ഇനി തെരഞ്ഞെടുപ്പ് ഗോദ, അരയും തലയും മുറുക്കി മുന്നണികള് ഒരുങ്ങി, ലോക്സഭാ തിരഞ്ഞെടുപ്പിന്റെ ചൂടിലേക്ക് കേരളം നീങ്ങുന്നു
ഇനി തെരഞ്ഞെടുപ്പ് ഗോദ. അരയും തലയും മുറുക്കി മുന്നണികള് ഒരുങ്ങി. ലോക്സഭാ തിരഞ്ഞെടുപ്പിന്റെ ചൂടിലേക്ക് കേരളം നീങ്ങുന്നു.
ശബരിമല വിധിക്ക് ശേഷം നവോത്ഥാനമൂല്യസംരക്ഷണമുയര്ത്തി കൈക്കൊണ്ട ഉറച്ച നിലപാടും നവോഥാന മതിലുമൊക്കെ പിന്നാക്ക, ദളിത് പിന്തുണ ഉറപ്പിച്ചുനിറുത്താനായെന്ന് ഇടതുപക്ഷം കരുതുന്നു. ശബരിമലയിലെ സവര്ണ്ണ കഥകള് പറഞ്ഞ് ഈഴവരിലെ ഒരു വിഭാഗത്തിന്റെ പിന്തുണ ഉറപ്പിക്കുക കൂടി ചെയ്തതോടെ തന്ത്രങ്ങളേറ്റു എന്ന ആത്മവിശ്വാസവും. നിയമസഭാ തിരഞ്ഞെടുപ്പില് തുണച്ച മതന്യൂനപക്ഷത്തെ കൂടെ നിറുത്തുകയും പരമ്പരാഗതവോട്ട്ബാങ്ക് ചോരാതെ കാക്കുകയുമാണ് ലക്ഷ്യം. കാലാകാലങ്ങളായി ആശയങ്ങളുടെ പേരില് പാര്ട്ടിയില് നിന്നകന്നു കഴിയുന്നവരെ തിരികെയെത്തിക്കാന് ശബരിമല കാരണമായെന്നും സി പി എം കണക്കു കൂട്ടുന്നു.
സര്ക്കാരിനോട് ഒരൊത്തുതീര്പ്പിനുമില്ലെന്ന എന്.എസ്.എസ് നിലപാട് മദ്ധ്യതിരുവിതാംകൂറില് അനുകൂലമാകുമെന്ന കണക്കുകൂട്ടലാണ് യു.ഡി.എഫിനും ബി.ജെ.പിക്കും. വിശ്വാസികളുടെ വികാരം എന്ന തുറുപ്പുചീട്ട് മത, ന്യൂനപക്ഷങ്ങളിലും അനുകൂലചലനമുണ്ടാക്കുമെന്ന പ്രതീക്ഷ യു.ഡി.എഫിലുണ്ട്. എന്.എസ്.എസ് നിലപാട് അനുകൂലമാകുമെന്ന് കരുതുന്ന ബി.ജെ.പിക്ക് കേന്ദ്രസര്ക്കാരിന്റെ പുതിയ സാമ്പത്തികസംവരണ പ്രഖ്യാപനത്തിലുമുണ്ട് പ്രതീക്ഷ.
ശബരിമല വിശദീകരണ യോഗങ്ങള് ബൂത്തു തലത്തില് നടത്താന് കഴിഞ്ഞു എന്ന ആത്മവിശ്വാസത്തിലാണ് സി പി എം. വിഭാഗീയതയും കുറവ് താഴേതട്ടില് സംഘടനാപ്രവര്ത്തനം നേരത്തേ ആരംഭിക്കാന് കഴിഞ്ഞു. തിരഞ്ഞെടുപ്പ് തന്ത്രങ്ങളുടെ ചര്ച്ചയ്ക്കായി സംസ്ഥാനകമ്മിറ്റി, ജില്ലാ സെക്രട്ടേറിയറ്റംഗങ്ങള്, നിയോജകമണ്ഡലം സെക്രട്ടറിമാര് എന്നിവര്ക്കായുള്ള സംസ്ഥാനതല ശില്പശാല ഇന്ന് എ.കെ.ജി സെന്ററില് നടത്തും. സി.പി.ഐ മണ്ഡലം കമ്മിറ്റികള് കേന്ദ്രീകരിച്ച് 14 ജില്ലകളിലും കുടുംബയോഗങ്ങള് പൂര്ത്തിയാക്കി.
ഇരുപത്തി അയ്യായിരത്തോളം വരുന്ന ബൂത്ത് കമ്മിറ്റികളില് മുക്കാല്ഭാഗവും സജ്ജമാക്കി കോണ്ഗ്രസും പ്രവര്ത്തനം ഊര്ജ്ജിതമാക്കി. കെ.പി.സി.സി ജനറല്ബോഡിയും ഡി.സി.സി പ്രസിഡന്റുമാരുടെയും കെ.പി.സി.സി ഭാരവാഹികളുടെയും സംയുക്തയോഗവും നാളെയുണ്ട്. 29ന് രാഹുല്ഗാന്ധി കൊച്ചിയിലെത്തുന്നതിന് മുമ്പായി എല്ലാ ജില്ലകളിലും പ്രവര്ത്തകരെ പ്രവര്ത്തനസജ്ജമാക്കാനാണ് തീരുമാനം. കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്റെ കേരളയാത്ര ഫെബ്രുവരി 3ന് കാസര്കോട്ട് നിന്നാരംഭിക്കും. നാല് ബൂത്തുകള് കേന്ദ്രീകരിച്ച് ഒരു ശക്തികേന്ദ്രം എന്ന നിലയില് ബി.ജെ.പിയും താഴേതട്ടില് സജീവം. 15ന് മൂന്ന് പാര്ലമെന്റ് മണ്ഡലങ്ങളിലെ പ്രവര്ത്തകരെ പ്രധാനമന്ത്രി മോദി അഭിസംബോധന ചെയ്യുന്നത് പ്രചാരണത്തുടക്കമാക്കാനാണ് നീക്കം. ലോക്സഭാ തിരഞ്ഞെടുപ്പിനുള്ള അന്തിമ വോട്ടര്പട്ടിക ഈ മാസം 21ന് പ്രസിദ്ധീകരിക്കാനിരിക്കെ, വോട്ടര്പട്ടികാ പരിശോധനകളിലാണിപ്പോള് പ്രവര്ത്തകരെല്ലാം
https://www.facebook.com/Malayalivartha
