ലോക്‌സഭാ തെരഞ്ഞെടുപ്പില്‍ നിയമവിരുദ്ധമായി ഇടപെട്ട രാഷ്ട്രീയ പാര്‍ട്ടികള്‍ക്ക് പിന്നാലെ സംസ്ഥാനത്തെ മുഖ്യതെരഞ്ഞെടുപ്പ് ഓഫീസര്‍ ടിക്കാറാം മീണ മത-സാമുദായിക സംഘടനകള്‍ക്കെതിരെയും നടപടിക്കൊരുങ്ങുന്നു. ഇടത് സ്ഥാനാര്‍ത്ഥികളായ വീണ ജോര്‍ജ്ജിനും രാജാജി മാത്യുവിനും ഓര്‍ത്തഡോക്‌സ് സഭ പരസ്യ പിന്തുണ പ്രഖ്യാപിച്ച സംഭവത്തില്‍ തെരഞ്ഞെടുപ്പ് കമ്മീഷന്‍ വിശദീകരണം ആവശ്യപ്പെട്ടു. പത്തനംതിട്ട, തൃശൂര്‍ കളക്ടര്‍മാരോടാണ് മുഖ്യ തെരഞ്ഞെടുപ്പ് ഓഫീസര്‍ ടിക്കാറാം മീണ വിശദീകരണം തേടിയത്. പരാതിയായി ലഭിച്ച വീഡിയോയും അദ്ദേഹം ജില്ലാ കളക്ടര്‍ക്ക് കൈമാറിയിട്ടുണ്ട്. ഇത് സംബന്ധിച്ച് അന്വേഷിച്ച് അടിയന്തിരമായി റിപ്പോര്‍ട്ട് നല്‍കാനും കമ്മീഷന്‍ നിര്‍ദ്ദേശം നല്‍കി. വീഡിയോ പരിശോധിച്ച ശേഷം അന്വേഷണം നടത്തി റിപ്പോര്‍ട്ട് നല്‍കുമെന്ന് പത്തനംതിട്ട ജില്ലാ കളക്ടര്‍ പി.ബി. നൂഹ് അറിയിച്ചു.

മതത്തിന്റെ പേരില്‍ വോട്ട് തേടിയെന്ന പരാതിയെ തുടര്‍ന്നാണ് തെരഞ്ഞെടുപ്പ് കമ്മീഷന്റെ ഇടപെടല്‍. രാജാജി തോമസിന്റെ കാര്യത്തില്‍ ചട്ടലംഘനം ഉണ്ടായിട്ടില്ലെന്നാണ് തൃശൂര്‍ കളക്ടറുടെ റിപ്പോര്‍ട്ട്. പത്തനംതിട്ട ജില്ല കളക്ടറുടെ റിപ്പോര്‍ട്ട് കൂടി കിട്ടിയ ശേഷമായിരിക്കും പരാതിയില്‍ മുഖ്യ തെരഞ്ഞെടുപ്പ് ഓഫീസര്‍ അന്തിമ തീരുമാനമെടുക്കുന്നത്. ഇടത് സ്ഥാനാര്‍ത്ഥികള്‍ക്ക് വോട്ട് ചെയ്യണമെന്ന് ആഹ്വാനം ചെയ്തു കൊണ്ടുള്ള ഓര്‍ത്തഡോക്‌സ് സഭ അധ്യക്ഷന്റെ വീഡിയോ വോട്ടെടുപ്പ് ദിവസമാണ് പുറത്ത് വന്നത്. തെരഞ്ഞെടുപ്പിന്റെ തുടക്കത്തില്‍ ഒരു പാര്‍ട്ടിക്കും ഓര്‍ത്തഡോക്‌സ് സഭ പിന്തുണ പ്രഖ്യാപിച്ചിട്ടില്ലായിരുന്നു. എന്നാല്‍ പത്തനംതിട്ടയിലെ എല്‍.ഡി.എഫ് സ്ഥാനാര്‍ത്ഥി വീണാ ജോര്‍ജ്ജ് സഭയുടെ മകളാണെന്ന രീതിയിലുള്ള പ്രസ്താവനകള്‍ ചില സഭാ നേതാക്കള്‍ നടത്തിയിരുന്നു. 

മധ്യതിരുവിതാംകൂറില്‍ ഒന്നരലക്ഷത്തിലധികം വോട്ടാണ് ഓര്‍ത്തഡോക്‌സ് സഭയ്ക്കുള്ളത്. മാവേലിക്കര, പത്തനംതിട്ട, കോട്ടയം മണ്ഡലങ്ങളിലാണ് ഈ വോട്ടര്‍മാര്‍. തൃശൂരിലും സഭയ്ക്ക് സ്വാധീനമുണ്ട്. പല സഭകളും സാമുദായിക സംഘടനകളും ഒരു പാര്‍ട്ടിക്കും സ്ഥാനാര്‍ത്ഥിക്കും പിന്തുണ പ്രഖ്യാപിക്കാതെ രഹസ്യമായി പിന്തുണ നല്‍കുന്നത് കേരളത്തില്‍ പതിവാണ്. കഴിഞ്ഞ നിയമസഭാ തെരഞ്ഞെടുപ്പില്‍ ഓര്‍ത്തഡോക്‌സ് സഭ ഇടത്പക്ഷത്തിന് പരസ്യ പിന്തുണ അറിയിച്ചിരുന്നു. സഭയിലെ ചില പുരോഹിതന്‍മാര്‍ വീണാജോര്‍ജ്ജിന് ഉള്‍പ്പെടെ പ്രചാരണത്തിനിറങ്ങിയിരുന്നു. ചെങ്ങന്നൂര്‍ ഉപതെരഞ്ഞെടുപ്പിലും അത് തുടര്‍ന്നിരുന്നു. എന്നാല്‍ പള്ളി തര്‍ക്കത്തിലെ കോടതി വിധി നടപ്പാക്കുന്നതില്‍ സര്‍ക്കാര്‍ വീഴ്ചവരുത്തിയതിനെ തുടര്‍ന്ന് അവര്‍ സര്‍ക്കാരിനെതിരെ രംഗത്തെത്തിയിരുന്നു. 

രണ്ട് പതിറ്റാണ്ടിനിടെ കേരളത്തില്‍ നടന്ന തെരഞ്ഞെടുപ്പുകളിലൊന്നും കാണാത്ത തരത്തിലുള്ള പരാതികളും വിദ്വേഷ പ്രസംഗങ്ങളും കള്ളവോട്ടും മറ്റുമാണ് ഇത്തവണത്തെ ലോക്‌സഭാ തെരഞ്ഞെടുപ്പ് കാലത്ത് നടന്നത്. ശബരിമല പ്രചാരണവിഷയമാക്കരുതെന്ന തെരഞ്ഞെടുപ്പിന്റെ തുടക്കത്തിലേ മുഖ്യതെരഞ്ഞെടുപ്പ് ഓഫീസറായ ടിക്കാറാം മീണ ആവശ്യപ്പെട്ടിരുന്നു. അതിനെതിരെ കോണ്‍ഗ്രസും ബി.ജെ.പിയും രംഗത്ത് വന്നിരുന്നു. എന്നാല്‍ ഇടത്പക്ഷം ശക്തമായ പിന്തുണ നല്‍കി. എന്നാല്‍ കള്ളവോട്ട് സ്ഥിരീകരിച്ചതോടെ സി.പി.എം മീണയ്‌ക്കെതിരെ രംഗത്തെത്തി. ഒരു രാഷ്ട്രീയ പാര്‍ട്ടിയോടും നേതാക്കളോടും യാതൊരു വിട്ട് വീഴ്ചയും ചെയ്യാതെയാണ് ടിക്കാറാം മീണ തന്റെ ജോലി ചെയ്തത്. അത് വീണ്ടും തുടരുന്നു എന്നതിന് തെളിവാണ് ഓര്‍ത്തഡോക്‌സ് സഭാ വിവാദത്തിലെ അന്വേഷണം.