ജില്ലാ പോലീസ് കമ്മീഷണര്‍ക്ക് തെറ്റുപറ്റിയെന്ന് പോലീസുകാരന്റെ കണ്ടെത്തലിന് എതിരെ നടപടി,. സിറ്റി ജില്ല പൊലീസ് കമീഷണര്‍ക്ക് ശബരിമല കര്‍മസമിതിയുടെ ഹര്‍ത്താല്‍ നേരിടുന്നതില്‍ വീഴ്ചപറ്റിയെന്ന് ഫേസ്ബുക് പോസ്റ്റിട്ട സിവില്‍ പൊലീസ് ഓഫിസറുടെ നടപടി ഗുരുതര അച്ചടക്ക ലംഘനമെന്ന് കണ്ടെത്തല്‍. ഇതോടെ, പോസ്റ്റിട്ട ക്രൈംബ്രാഞ്ചിലെ സിവില്‍ പൊലീസ് ഓഫിസര്‍ ഉമേഷ് വള്ളിക്കുന്നിനെതിരെ നടപടി ഉറപ്പായി. സംഭവത്തില്‍ അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ െ്രെകംബ്രാഞ്ച് ഡിവൈ.എസ്.പി ബിജു കെ. സ്റ്റീഫനോട് എസ്.പി പി.ബി. രാജീവ് ആവശ്യപ്പെട്ടിട്ടുണ്ട്. സേനക്ക് മൊത്തം അവമതിപ്പുണ്ടാക്കുന്ന നടപടിയാണ് ഉമേഷിന്‍േറതെന്നും ഇത് ഗുരുതര അച്ചടക്ക ലംഘനമായി കാണണമെന്നും ചൂണ്ടിക്കാട്ടുന്ന റിപ്പോര്‍ട്ടാണ് ഡിവൈ.എസ്.പി ഇന്ന് സമര്‍പ്പിക്കുമെന്ന വിവരം.

നേരത്തേയും നവമാധ്യമങ്ങളില്‍ വിവാദ കുറിപ്പുകളെഴുതിയതിന്റെ പേരില്‍ അന്വേഷണം നേരിട്ടയാളാണ് ഉമേഷ്. ഈ വിവരമടക്കം റിപ്പോര്‍ട്ടില്‍ ഉള്‍പ്പെടുത്തിയതായാണ് സൂചന. എസ്. കാളിരാജ് മഹേഷ് കുമാറിന്റെ പേര് പരാമര്‍ശിക്കാതെയുള്ള വിമര്‍ശനവും പരിഹാസവും നിറഞ്ഞ ഉമേഷിന്റെ ഫേസ്ബുക് പോസ്റ്റ് ഇതിനകം ആയിരത്തിലേറെ പേരാണ് ഷെയര്‍ ചെയ്തത്. 3000ത്തോളം ലൈക്കുകളുമുണ്ട്്. തുറന്നുപറച്ചിലുകള്‍ക്ക് ബിഗ് സല്യൂട്ട്, പോസ്റ്റിന്റെ ഫലമായി മേധാവിയെ മാറ്റി എന്നിങ്ങനെ 600ലേറെ പേര്‍ കമന്റിട്ടു. പോസ്റ്റ് നവമാധ്യമങ്ങളിലടക്കം ചര്‍ച്ചയാണ്. ഇവയെല്ലാം പരിശോധിച്ചശേഷമാണ് ഡിവൈ.എസ്.പി റിപ്പോര്‍ട്ട് തയ്യാറാക്കിയത്. ജില്ല പൊലീസ് മേധാവിക്കുണ്ടായ പാളിച്ചയാണ് ഹര്‍ത്താലില്‍ വ്യാപക അക്രമത്തിന് ഇടയാക്കിയത്.

മിഠായിതെരുവിലേക്ക് നിയന്ത്രണമില്ലാതെ പ്രതിഷേധക്കാരെ കയറ്റിവിട്ടത് പ്രശ്‌നങ്ങള്‍ കൂടുതല്‍ സൃഷ്ടിച്ചു, കട തുറന്ന വ്യാപാരികള്‍ക്ക് സംരക്ഷണം നല്‍കിയില്ല, പൊലീസ് മേധാവിയുടെ പാളിച്ച സേനക്ക് മൊത്തം നാണക്കേടുണ്ടാക്കി, വലിയങ്ങാടിയില്‍ രണ്ടു പൊലീസുകാരെ മാത്രമാണ് നിയോഗിച്ചത്, ഹൈറാര്‍ക്കിയുടെ ഉയരത്തില്‍നിന്ന് കല്‍പനകള്‍ മാത്രം പുറപ്പെടുവിക്കുന്ന ഒരാള്‍ക്ക് മേധാവിയാകാനേ പറ്റൂ, നായകനാകാന്‍ പറ്റില്ല തുടങ്ങിയ ആരോപണങ്ങളും പരിഹാസങ്ങളുമാണ് ഫേസ്ബുക്കിലുള്ളത്.