രണ്ടാമത് രാജ്യാന്തര കുട്ടി ചലച്ചിത്രമേള നാളെ മുതല്, മന്ത്രി എ.കെ ബാലന് ടാഗോര് തിയേറ്ററില് ഉദ്ഘാടനം ചെയ്യും
രണ്ടാമത് രാജ്യാന്തര ബാല ചലച്ചിത്രമേള വെള്ളിയാഴ്ച ആരംഭിക്കും. ഉച്ചയ്ക്ക് രണ്ട് മണിക്ക് ടാഗോര് തിയേറ്ററില് ചലച്ചിത്ര, സാംസ്ക്കാരിക വകുപ്പ് മന്ത്രി എ.കെ ബാലന് ഉദ്ഘാടനം നിര്വഹിക്കും. സഹകരണ മന്ത്രി കടകംപള്ളി സുരേന്ദ്രന് അധ്യക്ഷനാകും. സാമൂഹ്യനീതി, ശിശുവികസന വകുപ്പ് മന്ത്രി മുഖ്യഅതിഥിയാകും. സംഘാടക സമിതി ചെയര്മാന് എം.മുകേഷ് എം.എല്.എ, മേയര് വി.കെ പ്രശാന്ത്, വി.എസ് ശിവകുമാര് എം.എല്.എ, കെ.ടി.ഡി.സി ചെയര്മാന് എംവിജയകുമാര്, സാമൂഹ്യനീതി സ്പെഷ്യല് സെക്രട്ടറി ബിജു പ്രഭാകര്, ഡയറക്ടര് ഷീബ ജോര്ജ്ജ്, ചലച്ചിത്ര അക്കാദമി ചെയര്മാന് കമല്, വൈസ് പ്രസിഡന്റ് ബീനാ പോള്, കെ.എഫ്.ഡി.സി എം.ഡി ദീപാ ഡി.നായര്, സംവിധായകന് ടി.കെ രാജീവ് കുമാര്, നടന്മാരയ ഇന്ദ്രന്സ്, സുധീര് കരമന, നീരജ് മാധവ്, ഫിലിം പ്രോഗ്രാമര് മോണിക്ക വാഹി, ചില്ഡ്രന്സ് ഫിലിം സൊസൈറ്റി ഓഫ് ഇന്ത്യ സി.ഇ.ഒ പ്രശാന്ത് പത്രെബ്, ചലച്ചിത്ര അക്കാദമി സെക്രട്ടറി മഹേഷ് പഞ്ചു, കുട്ടികളുടെ പ്രധാനമന്ത്രി ദേവകി ഡി.എസ് എന്നിവര് പങ്കെടുക്കും. അരുമയാണ് മക്കള്, അവരുടെ സംരക്ഷണവും സുരക്ഷയും സമൂഹത്തിന്റെ കടമ- എന്നതാണ് ഇത്തവണത്തെ ബാലചലച്ചിത്ര മേളയുടെ സന്ദേശം.
മേയ് 10 മുതല് 16 വരെ തിരുവനന്തപുരത്താണ് ചലച്ചിത്രമേള നടക്കുന്നത്. https://www.icffk.com എന്ന വെബ്സൈറ്റില് രജിസ്റ്റര് ചെയ്യാം. ഇതിനകം 5000ലധികം കുട്ടികള് രജിസ്ട്രേഷന് നടത്തി. മേളയില് ഇത്തവണ പാര്ശ്വവല്ക്കരിക്കപ്പെട്ട കുട്ടികള്ക്കാവും മുന്ഗണന. ആദിവാസി മേഖല, അനാഥാലയങ്ങള് എന്നിവിടങ്ങളില് നിന്ന് ആയിരത്തോളം കുട്ടികളെ മേളയുടെ ഡെലിഗേറ്റ്സ് ആക്കും. വിവിധ ജില്ലകളിലുള്ള കുട്ടികളെ ശിശുക്ഷേമ സമിതി തിരുവനന്തപുരത്ത് എത്തിച്ച് താമസവും മറ്റ് സൗകര്യങ്ങളും നല്കിയാണ് പുതിയ ചലച്ചിത്ര ആസ്വാദനം നല്കുന്നതെ് സമിതി ജനറല് സെക്രട്ടറി എസ്.പി ദീപക് അറിയിച്ചു. മേളയില് 160ഓളം ചിത്രങ്ങള് പ്രദര്ശിപ്പിക്കും. കൈരളി, ശ്രീ, നിള, കലാഭവന്, ടാഗോര് തിയേറ്ററുകളിലും നിശാഗന്ധി ഓഡിറ്റോറിയത്തിലുമാകും പ്രദര്ശനങ്ങള്. നിശാഗന്ധിയില് എന്നും വൈകുന്നേരം പൊതുജനങ്ങള്ക്ക് സൗജന്യ പ്രദര്ശനമുണ്ടാകും. പ്രഗത്ഭരായ ബാലചലച്ചിത്ര സംവിധായകര്, ബാലതാരങ്ങള്, പിന്നണി പ്രവര്ത്തകര് എന്നിവര് മേളയില് കുട്ടികളോട് സംവദിക്കും. ദിവസവും ഓപ്പഫോറവും സംഘടിപ്പിക്കുന്നുണ്ട്. ചലച്ചിത്ര അക്കാദമി, ചലച്ചിത്ര വികസന കോര്പ്പറേഷന് എന്നിവയുടെ സഹകരണത്തോടെയാണ് മേള സംഘടിപ്പിക്കുന്നത്. ഭിന്നശേഷിയുള്ള കുട്ടികള്ക്ക് സിനിമ കാണാന് പ്രത്യേകം സൗകര്യം ഒരുക്കും.
തീംസോംഗ് റിലീസ് ചെയ്തു
അന്താരാഷ്ട്ര ചില്ഡ്രന്സ് ഫിലിംഫെസ്റ്റിവലിന്റെ തീംസോംഗ് പ്രശസ്ത സംഗീതഞ്ജന് പെരുമ്പാവൂര് ജി. രവീന്ദ്രനാഥ് റിലീസ് ചെയ്തു. ലോകത്തെ തന്നെ നല്ലൊരു ബാല ചലച്ചിത്രമേളയായി ഐ.സി.എഫ്.എഫ്.കെ മാറട്ടെയെന്ന് അദ്ദേഹം ആശംസിച്ചു. പാട്ട് പഠിക്കുന്നവരും പാടുന്നവരും സംഗീത സംവിധായകരായി മാറണം, എങ്കിലേ പുതിയ ഈണങ്ങള് വരുന്ന തലമുറയ്ക്ക് സമ്മാനിക്കാനാകൂ എന്നും അദ്ദേഹം പറഞ്ഞു. തീം സോംഗിന് സംഗീതം നല്കി ഗായിക രാജലക്ഷ്മി ഉഷാഖന്നയെ പോലെ നല്ലൊരു കംപോസറായി മാറട്ടെ എന്നും അദ്ദേഹം പറഞ്ഞു. ജോയി തമലം ആണ് പാ്ട്ട് എഴുതിയത്. സംവിധായകന് ആര്.എസ് വിമലാണ് പാട്ടിന് ദൃശ്യചാരുത നല്കിയിരിക്കുന്നത്. തൈക്കാട് ശിശുക്ഷേമസമിതി അങ്കണത്തില് നടന്ന ചടങ്ങില് ജനറല് സെക്രട്ടറി എസ്.പി ദീപക് സ്വാഗതം ആശംസിച്ചു. സമിതി വൈസ്പ്രസിഡന്റ് അഴീക്കോടന് ചന്ദ്രന് അധ്യക്ഷനായി. ട്രഷറര് രാധാകൃഷ്ണന്, സമിതി പ്രവര്ത്തകരായ പശുപതി മാഷ്, അരുണ്ഗോപി, പ്രതാപന്, രാജു എന്നിവരും പങ്കെടുത്തു.
https://www.facebook.com/Malayalivartha
