യാലിറ്റി വിഭാഗങ്ങളുണ്ടാകും. ഓരോ പുതിയ എയിംസിലും 750 ആശുപത്രിക്കിടക്കകളും കൂട്ടിച്ചേര്‍ക്കും. നിലവില്‍ പ്രവര്‍ത്തിക്കുന്ന എയിംസുകളുടെ കണക്കിന്റെ അടിസ്ഥാനത്തില്‍ ഓരോ എയിംസിനും പ്രതിദിനം ഏകദേശം 1500 പുറംരോഗികളുടെയും(ഔട്ട്ഡോര്‍പേഷ്യന്റസ്) പ്രതിമാസം 1000 കിടപ്പുരോഗികളുടെയും (ഇന്‍ഡോള്‍ പേഷ്യന്റ്സ്)ആവശ്യങ്ങള്‍ നിറവേറ്റാനാകുമെന്നാണ് പ്രതീക്ഷിക്കുന്നത്.


ന്യൂഡല്‍ഹിയിലെ എയിംസിന്റെയും പി.എം.എസ്.എസ്.വൈ ആദ്യഘട്ടത്തിന് കീഴില്‍ ഏറ്റെടുത്ത ആറു പുതിയ എയിംസുകളുടെയും വിശാലമായ മാതൃകയില്‍ ആശുപത്രികള്‍, മെഡിക്കല്‍, നഴ്സിംഗ് കോഴ്സുകള്‍ക്ക് വേണ്ട പഠന ബ്ലോക്കുകള്‍, താമസസൗകര്യങ്ങള്‍ (റസിഡന്‍ഷ്യല്‍ കോംപ്ലക്സ്) മറ്റ് അനുബന്ധ സൗകര്യങ്ങളും സേവനങ്ങളും സൃഷ്ടിക്കല്‍ എന്നിവ ഉള്‍പ്പെടുന്നതാണ് പുതിയ എയിംസ് സ്ഥാപിക്കുക എന്നതുകൊണ്ട് ഉദ്ദേശിക്കുന്നത്. പ്രാദേശികമായി ആരോഗ്യ സുരക്ഷ ലഭ്യമാക്കാനും ആ മേഖലയില്‍ മെഡിക്കല്‍ വിദ്യാഭ്യാസം, നഴ്സിംഗ് വിദ്യാഭ്യാസം, ഗവേഷണങ്ങള്‍ എന്നിവ നടത്തുകയുമാണ് ദേശീയ പ്രാധാന്യമുള്ള പുതിയ എയിംസുകള്‍ സ്ഥാപിക്കുന്നതിന്റെ ലക്ഷ്യം. അത്യാഹിത/ട്രോമോ കിടക്കകള്‍, ആയുഷ് കിടക്കകള്‍, സ്വകാര്യ കിടക്കകള്‍, ഐ.സി.യു. സ്പെഷ്യാലിറ്റി, സൂപ്പര്‍ സ്പെഷ്യാലിറ്റി കിടക്കകള്‍ എന്നിവ ഉള്‍പ്പെടെ 750 കിടക്കകളുള്ള ഒരു ആശുപത്രിയും നിര്‍ദ്ദിഷ്ട സ്ഥാപനത്തിന് ഉണ്ടാകും. 

അതിന് പുറമെ ഒരു മെഡിക്കല്‍ കോളജ്, ആയുഷ് ബ്ലോക്ക്, ഓഡിറ്റോറിയം, രാത്രി അഭയകേന്ദ്രം, അതിഥിമന്ദിരം, ഹോസ്റ്റലുകള്‍, താമസസൗകര്യങ്ങള്‍ എന്നിവയും ഉണ്ടാകും. ആറു പുതിയ എയിംസുകളുടെ മാതൃകയില്‍ പുതിയ എയിംസുകള്‍ സ്ഥാപിക്കുന്നതു സൃഷ്ടിക്കുന്ന മൂലധന ആസ്തികളുടെ പരിപാലനത്തിനും സംരക്ഷണത്തിനുമായി പ്രത്യേക പഠനം നടത്തിയ മനുഷ്യശക്തിയും സൃഷ്ടിക്കപ്പെടും. ഈ സ്ഥാപനങ്ങള്‍ക്ക് വേണ്ടിവരുന്ന ആവര്‍ത്തനചെലവുകള്‍ ആരോഗ്യ കുടുംബക്ഷേമ മന്ത്രാലയത്തിന്റെ പി.എം.എസ്.എസ്.വൈയ്ക്കുള്ള ബജറ്റ് വിഹിതത്തില്‍ നിന്നും ഗ്രാന്റ് ഇന്‍ എയ്ഡായി ലഭ്യമാക്കും.

തമിഴ്നാട്ടിലെയും തെലുങ്കാനയിലെയും പുതിയ എയിംസുകള്‍ സ്ഥാപിക്കുന്നതിനു 45 മാസത്തെ സമയക്രമമാണ് നിശ്ചയിച്ചിട്ടുള്ളത്. നിര്‍മാണത്തിനും പുതിയ എയിംസുകളുടെ നടത്തിപ്പിനും വേണ്ട ചെലവുകള്‍ പി.എം.എസ്.എസ്.വൈയിലൂടെ കേന്ദ്ര ഗവണ്‍മെന്റ് നിര്‍വഹിക്കും. പുതിയ എയിംസിന്റെ നിര്‍മാണത്തിന് വേണ്ട ഫണ്ട് മുഴുവന്‍ കേന്ദ്ര ഗവണ്‍മെന്റ് നല്‍കും. പുതിയ എയിംസുകളുടെ പ്രവര്‍ത്തന-പരിപാലന ചെലവുകളും പൂര്‍ണമായി കേന്ദ്ര ഗവണ്‍മെന്റ് തന്നെ വഹിക്കും.

3000 തസ്തികകള്‍ 

സംസ്ഥാനങ്ങളില്‍ പുതിയ എയിംസുകള്‍ ആരംഭിക്കുന്നതിലൂടെ ഓരോ എയിംസിലും വിവിധ ഫാക്കല്‍റ്റികളിലും അല്ലാതെയുമായി ഏകദേശം 3000 തസ്തികകള്‍ സൃഷ്ടിക്കപ്പെടും. എയിംസിന്റെ പരിധിയില്‍ വരുന്ന ഷോപ്പിംഗ് സെന്റര്‍, കാന്റീനുകള്‍ എന്നീ സൗകര്യങ്ങളിലും സേവനങ്ങളിലുമായി വന്‍തോതില്‍ പരോക്ഷമായും തൊഴിലവസരങ്ങള്‍ സൃഷടിക്കപ്പെടും. ഓരോ പുതിയ എയിംസിനും വേണ്ട ഭൗതിക അടിസ്ഥാന സൗകര്യങ്ങള്‍ സൃഷ്ടിക്കുന്നത് ഉള്‍പ്പെടെയുള്ള വിവിധ പ്രവര്‍ത്തനങ്ങളിലൂടെ നിര്‍മാണഘട്ടത്തിലും വന്‍തോതില്‍ തൊഴില്‍ സൃഷ്ടിക്കപ്പെടുമെന്നാണ് പ്രതീക്ഷിക്കുന്നത്.